弊家伙，閻羅王唔見左!: (八)

(八)
我仔細打量了波多野一會，道:「真係不得了，冇九成究都有九成半似!不過，經理，對暈好似有啲色差喎，啡左小小!仲有，會唔會大左啲?」

胖經理笑淫淫道:「燈光問題姐，其實好粉架!依家個大細啱架啦!」

我白了胖經理一眼道:「顏色就算啦!但係個Size真係唔得喎，成個老婆餅咁大!」

胖經理怕了我，道:「得，即改!老細，冇其他問題不如講番價錢先，1400蚊一粒鐘任玩!」

我皺眉道:「好似貴左啲喎!」





胖經理解釋道:「唔貴啦，波多野喎!1400蚊來回飛日本都唔得啦!嗱，見老細你第一次，破處價1200，屌唔屌?」

我答道:「屌……Visa收唔收?順便借個火黎，第一次有啲緊張，想食番口煙先!」

經理滿意地點頭，並遞來已點火的火機。我一手把訊號符燒掉，一手把人和組的證件遞給經理。

經理面死如灰道:「阿Sir，你即係玩我姐，放蛇都咁多要求，仲要講價?」

我滿意地笑道:「緊係啦，專業架嘛!」，此時波多野馬上走出房外，邊通知其他姊妹邊逃跑。





我搖頭道:「走?走得去邊?棧自己攞苦黎辛!」

果然不消五分鐘，所有的嫖客和妓女都被帶到大廳中，嘗試逃跑的無不口腫鼻腫。牛五喝道:「男左女右，人前鬼後!拎定身份證或者鹹魚紙出黎，陣間比阿Sir Check!」

牛五側過頭來，低聲道:「吽……紙紮佬，唔係好夠孖葉洗，爽手紮多幾對黎呀!」

我嘀咕道:「屌，鋪鋪都係咁!」，說罷便乖乖的拿出竹篾來製作手銬。我亦趁這個時間，問史努比道:「史努比，咩係Level 2嘅鬼?」

史努比有點不可置信的問道:「嘩，你做左呢行咁耐，都唔知啲鬼點分Level?」





我嘆一口氣道:「好出奇咩，我又冇學過!平時做親都係細Case，唔係拉有暴露僻嘅屎忽鬼，就係處理人鬼家庭糾紛，見親都係Level 0!」

史努比點點頭:「都好，當同你補下課!呢個分類系統係由冥聯制訂，國際冥界通用!」

「Level 0簡單黎講就係咩能力都冇!係結界入面，佢地唔可以現身、接觸實物。不過依家冇結界，佢地反而同普通人一樣，見得到、摸得到!」

「至於Level 1嘅鬼係可以隨意改變自己嘅物理條件，透過改變自己嘅透光度，令自己隱身或者現形，又或者改變自己嘅密度，令自己識飛同穿牆!」

「Level 2就係指擁有特殊能力嘅鬼，例如識幻化、上身、念力等等，當然亦都有Level 1嘅能力啦!」

「Level 3同Level 2其實差唔多，只不過佢地通常擁有多種特殊能力，而且可以熟練咁同時混合使用。佢地多數都有好大嘅怨念，極具攻擊性，一句講哂就係好猛嘅惡鬼!」

我把製作好的手銬燒掉，道:「牛五，搞掂啦!收野啦!」





史努比氣得蒼白的臉也紅了，道:「頂，你有冇聽我講野架?!」