從西鐵醒返之後……: 10

「夏舞！」

我輕輕扶住夏舞纖柔嘅身軀，手放落佢額頭上，傳嚟燙熱嘅溫感。

「我……無嘢，只係有啲暈啫，可能係唔夠瞓……」夏舞嘗試坐直身子，但表情話畀我知佢係死撐。

「你額頭好㷫，肯定係發緊燒！」

啱啱夏舞身子企唔穩，從夏舞後腦傳來嘅溫感，同埋身體打冷震……係發燒嘅跡象！





「點解會咁！」

「會唔會……係傷口感染？」駱譯講。

「但我已經好小心咁幫佢處理好傷口！」

「處理傷口離受傷有段時間，再加上傷口係由鐵製嘅箭造成……」駱譯唔肯定咁講，「但、但又有可能只係普通感冒。」

「夏舞，你覺得點？」我慰問夏舞。





「有少少凍，同埋頭暈……」

「駱譯，幫我睇住夏舞！」我輕輕放低夏舞，將身上嘅酒紅色外套除出嚟，冚落夏舞身上。

我行去急救箱旁，睇下有無合適藥物。

止痛藥、感冒藥、胃藥……我搵遍成個藥袋，都搵唔到有治療傷口感染嘅藥物！

「畀感冒藥同退燒藥我就夠……」夏舞緩緩咁講，「傷口感染要抗生素，一般藥袋唔會有……」





「但係……！」

「唔緊要喇，或者真係普通感冒啫……」

雖然夏舞咁講，但始終唔排除傷口感染嘅可能性，只不過眼下只有感冒藥同退燒藥……

「我去廚房睇下有無嘢食！」我一邊焦急地跑去廚房，一邊向駱譯講，「駱譯，你斟啲水畀夏舞飲住先！」

「好、好！」

廚房內只得杯麵、叮飯同朱古力，全部都係高熱量食物。

我將一盒叮飯放入微波爐，叮完之後小心翼翼拎住行到夏舞身旁，親自餵夏舞食嘢。

「小心，睇住熱。」





夏舞慢慢將飯吞下，然後輕聲講：「唔該晒你……對唔住又麻煩到你……」

我餵夏舞食飯同時，不忘瞧向電視屏幕上。

「逸哥，我會睇住㗎喇！」

「唔該晒你。」我向駱譯道謝，雖然佢份人睇落慌慌張張，關鍵時刻係幾可靠。

夏舞食完飯後，我再斟一杯暖水餵夏舞食藥，然後再敷咗條濕毛巾喺佢額頭上。

幸好呢間房嘅基本糧食同日用品齊全。

只不過，夏舞嘅情況不容樂觀。





「咁樣唔係辦法……你而家需要休息。」

「無嘢喎……我重可以！」

「你咁嘅狀態留喺度都無用，不如返房間好好休息下，呢度我哋兩個已經夠。」

「我……」

「你咁樣只會更加礙事。」我稍微加重語氣。

夏舞沉默半響，低下頭緩緩吐出一句：「嗯，對唔住……」

我扶住夏舞行到睡房門前，由於隔音門嘅關係，所以我將房門推開小小，然後呼喚房內嘅莉莉。

「莉莉，方唔方便入嚟？」





「阿逸？等等……」莉莉嘅聲音從房內傳出，「而家可以喇。」

我將房門推開，莉莉一見到我扶住夏舞，便露出驚訝嘅神情問：「發生咩事？」

「佢有啲發燒，可能係感冒，亦有可能係傷口感染。啱啱食咗啲藥，而家扶佢返嚟休息下。」

「喔！我都嚟幫手！」

我同莉莉一同將夏舞扶到床上，幫夏舞冚好被，再替換敷喺額頭上嘅濕毛巾。我見縮喺被中嘅佢依然有啲抖震，於是將我嘅外套都畀埋佢冚。

「咁你哋點？得返兩個人。」莉莉問。

「我同駱譯應該無問題，目前為止啲指令好簡單。」





「咁啊……你哋兩個睇住喇喎，如果真係唔得嘅話就叫我，我可以出嚟幫手。」

「無問題，唔該晒你，莉莉。」我望向躺臥床上嘅夏舞，「夏舞，你今晚就好好咁休息下。」

正當我轉身離開房間，我聽到夏舞微弱嘅喚聲。

「阿逸……對唔住，多謝你……」

「聽朝見。」我講完之後，就返出大廳。

而家得返我同駱譯留喺大廳當值，人手方面的確短缺。

我有諗過搵其他人出嚟幫手，但既然分好組，再叫佢哋幫手好似會麻煩到佢哋，況且我諗兩個人暫時都應付到。

現階段我哋要打醒十二分精神，唔可以有絲毫錯漏。

「逸哥，你啱啱嘅語氣會唔會……重咗啲？」駱譯支吾咁問。

「我唔咁講，個傻女一定會堅持留喺度。」

夏舞係一個天真同率直，而且為人著想嘅人，所以只能用咁嘅方法去趕佢走。

而家七點幾，離換更重有兩個幾鐘。

「係啦！駱譯，囚徒困境呢個遊戲有咩關係？」既然無其他事情可做，我將啱啱嘅話題延續落去。

「喔，囚徒困境——」

「你哋傾緊啲咩，我可唔可以聽埋一份？」

後方傳來聲音，我回頭一望。

「莉莉？」

「諗諗落，你哋得返兩個人……」莉莉走到我哋隔籬，然後坐低，「所以我應該要出嚟幫下你哋手。」

「但係你一陣間都要當值。」我講。

「唔驚，反正我平時住hall好夜先瞓，你叫我而家瞓我都瞓唔著。」莉莉講，「係啦，你哋啱啱傾緊啲咩話？囚徒困境？」

「係，你有無聽過？」我問。

「無。」莉莉乾脆搖頭。

之後，駱譯將囚徒嘅內容複述一次畀莉莉聽。

「囚徒困境嘅最終結果，係互相檢舉，最終各判五年。呢個結果係必然導向，但並唔係最好嘅結果。」駱譯繼續講落去，「事實上，假如大家都選擇沉默，最終只會各判半年。」

「但係，因為佢哋會考慮個人角度，所以最後無法作出對整體利益最好嘅選擇。」我講。

「係，考慮到整體利益，雙方選擇沉默先係最好嘅結果，但因為無法溝通，只會以個人角度考慮得失，佢哋會選擇互相背叛，最後得到一個較差嘅結果。」

「但係……我哋嘅情況，同你所講嘅囚徒困境好似唔同呀？」莉莉疑惑咁問。

突然，我靈機一觸。

「我明白喇！挪亞講過，即使所有房間達成指令都好，都會懲罰根據出局條件去進行懲罰，唯獨是如果所有房間都無達成指令，就唔會有任何出局者。」

雖然思考套路有少許差異，但最終都係導向一個結果——

我哋會為咗自身安全，而選擇去達成指令，最終所有房間達成指令，而必定出現犧牲者。

若然所有房間都無達成指令，就唔會有人受到懲罰——

不過無人會願意咁做。

我曾經聽過呢個結果，好似係叫作——「納什平衡」。

「但係要說服所有房間都唔達成指令簡直係天荒夜譚……！」莉莉帶著不忿嘅語氣咁講，「呢條規則根本無用！」

「呢個就係困境，假如大家乖乖地咩都唔做，就可以安全度過呢場遊戲。」我講，「但係，一定會有人因為擔心、恐懼、猜忌，而選擇達成指令……就好似我哋咁。」

「我哋根本無得揀，萬一我哋選擇唔達成指令，而只要有其中一間房間達成指令，我哋就會出局！」莉莉講。

「……無錯。」

雖然我心明白呢種想法係正中挪亞下懷，但我無法否認。

我哋只能夠繼續同其他房間競爭，避免成為最後一名。

聽完駱譯咁講，我明白啱啱點解我同夏舞去達成指令時，駱譯會猶豫咗下，因為佢知道只要大家都唔去達成指令，就唔會有任何犧牲者。

但係，佢知道呢個情況係無可能，所以就放棄咗呢個諗法。

時間一分一秒過去——

不經不覺，就已經就到十點。

呢三個鐘裡面，我哋無再收到新嘅指令。

一陣腳步聲傳來，下一輪當值嘅三人——家明、修洛文同傑少從樓梯行緊落嚟。

「莉莉，你咁快就出咗嚟？」家明疑惑咁望向莉莉。

「因為夏舞發燒，佢返咗房間休息，所以我一早就出咗嚟。」莉莉解釋，「放心，我之後會繼續留喺度，直到兩點為止。」

「哦……你無問題就得。」家明若有所思咁點頭。

「哇！一句唔舒服就可以返房休息，我都好唔舒服想瞓覺呀！」傑少高聲咁講。

「舞佢發緊燒，加埋佢小腿受傷，可能會有傷口感染，所以佢先返房休息，絕對唔係你所講咁樣！」我不忿咁反駁傑少。

「挑！咩都你講晒㗎喇，鬼知係咪真係咁咩？」

『咳咳！每層九字尾的房間，大家好呀！因為遊戲進展得太慢，為咗增加樂趣同刺激感，我決定增加一啲難度……而家大家先望向電視屏幕。』

我哋跟隨挪亞嘅話望去，電視屏幕顯示上幾行文字——

「……咩話？特別挑戰？」莉莉驚訝咁講。

「失敗咗會隨機懲罰一位玩家？」傑少大叫出聲，「黐線㗎！你老母死都唔好接受呀！」

「但如果唔接受嘅話，會有咩後果……？」家明不安咁問。

『相信大家都睇到電視上寫嘅嘢啦，首先澄清返先，既然係挑戰，當然選擇權在於你哋手上，就算唔接受挑戰我都唔會對你哋出手。你哋茶几上應該有個遙控器，如果你哋接受嘅話，就撳落藍色掣上，唔接受嘅話，就撳落紅色掣上。』

茶几上的確有個遙控器。

『挑戰內容喺接受挑戰後先會顯示，你哋有五分鐘時間考慮。不過啊……如果你哋真係選擇唔接受，就要後果自負喇……接唔接受，會好影響你哋之後嘅命運！哈哈哈哈哈哈哈……』

挪亞嘅聲音隨著陰森嘅笑聲而消失，而屏幕末端有個倒數計時。

預料之外嘅情形，令大家呆若木雞。

未知嘅挑戰內容，挑戰失敗會進行同出局一樣嘅隨機懲罰……

以及意義不明嘅獎勵。



我哋應唔應該接受呢個特別挑戰？