愛在香港，食在英國: 第十四章

我問Jenny：「食咩」
Jenny：「唔……」
佢未講我已經打斷佢：「唔好又食日本野」
佢：「咁食西餐囉？」
我：「好，就咁話」

之後就搵咗間餐廳，果陣啲人多數仲要返工，唔駛等就有得入
求其搵咗個卡位就坐低叫野食，過程都係吹水加食野，食完野飲野，飲完野埋單。廢話唔多講，廢事悶親看倌

我果陣都廢事問「走未？」喱啲低能問題，一早預咗行到夜晚




我：「而家去邊度行呀大小姐？」
Jenny：「去_______好冇？幫我睇下眼，我想買禮物」
「唔係啱啱先完咗聖誕聚會啦咩」
「唔係啊，阿爸就生日，所以買份野畀佢」

見佢咁認真我都廢事鳩up咩「搵第個唔得咩」，
我答佢：「好，就咁話，等本專家幫下你揀份神級禮物」
Jenny：「傻仔，行啦」

之後就行咗去商場，逐間逐間舖望，睇下有咩心水。




行咗陣，我問Jenny：「唔記得問你，你有幾多budget」
佢：「我預$___咁上下（我當時兩三個月嘅零用）」
「咁多？駛鬼行喱啲舖？去_______望啦」
「其實係阿媽資助大份，叫我多除少補，budget先咁鬆動之嘛」

之後去咗啲high-class少少嘅商店區
睇咗唔少舖，Jenny有唔少心水，都係十五十六，
然後我問佢：「其實你阿爸返邊類形工？揀份啱佢style嘅禮物啦。」
佢：「佢平時都係做文職，要返寫字樓。」
「咁不如買枝parker筆？我冇記錯可以刻埋名喎，你個筆直都有唔少靚野選擇」




「都好喎，你男仔，等陣幫我揀枝」

之後就去揀筆，途中sales都有走埋黎，不過揀野果陣最憎畀人望住晒，畀我打發走咗
Jenny拎起咗枝原子筆（parker有分原子筆同墨水筆兩類）：「喱枝好唔好」
我：「唔……原子筆係預你成日寫野先用，我諗你老豆收咗枝筆都唔捨得用掛？揀枝墨水筆啦」
之後又揀咗陣，我拎咗枝黑色鋼筆，問Jenny：「點睇？價錢離筆直有一截，男人斷估對黑色唔反感掛？」
Jenny：「幾靚喎，勁野，帶你黎冇錯。」
「唔駛賣口乖，唔係我畀錢」

揀好就叫咗sales埋黎，問佢：「我地想要喱枝，請問有冇得刻名」
Sales：「我地可以幫你刻，但唔係即刻有得拎，有冇問題？」
Jenny：「咁X月X日前拎得唔得？」
Sales：「當然冇問題」

之後就問咗要刻咩字，留低電話同名，畀埋錢拎咗張單就走人