[深夜重口味] 黑色蒲公英: 鍾意我可能只係...

話說我想 Joyce 坦白講愛我，點知佢話最愛嘅男人叫小琳...

劉生唔係叫小琳喎。
「小琳係你第一任丈夫?」
「嗯，我六歲已經識佢。」
六歲，即係開始嚮大陸生活果時?
「我地青梅竹馬，好快已經感覺到對方唔係兄妹或普通朋友，不過我地去到十六歲互相表白之後先一齊。」
佢開始冇望住我。
「我地一齊讀書，一齊考高考，一齊大學畢業，一齊去上海，加入同一間公司，嚮同一個部門一齊做野，而阿劉就係我地直屬上司。」
啊? 原來劉生係你上司?


「我地訂咗婚，打算兩年後結婚，點知...」
佢突然攬實我。
「小琳嚮行禮前半年，突然患急病過咗身。」
真係死咗?
「Alan，你永遠想像唔到，一個同你一齊咗十幾年嘅人突然消失果種痛苦係點。」
佢攬得我好實，我後悔勾起佢傷心往事。
「我當時好失落，好似世界末日咁，好想結束自己生命，好在阿劉扶住我，如果冇佢，我今日都見唔到你。」
「即係劉生趁你最空虛嘅時候乘虛而入?」
「Alan，事情要分兩面睇，你覺得乘虛而入，不過我真係好依靠佢，所以我唔介意為佢做任何野。」
「但我覺得你似報答佢多啲囉，而且救命因人唔代表可以要你做咩都得，我絕對唔會好似佢咁!」


「Alan，我知你愛我，不過你又有冇諗過，你鍾意我可能只係未見過其他女人? 有朝一日當你遇到比我更靚，身材更好，或者床上同你更合拍嘅女人，到時...」
「我好專一架! 我永遠只愛你一個。」
雖然係咁講，不過我記得小學時最鍾意打乒乓波，因為當時校舍細，唯一一個籃球場成日被人霸住，我只可以打乒乓波，當時以為會一直打落去。
後來升中學，校舍有幾個籃球場，於是我打起籃球，仲打到入校隊，已經好耐冇打乒乓波了。
我會唔會好似 Joyce 咁講，將來見異思遷?
「Joyce，我同小琳係咪有啲似?」
「唔係，你地一啲都唔似。」
吓?
「不過你地有共通點，就係對我好細心。」
佢錫一啖我。


「Alan，同你相處咗咁耐，我承認對你唔止有好感，仲產生咗感情，不過咁唔代表我愛你，唔知你明唔明白?」
我唔明白，不過...
「既然有感情，我地依家係咩關係?」
「鄰居關係。」

<< 未完待續 >>