[HiHi喇] 大佬叫我入大學收兵......: (4)

呢間房同其他果啲好唔同，除左燈光比較光猛之外，裝修亦都豪華好多，房中間仲要擺左一張名門望族專用既長餐檯。 

Eric幫我拉開左張凳道：「你坐坐先，坤哥好快就會過來。」 

佢拍一拍手掌，就有人送上一條巨型既日本料理船。 

「唔夠食既話即管開聲，我會聽得到。」Eric生硬咁笑左一笑，就離開左。 

雖然唔知發生咩事，但咁多款壽司刺身擺係眼前，幾大都食左先講。 





我狠吞虎咽左N舊帆立貝之後，房門就打開左。 

我即時企起身恭敬道：「坤哥，唔好意思，食多左......」 

坤哥望一望條空船，道： 「無相干，後生仔食多啲先有氣力拚搏。 來，坐低先講。」 

我戰戰競競咁坐番埋位。 

「你叫咩名?」坤哥問。 





「我叫忽得。」 

「我係問你個全名。」 

「我全名叫好撚忽得。」 

坤哥眼神閃過一絲怒色，隨即和善道：「咁你呀爸呀媽幫你改左個咩名吖？」 

「哦，原來你係問呢個。我叫李又德。你叫我忽得又得，你叫我李又德又得，得左。」 





「得喇得喇，我叫番你忽得啦。」坤哥強忍住唔耐煩既情緒, 道：「我無估錯既話, 忽得你應該係讀過唔少書。」 

事實上我只係得中三程度，但直覺話俾我聽唔可以講真話，於是道：「係呀，身邊既人都話我好叻仔家。」 

「睇得出。」坤哥點頭道：「唔叻既話你數學果Part都唔會攞滿分啦。」 

嘩屌! 真係俾我擲骰仔撞中哂？！早知就買張六合彩啦，呢期果一億咪係我個咯。 

「你讀書咁叻，點解要做古惑仔?」坤哥突然問。 

俾佢淩厲既眼神掘住，我發覺我好難講到大話，只好道：「咁…咁Eric都係咁啦。」 

我純粹只係亂估，點知坤哥竟然拍檯道：「我就知你地係同一類人！」

坤哥企左起身, 負手道：「自從Eric讀完個經濟博士返來幫我打理業務之後，呢幾年我地真係撈到風生水起。正因為咁，我先明白到「摧建幫」最需要既, 唔係啲勇字行頭既傻仔，而係你地呢啲高學歷既人才！」 





我feel到係時候喇，於是跪低道：「坤哥有咩吩咐，即管同細佬講。細佬上刀山落老蘭, 絕無托手肘！」 

坤哥伸手扶左我起身，笑道：「我想請你幫我完成一項好特別既任務。」 

「千祈唔好用個請字, 坤哥有咩即管吩咐細佬得家喇!」大任當前, 我全身熱血沸騰。 

坤哥逐隻字逐隻字好清晰咁講: 

「我要你入大學做臥底！」