[深夜重口味] 黑色蒲公英: 對唔住，Rebecca

話說當我同 Joyce 恩思愛愛嘅時候，原來 Rebecca 入咗醫院...

「姑娘，我太太點呀?」
「我地已經盡咗力，不過佢失血過多，今朝六點已經離開咗。」
Rebecca 死咗?
「至於個 BB，因為缺氧，亦都搶救無效。」
BB 都死埋?
「醫生已經走咗，有需要我地可以幫你約見，詳細死因會嚮報告列明，你等一陣，我畀啲文件你辦手續。」
我呆晒，一個鐘之內由天堂跌落地獄。
「都話唔好去旅行啦! 去乜鬼旅行喎? 嗚...」


外母仲好激動，外父安慰佢。
「唉，我地班機遲咗幾個鐘，返到香港都半夜，打畀佢冇人聽，打畀你又飛咗去留言。」
我部電話冇電。
「以為你地瞓咗，不過媽咪唔放心，係都要上去，點知一入屋就見到佢瞓嚮地下，成地血。」
個心好震，好似被冰封咁。
「你去咗邊? 唔係睇住個老婆咩?」
「阿女呀阿女，點解你掉低媽咪呀? 一日都係你，唔係嫁畀你就唔使死!」
外母又想打我，被外父撳住。
「對唔住。」
不過依家講咩都冇用。


返到屋企，地板有一大灘血，我執起 Rebecca 部電話，佢打咗好多次畀我。
Whatsapp 亦有好多未讀 message，全部都係畀我...
『老公，咁早去咗邊?』
『返公司?』
『努力!』
『使唔使等你食飯?』
『好忙?』
『BB 掛住你，又踢我』
『踢到我好痛』
『好唔舒服，可唔可以返嚟?』


『隔幾個字又痛』
『好驚』
『快 D 返』
『好痛』
最後一個打咗冇 send...
『流血，點算?』
唔係上堂過學咩? 點解唔報警喎? 點解剩係搵我喎?
我扭濕塊布，跪低抹地。
回憶一幕幕重現眼前。
「阿邦，你有冇聽書架?」
「阿邦，你好叻呀。」
我出力地抹，冇晒血跡繼續抹，因為不斷有水滴落地面。
「阿邦，大力啲揸我唔怕架。」
「阿邦，我買咗美少女戰士底底。」
佢信晒我，將一切交晒畀我，我就係佢嘅全部。


「阿邦，我今個月遲咗。」
「老公，你鍾意仔定女? 我希望係男仔，大個咗你可以教佢打波。」
我撼個頭落地面。
「對唔住，Rebecca。」

<< 未完待續 >>