[HiHi喇] 大佬叫我入大學收兵......: 27

到我恢復返理智既時候，我發現雷明燈已經渾身浴血咁俾班街童抬走緊。 

采兒虛弱咁訓左係地上面，用驚恐既眼光望住我。 

「發生左咩事？」我問道。 

身後一個臀部受傷既影團猶有餘悸道：「頭....頭先個MK仔係咁求你放過佢，但係你好似無哂人性咁不停出拳打佢塊面，就連佢用把刀割你，你都好似無知覺咁繼續打。」 

我望一望自己，手上面果然又多左幾條刀傷。 





我唔理傷口傳來既痛楚，走過去用手抱起采兒，道：「o靚妹, 妳有無事呀？」 

見到佢背脊仲插住把刀，我心痛到寧願中刀果個係我。 

「原來....你咁好打家。」采兒無力道：「早知你身手咁好，我就唔使自作多情幫你擋刀啦，你一定避到既。」 

「傻妹來家，唔係你幫我擋一擋，我一早死左啦。」 我唔忍心將個事實講俾佢聽。 

采兒微笑道：「嘻，咁就好喇，証明采兒原來仲有啲用既。」 





「妳受咁重傷，休息下啦, 唔好講野啦....」 

「唔制，我驚以後無機會講啦...」 

奇怪喇，雖然采兒講到自已好似時日無多咁，但係聽佢講起野上來中氣十足，面色紅潤，一啲都唔似就來死既人。 

唔通呢啲就係所謂既迴光返照？ 

「采兒，你介唔介意我睇下妳個傷口？」我心急問道。 





「吓....？可以.....不過....我好驚呀....」 

「放心，有我係度。 」 

我講完先醒起，正正因為有我係度，佢先會中刀。 

但采兒好明顯無我諗得咁多, 佢聽完我咁講之後，就安心咁點一點頭。 

我小心翼翼咁將佢個身反轉，然後輕輕掀起佢果件沾滿鮮血既Camp tee。

謝天謝地..... 

原來雷明燈射出果把刀咁岩卡住左喺采兒個Bra扣度，所以采兒只係俾把萬用刀既刀尖割傷左少少背部既皮膚。

我見采兒背部既傷口好似無再流血，於是輕輕咁將把刀「蚊」番出來。 





呢個時候，身旁突然傳來一把聲音。 

「忽得，我建議你解埋佢個Bra 扣check下穩陣啲。」攤左喺我地隔離既飛機眼都唔貶咁昅實采兒白滑既背脊。

見佢俾雷明燈斬傷之後仲識講野，我開心道：「死咸濕仔吖，你唔係死左既咩?」 

飛機道：「未睇到采兒個胸，我死唔眼閉。」 

采兒怕羞到即時擰返轉個身，道：「你地夾埋來蝦我！....咦？點解把刀會蚊番出來既？」 

「呢次真係多得妳個Bra Bra 救左你一命喇。」我笑道。 

見采兒無咩大礙，我輕輕將佢放番喺地，然後走過去檢視飛機既傷勢。 





「嗚啊！痛死我啦！」我一掂到佢，飛機即時誇張咁大聲呻吟。 

「咪撚扮野喇。」我笑道：「班街童用既萬用刀應該係日本城啲十蚊貨仔，所以你受既只係一啲皮肉之傷。」 

「屌呀！我全身流撚哂血咁, 你都仲話係小傷！」飛機激到成個彈起。 

「你睇下你幾生猛，唔好發細路仔脾氣啦，去睇下你啲影團好過啦。」



如是者，我同飛機逐一為地上面典來典去既影團檢查傷口。 

一如所料，雖然佢地身上既傷口好多, 但係無一個傷及到筋骨。 

唔知點解，當我知道左佢地個個都齊齊整整既時候，我竟然由心笑左出來。 





我搭住飛機既膊頭問：「我同你非親非故，點解個Mk仔要劈我果時，你咁夠彊飛過幫我擋刀呀？」 

飛機理所當然道:「車，咁你之前喺入學典禮果時夠幫我擋左野水樽啦。」 

飛機越講得輕描淡寫，我就越感動。 

「咁你地呢？你地無欠我啲咩家喎。」我對住飛機班影團道。 

「吹得雞就頂硬上家啦。」 

「你俾人劈，我地無理由走左去既。」 

「係咯。」 





無幾耐之前，我都仲係好睇唔起呢班毛都未出齊既死o靚仔，但經此一役，我對佢地完全改哂觀。 

嗯，義氣之交，必須真誠相對。 

我唔忍心再瞞住呢班毫無機心既學生哥，於是道：「有啲野我想同大家講。」 

佢地成班即時靜左落來聽我講。 

我深呼吸一口氣，道：「其實我係黑社會派來既臥底!」