從西鐵醒返之後……: 34
修洛文舉起拳頭準備迎擊，但當佢見到對方嘅臉容時卻停下手。
同樣地，對方見到修洛文時，亦停下動作。
「咦！係你？」一個著住校服，身材矮小嘅男仔詫異咁指住修洛文。
初頭我認唔出對方係邊個，但望望下好似有啲面善……啊！
我記得喇，佢係鬼仔，係有份幫手打低單車手嘅嗰個男仔。
「原、原來係大叔你。」鬼仔頓咗頓，然後苦笑住講。
修洛文皺緊眉頭，困惑咁盯住鬼仔，並無放鬆戒備。
鬼仔見到修洛文嘅反應，就好有可疑咁講：「喂……你做乜擺個咁嘅樣望住我——」
修洛文二話不說，一手將鬼仔撳落地下。
「啊啊啊啊啊！」鬼仔發出慘叫。
「有敵人。」
蓬—！
第三個敵人從樹林彈出，拎住一條半身長嘅粗樹枝橫揮過去，修洛文撳住鬼仔俯身避昇呢一掃！
鬼仔抬起頭，馬上大叫：「嗚哇！大叔你果然都睇中我個袋！」
「收聲。」修洛文一個斜孭袋打落鬼仔個頭，又將佢打返落地。
對方警惕咁盯住修洛文，忽然向修洛文嘅臉門刺去，但修洛文反而趁住呢個機會向佢衝過去，將膊頭上嘅斜孭袋掟落塊臉，然後再一拳打落對方個頭！
嘭—！
第三個敵人都俾修洛文打低，佢哋企返起身後，就即刻十分狼狽咁轉身逃跑。
「點解佢哋要襲擊我哋？」我不解咁思考，我哋周圍又鐵罐，應該無咩理由俾佢哋襲擊先啱。
「係呢個……」鬼仔企返起身，抹去臉上泥巴，然後指住修洛文嘅斜孭袋，「佢哋想搶補給包！」
原來係咁……所以先突然襲擊我哋。
「我啱啱都遇過嗰班人，俾我撇甩咗，估唔到又喺度撞到佢哋。」鬼仔不忿咁望向修洛文講，「但係都唔使將我個頭撳落地，搞到我食晒泥！」
「我啱啱見到你出嚟，見你咁可疑，以為你係敵人添。」我行到二人身旁。
「我見到大叔咁兇神惡煞，以為佢都想搶我袋嘛！」鬼仔護住自己嘅斜孭袋，「你哋而家諗住行去邊？」
「繼續向上行。」我指一指後方，「我哋係從下面行上嚟，下面完全搵唔到鐵罐。」
「喔，咁我哋目標一致。」鬼仔笑住講。
「你諗住同我哋一齊行……？」我皺起眉頭問。
一齊行嘅話雖然有個照應，但宏觀睇嚟比起三個分開，搜索能力都會低三倍，而且搵到鐵罐之後，又難決定鐵罐屬於邊個。
所以，其實我諗住搵到補給包，有電筒之後就同修洛文分道揚鑣。
但係鬼仔露出自信滿滿嘅笑容，然後打開佢嘅斜孭袋。
「你哋睇下，我係咪好醒呢！」
斜孭袋入面……竟然有兩個綠色鐵罐！
「規則只係話唔可以提早踩扁，又無話唔可以拎走。」鬼仔驕傲展示成果，「不過唔知點解每個回合完之後，擺喺袋入面多咗嘅鐵罐都會唔見咗。」
呢個係當然，鐵罐位置係每回合刷新，即使有人俾怪物或者炸彈殺死，生還人數少於鐵罐人數而令鐵罐會有剩，回合完結後都會刷新鐵罐位置。
正當我打算向鬼仔解釋，修洛文竟然露出詫異嘅表情。
「快放低鐵罐！」修洛文焦急咁講。
「做咩嘢——」
嗄嗄嗄嘞嘞嘞嗄嗄嗄嗄嗄嗄嗄嘞嗄嗄嘞嗄嘞嗄嗄嗄嗄嗄嗄嗄嘞嗄嗄嗄——
嗄嘞嗄嗄嗄嗄嘞嗄嗄嗄嗄嘞嗄嗄嘞嗄嗄嗄嗄嗄嗄嗄嗄嗄嗄嗄嗄嗄嗄嗄——
「呢、呢啲咩聲嚟！」鬼仔驚恐咁講。
蓬—！蓬—！蓬—！
三道黑影從樹後躍出，包圍住我哋兩邊同後面，而今次我終於清楚見到對方嘅外貌——
有著大約兩米身高，擁有著人形軀體，但手腳比一般人異常修長且瘦削，如同皮包骨一樣，而全身如同腐爛多日嘅腐肉一樣，傷口一片一片，流著深紅鮮血。
佢哋張開長滿獠牙嘅嘴巴，以通紅嘅雙眼盯住我哋，並舉起尖銳嘅利爪。
怪物……
我無法搵到第二個形容詞去形容佢哋。
「嗷——嗷——嗷——嗷——嗷——嗷——」
「嗷——嗷——嗷——嗷——嗷——嗷——嗷——嗷——嗷——」
我輕輕向後退，然後——
喀嘞——
樹枝斷裂嘅聲音！
「吼吼吼吼吼吼吼吼吼吼吼吼吼吼吼吼吼吼吼吼！」
「跑！」
三隻怪物張牙舞爪向我哋撲嚟，我哋二話不說向上山嘅道路狂奔！
噠噠噠噠噠噠噠噠噠噠噠——
今次比以往幾次都要更近距離接觸怪物！
我哋不停狂奔，一口氣上咗一大段路。
「吼吼吼吼吼吼吼吼！」
蓬—！蓬—！
旁邊又蹦出多兩隻怪物！
「哇！呢啲怪物咩嚟㗎！」鬼仔一邊跑，一邊大叫。
「唔知，但無估錯嘅話佢哋嘅目標係你袋入面嘅鐵罐。」我講，「咁跑法可能會愈嚟愈多怪物追出嚟，除非你掟咗啲鐵罐去。」
「你白痴㗎，一陣搵唔返啲鐵罐咪死！」
就咁啱喺呢個時侯，音樂停止落嚟。
時機嚟得正好！
「快啲將啲鐵罐拎出嚟踩扁佢！」我大叫。
鬼仔將兩個鐵罐拎出嚟，然後將其中一個踩扁。
「嗱！接住！」鬼仔將另一個鐵罐掟過嚟，但無耐鬼仔準星太差，唔知掟咗去邊。
好彩，原來鐵罐啱啱跌喺修洛文腳邊。
修洛文將鐵罐踢過嚟我腳邊，然後講：「你踩。」
我猶豫咗一下，但危急關頭，我將鐵罐踩扁，然後繼續跑。
過多無耐，再無更多怪物躍出，而追喺我哋身後嘅怪物亦漸漸消失。
「呼——呼——」鬼仔停低落嚟，氣喘如牛，「啱啱嗰啲……係咩嚟？」
「我都唔知，我第一次見到佢哋真身。」我搖頭講，但怪物嘅身姿喺我腦海之中揮之不去。
實在係……太嘔心。
我見過最類似嘅生物，應該係睇《異形》嗰陣見過，醜陋嘅外貌，修長嘅身軀，以及……令人畏懼嘅行為。
「怪物對鐵罐特別敏感，你袋住鐵罐，周圍嘅怪物自然會搵上門。」劫後餘生後，修洛文依然保持冷靜嘅臉容。
「原來係咁……」鬼仔知道自己錯後，露出自責嘅表情。
「算喇，反正而家無事。但係，我哋重差一個鐵罐。」我講。
無錯，只有我同鬼仔踩咗鐵罐，修洛文仍然未踩。
「係喎……」鬼仔愣然咁講。
「唔緊要，重有時間。」修洛文平緩咁講。
唔知話佢無危機感定太過冷靜好，即使係而家修洛文依然無咩情緒變化，最焦急嗰下大概係啱啱鬼仔袋中鐵罐驚喜嗰下。
我審視一下周圍，附近樹木數量比剛才少，不過泥路變得更鬆散，甚至前方有段路係亂石堆。
而且喺不遠嘅上方，有兩處著火區域……其中一處應該係啱啱我聽到爆炸嗰度，而另一處則處於更高位置。
不過，呢座山嘅大小比想像中小，原來我已經離一開始嘅位置有半座山咁遠。如果由山腳登上山腳，跑上去嘅話我諗唔使半個鐘。
我哋繼續前進。
行咗一段路後，我哋喺亂石堆中搵到第三個鐵罐。
喀嘞—！
修洛文將第三個鐵罐踩扁！
我哋三個都成功踩扁鐵罐，呢個回合算平安無事度過。
不過，之後嘅情況會愈嚟愈險峻，鐵罐嘅數目愈嚟愈少，換言之將鐵罐搵出嘅難度會愈嚟愈高。
我……可唔可以撐到去最後九個人？
「唉……唔知詩詩同雷爺，重有阿哥，佢哋而家點呢……」鬼仔握緊雙拳，咬牙切齒咁講。
係喇……夏舞、駱譯、莉莉……
呢刻我內心都非常緊張佢哋，我希望佢哋平安無事，但腦海裡不斷浮現出不安嘅片段……
「喂。」修洛文拎咗支水畀我，「飲啖水先。」
我接過支水，大啖大啖咁飲，嘗試放鬆一下。
鬼仔嘅情況都唔好得我多少，佢都有自己擔心嘅人，而且其中一個人係佢阿哥……
「喂，鬼仔，我想問你一樣嘢。」我向鬼仔問。
「咩嘢？」鬼仔爽快咁講。
「你講嗰個詩詩係咩人嚟？」我問。
「佢、佢……」鬼仔神情有啲怪異，明顯猶豫過後先答，「佢係我同班其中一個女同學，不過佢份人太大小姐，又任性，呢啲環境對佢嚟講……應該會好艱險。」
「喔。」我點一點頭。
估唔到呢刻，竟然會搵到諗法相似嘅人。
我哋休息咗一段時間，判定廣播仍未播出。
睇怕，遊戲困難度將會幾何級數上升。
『回合結束，判定時間到，合格人數：十九，不合格人數：七。鐵罐位置將會刷新，數目十五個，音樂即將播出。』
直到呢刻，合格人數依然少於原先鐵罐數目，真正付上性命嘅爭奪戰仍未真正開始。
一片寂靜。
怪物嘅危險程度，比想像中更甚。
「行啦。」我踏出腳步，繼續前進。
但係……唔知點解覺得好似有啲唔對勁……