[深夜重口味] 黑色蒲公英: 唔好畀自己後悔一生

話說我離開咗香港好耐，突然收到 Rebecca 嘅 e-mail...

馬上打開。
『親愛的老公，做緊咩? 知唔知呢封 e-mail 有咩特別? 十年前寄出架!』
十年? 豈不是遺言? 我揞住個口，難以置信。
『記唔記得 Back To The Future 2? 最尾 Doc 寄咗封七十年前嘅信畀 Marty 呢? 似唔似呀?』
『無意中發現有網站可以 keep 住 e-mail 將來先發，咪試下囉，不過七十年太長喇，十年就差唔多。』
『BB 依家應該讀小四喇，仔定女? 乖唔乖? 姑娘話就快會感到胎動，好心急呀!』
如果你知道後來陀得咁辛苦，仲會唔會咁開心?
『老公，有啲說話唔敢當面講，所以用呢封 e-mail 十年後先講。』


『曾經睇過一本書，佢話每個人都係另一個人嘅守護小天使。』
『當遇到你，就認定你係我嘅守護小天使。』
『但原來搞錯咗，我先係你嘅守護小天使，你成日唔做功課，上堂又唔聽書，次次臨測驗考試要我幫你補習!』
腦中重現中學時嘅歡樂畫面，不過回憶令我雙眼濕晒。
『後來聽到你有女朋友，好傷心，好想忘記你，好想討厭你，不過做唔到，一諗起你，個心就好暖。』
『你知唔知你係一個好細心嘅人? 雖然粗枝大葉，不過其實好溫柔，好識感受人。』
『我知你同我一齊只係報答我，個心一直嚮 Joyce 度，不過你知唔知專一嘅男人好迷人?』
我唔係專一，我... 對唔住。
『你話已經忘記咗佢，你知唔知你一啲都唔識講大話?』
『問心，邊有女人想自己嘅男人只係報恩，唔係真心愛自己?』


『不過同時，女人又好自私，一旦擁有就唔捨得放手，我想永遠霸住你。』
『但我始終係替身，遲早要起身。』
『我相信 Joyce 嚮某處等緊你，十年喇，去搵佢啦，唔好畀自己後悔一生，我可以顧到自已同 BB 架。』
『如果仲係搵唔到，或者因為某啲原因你地唔可以一齊，歡迎隨時返嚟，請你記住，我永遠都係你嘅守護小天使。』
『前妻，Rebecca 上。』
Rebecca!
我喊到收唔到聲，同當年 Joyce 離開時一樣。
收拾心情之後，我向 Joyce 講一句十年冇講過嘅說話...
『我愛你』
然後出發去機場。



<< 未完待續 >>