自掘墳墓: 「墓頂」的一切
如果是乾脆一刀斬死，那沒有什麼「絕望」可談的。
絕望是活人的東西，死亡就是逃離痛苦和絕望的最有效方法，但會同時帶走「希望」、「意識」、「感情」、「價值」……
因為，死亡就是拿走你的一切。
「墓頂」的乾屍，每個頭上都有彈孔，是爭鬥攘成嗎？不太可能。
唯一合理的解釋，就是集體自殺。
五名盜墓賊，深入皇朝古墓，打算擄掠一遍，卻不幸觸發機關，使墓室上下反轉，一行人被困於奇怪的密室內。
日久被困，清水和糧食耗盡，他們很快就陷入恐慌，開始爭吵和打鬥，甚至想過人相食。然而，絕望的盜墓賊寧可死得痛快，都不願吃掉自己的夥伴，然後苟延殘存多數天。於是，他們每人喝上最後一口美酒，然後逐個提槍自殺，親手了結自己渺小的生命。
剩下半支的白酒，相信是最後自殺的那個人，捨不得喝下，或者想清醒地死去，才遺留給我們……
「有冇咁恐怖呀？」Ocean內心一涼。
「我唔要呀！」小儀幾乎哭了。
五顆子彈，五個人頭，真是巧合。
這五具乾屍難不成就是我們的未來？
「我地應該諗解決辦法，而唔係自己嚇自己。」安叔說。
我是在弄清事實。
「唔係，咁證明左一樣好重要嘅嘢。」我無奈地說。
「係咩？」他們紛紛問我。
「既然有人曾經中過相同的陷阱，而最後又慘死嘅話，就證明左一切『物理』方法都唔會有用，因為佢地一定全部試過。」我語氣肯定地說。
「唔明，咩叫『物理』方法唔可行。」安叔問道。
「即係導致呢間墓室上下反轉嘅可能原因只有一個……」我嘗試引導。
「嗰味嘢……」Ocean聽懂了。
剛才翻找背包的時候，我留意到地上壞掉的工具和儀器，相信是盜墓賊嘗試破壞機關而使用的。
「根本無稽，世界上邊有可能有鬼。」安叔擺了下手，表示不相信。
「係時候面對現實啦，連特朗普都做到總統啦，呢個世界仲有咩冇可能。」Ocean諷刺地說。
我們不願意相信的，往往就是現實，殘酷和可笑現實。
「咁我地點算，同鬼先生談判？」不知為何，我覺得小儀的問題很幽默。
「會唔會係上面乾屍嘅怨靈搞鬼？」Ocean問道。
「應該唔會，因為我地係拆左粒夜明珠，先會中伏。」我仔細組織之前發生的事情。
我留意到John偷偷看了這邊一眼，似乎一直在聽我們的對話。地上的夜明珠依然淡淡生光，卻沒人想理會。
「即係……呢個棺材嘅主人？」Ocean面色青白。
「我始終都係半信半疑，不過呢種時候的確唔可以排除一切可能性，咁你有咩建議？」安叔問。
「物歸原主，試下擺翻落個棺材上面，或者佢會原諒我地。」我發覺自己說話越來越荒誕。可是，從我們墮入地底開始，便沒有遇見什麼合理的事情。
「我地點可以爬上咁高，頭先爬到出口已經係極限。」Ocean說道：「而家阿叔受左傷，應該更加冇可能。」
「的確……」我無奈地說。
「所以應該點？」眾人毫無頭緒。
現在可以做的，就是休息一會，再想想辦法。
「我都唔知，唯有俾大家休息下，我地一路過嚟都冇乜停過。」
其他人一直不說，身心卻都是累得要命。
「簡直無法相信……」說著說著，安叔從口袋裡拿出打火機和煙包：「你唔介意嗎？你喺我隔離……我又唔方便行開。」
「我冇所謂，以前老豆同阿姨都有食……」我說道。
「以前？」
「係，我老豆戒左，三姨就過左身。」
「噢，唔好意思。」
「唔緊要，畢竟人總需要減下壓力。」
我躺在一邊，漸漸閉合雙眼。
五小時後。
這五小時，睡得渾渾噩噩，以往總是舒服地躺在軟床上，現在卻是又硬又髒的「石地」。我用鐵鏟借力站起身子，發現Ocean和小儀互相擁抱，睡得甘甜。安叔在旁邊呼呼喝睡，不時發開口夢，看來也是睡得不錯。John卻是一直都沒有睡覺，大概是沒有心情吧。
我環顧四周，卻頓時察覺「墓頂」的異樣……
四個身體倒轉的人，三男一女，正從入口進去墓室。除了其中一個以外，他們都是穿上考古隊的制服。那個沒穿上衣的男人腰部被包紮，好像腹部受過刀傷。
「救命呀！下面呀！唔係，上面呀！有人呀！」我叫喊道。
其他人紛紛被吵醒，發現「墓頂」的生還者。說實在，突然看到有人倒轉在天花上移動，違反地深吸力，是詭異得很的事情。然而，真正詭異的，是我們才對吧。
「呢度呀！！副隊長！Mark！阿銘！Thaila！」即使John如何大叫，他們依然無動於衷。或許，是根本聽不見？
阿銘這個名字，非常耳熟，好像在哪裡聽過。
「救命呀！陷阱呀！天花呀！」Ocean也大叫。
「唔好唔理我地呀！」安叔也顯得激動。
無奈地，即使眾人如何叫囂，「墓頂」的考古隊隊員都無法聽見。
「嘩！呢度咁多乾屍嘅？」那個女的被嚇一跳。
「唔慌好嘢，盡快離開啦。」領頭的男人說道。
「係呀，副隊長，此地不宜久留。」戴眼鏡的男人說：「阿銘你可以？你好似唔係太得……」
「我仲頂得住，繼續走啦。」那個阿銘強忍腹部痛楚，緩緩跟上大隊。
他們繞過乾屍和棺材，步出墓室，墓室再次回到寧靜。
「啊！」Ocean一腳踢到牆上：「大好機會，就咁無左！」
「隻鬼先冇咁容易放過我地……」John無奈說道。
「一切都係你嘅錯呀！出咩聲呀？」John聽此立刻閉嘴。
「已經差唔多六個鐘啦，我地要做D嘢，唔係只有死路一條。」小儀擔憂地說。
「塔隆你最好諗個辦法，如果唔係我就直接殺左條粉腸佢。條友擺明係鬼怪啦！一直害緊我地。」Ocean指著角落的John，他立刻頓了頓。
「唔可以，根本唔關呢樣事！」安叔說。
眾人的情緒開始不穩，開始在互相怪責。
然而剛才發生的事情，讓我有了答案。
「各位，我已經有左注意。」我走到墓室中央。
「已經有？你冇把握唔好亂吹。」Ocean質疑道。
John的事情打擊了我和Ocean之間的信任……
「係，有充分把握。」我語氣肯定。
我撿起地上的酒樽，神色凝重地說：「大家有冇睇過1408？」