我的援交師姐: 故事後的四章「花絮」。。(2) Margo
我叫 Margo，我今年16 歲。
我曾經自殺過。。
媽咪帶我去睇醫生，佢哋話我有「情緒病」。。我唔知點解佢哋話我有「病」囉。
我只知道我由懂事開始時，就知我跟其他同學「唔同」，我無爸爸。
我第一次問媽咪時，佢無答我，佢攬住我喊咗。。之後，再過咗好多年，我先至夠胆再問。但係，媽咪只答我一句，「女，你第日大個啲，我再講畀你聽。。你仲細個，你而家唔會明既。」
不過，直到今日，我哋都無再提起過。。
我越大個，就覺得媽咪好似有好多「秘密」，唔開心既秘密。。而我，亦一樣。。我亦將「唔開心」既事，成為我既「秘密」。
因為，媽咪好錫我，我愛媽咪，我唔想佢唔開心，唔想將我既「唔開心」，傳染畀佢。或者，媽咪亦因為愛我，所以唔想將佢既「唔開心」，傳染畀我。
就係喺一次，我意外發現到原來媽咪竟然做「鷄」，我好驚呀，我已經成日畀同學笑我「冇爸爸」，原來。。到底媽咪幾時開始？？係生我之前嗎？
同時，我憎啲男人咁對待我媽咪，我好唔開心，我好困擾，想唔開下。。我自殺咗。。但割自己手腕原來好痛既，見到好多血流出，我好驚。。我打咗「999」。
學校裹頭，我只有一個好朋友，就係 Winnie 。。只有佢最 friend ，其他女仔，一但有利益衝突，都想喺背後「插我一刀」( 笑我冇老豆。。甚至我最驚就係連媽咪既「秘密」都畀人知道，所以我好少朋友 ) 。。係呀，講緊既「利益」，咪就係其他「男同學」囉。
佢哋都多餘既，班「男仔」個個只係想攞「便宜」，我先至無興趣。。咪由得啲「狗男女」自己癲夠佢囉。
六個月前，我喺網上識咗個男人。。原來，佢竟然大我廿幾年。。我哋好好傾，佢唔似學校啲男仔，更唔似網上既「毒男」。。我哋逐漸成為咗好朋友。。感覺上，我好希望有個咁樣既「爸爸」。
但，「爸爸」呢個「地位」，其實於我嚟講，又太模糊囉。。同埋，亦只帶畀我同媽咪失望，同唔開心。。所以，之後我對佢既感覺。。嘻，我希望第日能夠遇上一個「同樣」既男人。。嫁畀佢。
( 下一章：「Winnie」 )