愛在香港，食在英國: 第七章

轉眼去到星期日，應承咗Jenny幫佢拎野。
去到某間舖頭度，Jenny畀張單個老細，老細捧咗一pack用牛皮紙包住長長方方嘅野畀我。
我由老細手中接過，問Jenny：「咩黎」
Jenny：「poster」
講真果度我諗都係一百張左右，要黎做咩我冇理，我職位算係低級，有時有啲聯社搞嘅活動都係起碼副社長級出手。
我：「好心你，果幾廿張紙咁輕你就自己拎，要我同你搭咁耐車」
老細加把口：「嗱哥哥仔你就唔啱喇，幫女朋友拎野係應份架」
我果陣個樣同「」冇分別：「老細，唔好誤會，你見我一身裝束就知我係佢隻奴隸、馬仔黎」

講起著衫，真係要讚一讚Jenny（而家著黑絲幾正）




出街攞少少野都要著到咁認真，又boots又裙
我就求其T-shirt牛仔褲波鞋

Jenny對我講：「辛苦晒喇奴隸」，擰一擰轉頭：「唔該老細」

出咗舖頭行去地鐵站就搭返去學校個站，但因為學校星期日唔開，所以放低pack野喺Jenny屋企度。
（想睇甜故嘅看倌就真係對唔住，上佢度係冇任何野發生嘅，當年一個小小中學雞，點敢做埋啲咁嘅事。）
Jenny：「而家點？」
我：「咩點」
「等陣有咩做？」




「返屋企算唔算有野做？」
「咪返住喇，而家仲早，不如出_______行下（銅鑼灣？尖沙咀？百佳？請看倌自己估）」
「又搭返出去？唔好喇掛」
Jenny一路推我出門口一路講：「行啦行啦行啦」

我諗你都估到，衰心軟，咪又係同咗佢出去行

以前我真係幾懶，唔會亳無目的就出街；
而家喺英倫，有時放假就會周圍走，去下唔同城市睇下各自各嘅特色。
可能以前覺得喺香港行都幾無聊（除咗去郊外行山，好鬼正），一個個嘅商場一間間嘅食肆、戲院。




唔係祟洋，但深深覺得外國嘅城市規劃、建築設計真係好有特色，可惜唔可以喺度post相。
我鼓勵學生哥多啲出去走走，第時返工真係冇時間，就算有時間，都未必有閒情逸緻，寧願喺屋企瞓多陣。
你可能會話：點會每個人都會有錢
喱樣真嘅，不過平有平行貴有貴行，多啲去郊外行下，或者由大圍租架單車踩到大尾篤都唔錯。
過多兩、三個十年，香港隨時超過一千萬人口，到時喱個石屎森林就更石屎，
我諗政府到時寧願起多幾個場畀大陸人拖喼買野都廢事留低啲唔profitable嘅遠足徑、單車路