[深夜重口味] 黑色蒲公英: 早晨劉太

自從 BB 出咗世，Joyce 同我嘅性生活有小小改變。
以前每當我發洩完會馬上倦極而睡，就算梅開二度都要先回一回氣。
佢會細心幫我清潔，然後攬住我，當我 BB 咁哄，獻上無限溫柔。
依家啱啱相反。
當興奮完，佢會滿足地瞓著，而我就為佢抹乾淨，然後攬住佢呵護佢。
冷氣被襟住半邊白滑背飢，點解佢好似從來未老過? 明明比我大十年...
吖! 唔係，九年先啱。
佢面上一啲歲月痕跡都冇，充滿緊緻彈性，同年齡唔成正比。
太太保持青春美貌係丈夫福氣，不過我嘅幸福背後一絲絲不安又再出現。
明明事業，財富，感情，健康... 我各方面都接近完美，但不安感反而有增無減。


點解?
其實佢二十年前已經警告過我，我當時十六歲...
「早晨劉太。」
「早晨。」
劉太同我屋企係鄰居，呢個私人屋苑以依家標準算係豪宅，不過當時只叫普通屋苑。
聽媽咪講，劉太老公係大陸人，佢地兩個都做金融。
我當時唔知做金融即係做咩，可能等如銀行啩。
不過劉太應該同劉生唔同公司，因為我從未見過佢地一齊返工。
我每朝好早出門，但總會撞到劉太。
劉太有時著 suite，有時 one piece，間中貼身長褲，或者短褲長靴配鮮色外套。


但無論著咩，佢都可以優雅地展現玲瓏身段，其實佢會唔會係兼職 model?
我扮望住電梯數字，實際眼尾不斷偷望佢。
佢好似睇穿咗，向我微笑。
佢嘅笑容好特別，唔算甜美，但唔係冷酷，好有層次，但又有啲抽離。
我唔知應該叫有性格定有氣質，總之好神秘，令人忍唔住想多啲了解佢。
至於劉生，佢似大劉太幾年，冇一般大陸麻甩佬嘅土味，都算襯得起劉太。
我好少見到佢，對佢印象唔深，只知佢叫劉太做 Joyce。

<< 未完待續 >>