（校園/青春/純愛）《班上嚟咗個插班生？》: 二、新同學？

《二、新同學？》

因為落雨嘅關係，所以原定嘅早會都取消咗，大家都各自上翻課室，而我同卓緩當然都唔會例外，分別就在於佢係c班，我係d班。由於中五課室位於最高嘅五樓，所以行起樓梯上嚟都幾吃力。

「嘩頂..我...我唔得喇..而加先行到3樓？日日咁樣行法...命都短幾年」我喘哂氣咁講。

「行快啲啦，死得未呀你？」佢輕輕力踢一踢我隻腳，唔知係咪唔夠瞓又行咗咁多層樓梯，個人企得唔穩，加上落雨個地又濕，再俾個八婆踢一踢，成個人即刻失咗平衡向後仆。

「吖！」當我以為自己就快仆街嘅時候，突然間出現咗隻手喺我腰間抱住咗我，冇錯係十足十cctvb啲濕鳩劇情，及時阻止悲劇發生。





當我回過神嚟嘅時候，發現我同呢一個陌生嘅面孔對望緊，佢係一個濃眉大眼、而且雙眼皮極深嘅男氣，眼窩嘅輪廓好似想吸走你嘅靈魂咁。由於喺呢間學校讀咗四年，真係大部分嘅人都會認得，而另外小部分就係啲啱啱入學嘅中一雞，但係中一二啲學生又冇乜理由會喺呢個時間上3樓，種種因素都不禁令我思考呢個人係咩來頭。

「唔..唔該哂」
「小心啲」佢冷冷拋低呢句說話之後就離開咗。

之後我都不以為然，話哂今日係開學嘅第一日，啲中一行錯地方都唔出奇，所以我都冇諗太多，繼續行返上課室。

「喂，幽靈，成個暑假冇見，肥咗又瘦咗喎，哈哈」唉，冇錯，幽靈係我嘅花名，基本上全班甚至全級都係咁叫我。而加講緊廢話嘅呢個人就係我舊年一整年嘅同桌，方子洛，Andrew。

「喂，成個暑假冇見，仲係咁多廢話喎」我回應。




「做咩唔約人喎，人地掛住你架」
「妖你同我收皮」呢個就係我地嘅溝通方式，佢係一個比較熱情同埋玩得嘅男仔，而且個樣都唔係差，當初老師安排佢同我坐就係希望佢可以融化到我，我意思係令我善談啲。然而，佢好似成功咗。

「喂喂喂，大家安靜啲，我都明白暑假後第一日翻學係會雀躍啲，不過都要俾我講吓啲緊要嘢先。嗱，今年我地班會有個新同學，我希望你地可以融洽相處，唔好見人地係新同學就蝦人呀吓！可以入嚟喇。」老師笑住對課室門口講。

「新同學？」我心裡突然冒出一個面孔，然後就有一個身影慢慢行入班房。

「介紹吓自己先啦」老師講。
「大家好，我叫程樂汶，你地可以叫我lokman，未來嘅日子多多指教。」說罷，就露出一個微笑，將佢嘅酒窩完美展現於眼前。





「咁大家就好好地照顧佢喇。好啦，咁而加就要幫新同學安排個坐位先。」老師對眼好似scanner咁掃描咗個班房一次，然後對眼就停留咗喺我身旁嘅空位。

「佑玲，樂汶坐你隔離冇問題吖嘛？」

「當然冇問題啦。」我望一望向Andrew，只見佢聳聳肩，唔通我話有問題咩屌。然後lokman就慢慢行去我身旁坐低。

「好，咁冇問題就開始點名喇。」接住落嚟就係一堆班務。