[倫理甜故] 豆沙妹延續篇之呀妹唔係我個妹: 第十六章

點心黎到, 何生兩仔爺就老實唔客氣咁就開始食野, 而子妮同秀姑就仲響度爭拗住之中, 子妮繼續細細聲咁同秀姑講, 「媽呀, 啲手續妳咪就依正規舉去做囉, 做咩要我做埋哂啲咁嘅野呀?」
 
秀姑開始有啲動氣, 「唏, 細路女妳識得啲咩吖, 響大陸做野妳唔去搵人幫妳出聲嘅話, 依正規舉妳就真係咩都唔使去做架嘞, 我而家又唔係要妳嫁比佢, 總之妳就係咁咦氹得佢開心嘅話, 咁佢先至肯響上面幫呀媽出聲架嗎!」
 
子妮斬釘截鐵咁問秀姑, 「咁係唔係要我同佢上埋床咁先至叫做氹得佢開心呀?」 秀姑聽倒之後有啲語塞, 「咁…其實又….唔係真係話要咁做嘅, 唉, 但如果妳係叻女識耍手段嘅話, 咁都可以唔使上床就可以冧得佢掂架!」
 
子妮開始好嬲咁同秀姑講, 「咁即係話如果我唔識得耍手段嘅話, 我就要陪佢上床咁係唔係呀?」
 
秀姑正面色一沉咁望住子妮講, 「咁而家係唔係好難為妳吖? 叫妳幫呀媽做少少野就發哂脾氣, 妳唔好話比我知妳未比男人搞過, 我上面果幾個女唔夠靚咋, 如果唔係我使咩搵妳黎番幫我去見呢個何生呀?」
 


子妮已經雙眼泛紅口震震住咁講, 「妳..唔..係..我..呀..媽.., 胡…胡…, 我媽 me係唔會叫啲仔女去做埋哂啲咁嘅事嘅, 我而家終於都知道, 點解妳突然之間同我爹啲媽 me 講話要我番黎同妳住, 妳根本就係想利用我, 妳想我幫妳做埋哂啲污糟邋遢事黎達到妳嘅目的, 我話妳知, 我一陣番去就會執埋啲野搬走, 我要搬番去我爹啲媽 me 果度住……」
 

 
秀姑已經著哂火, 「妳個死女包, 妳呢個忘祖忘宗嘅死女包, 自己有個親生老母都唔認, 而就走去認啲外人黎做老豆老母, 妳比人洗哂腦嘞, 妳咁做係會比雷劈架!」
 
子妮唔理呀秀繼續鬧佢, 跟住就嬲到企左起身, 「我而家番去執埋啲野就搬走!」 講完, 子妮就頭都唔回就行左出去。
 
我個電話響起, 「哥…..」 子妮將剛才所發生嘅事都已經話哂比我知, 「子妮, 咁妳快啲番去執埋啲野先, 呀哥而家即刻打電話比爹啲媽 me 知, 跟住呀哥就會同豆沙妹即刻搭車過黎幫妳手搬野!」
 


我打電話講左呢個消息比爹啲媽 me 知道, 跟住我就再同豆沙妹一齊搭的士趕去中環半山子妮嘅住處, 子妮已經番到屋企開始執緊野, 但響呢個時候, 屋企大門有人打開左, 子妮見秀姑同幾個大媽款嘅女人已經急步行左入黎。
 
秀姑首先破口大罵, 「妳呢個正一係衰女包, 走走走, 妳仲想走去邊度呀?」秀姑快步衝到上前就響子妮執緊野嘅行李篋內挖番哂啲衫出黎掉到地上, 「走吖嗱, 執野走吖嗱!」 幾個同樣係惡形惡相嘅大媽亦衝到上前一人一句咁鬧住子妮。
 
「呀秀, 呢啲正一係忤逆女黎架!」 「咪就係, 有老母都唔認, 等到第時妳啲仔女都係咁對番妳架咋!」 「個老母都係為妳好啫, 但妳唔領情都不特止, 仲要學埋哂啲駁咀駁舌嘅衰野!」 「呀秀, 攞條鎖鏈鎖住佢唔好比佢行出門口度啦, 呢啲衰女正一係養唔熟黎架!」
 
子妮比班大媽圍攻嚇到瑟縮響地上嘅一角處, 秀姑同班大媽已經愈鬧就愈火, 跟住就直情出埋手黎係咁拍打住坐響地上嘅子妮個頭同冚佢塊面。
 
「哇, 唔好打呀, 好痛呀…..」