自掘墳墓: 哈哈
我右腳帶傷，所以外國人拉開木門後就讓我先進去，他以電筒照一照隧道確認安全後才尾隨我進入房間。關上門後，他就示意我放下戒備。
「出面好靜，應該冇嘢喺附近，留喺度暫時安全。」接著外國人來到一邊拿了兩樽礦泉水，把其中一支遞給我，然後自己大口大口地喝著。
我並沒有喝水，而是打量著工具房的環境。這裡面積非常小，四周都是放滿東西的工具架。我開啟手機燈光，發現工具房除了有錘子、螺絲批、鋼絲鉗、割刀等日常工具外，還有繩索、電鑽、探測儀器、對講機等物件。外國人旁邊的櫃子則放著一些乾糧、樽裝水和急救用品。
「哦，哈哈，你可以隨便攞呢度嘅工具，旁下身都好。雖然係打不死，但至少可以拖延下時間。」大概是察覺到我四周觀察，外國人開口說道。
我非常清楚他說的「打不死」是指我剛遇見的怪物。既然說得出這句話，那就證明他一定見過怪物，甚至知道那是什麼回事。
「咁究竟隻怪物係咩嚟？點解會不斷攻擊我地同殺人？呢度係咩地方？你地又係咩人？我地點樣先可以出到去？」
我把心中所有疑問一舉提出。
面對我咄咄逼人的態度，外國人則是維持著那副從容不迫的樣子。他喝了一口水，然後笑著說：「哈哈，年輕人好奇心果然重，不過都係好事。」
「你根本無答我嘅問題。」我早已失去耐心，表現得有點憤怒。本來幫助Ocean搬完東西後我們三人就會前往旺角吃放題 ，現在他們生死未卜，而我則是身負重傷，剛才還差點被怪物殺死。
「哈哈，唔洗急，我一定會解釋清楚，我地有大把時間。」他的語氣輕鬆得詭異，尤其是說話前總會哈笑兩聲。
「頭先見面唔記得介紹自己添，我叫Gaston Benoit，來至法國，喺香港做professor研究中國歷史。」
面對他突如其來的自我介紹，我顯得有點愕然。
「哦……Bonjour（你好），我叫阿隆。」
「哈哈，咁咪幾好，你唔冷靜又點聽我講呢？阿隆。」
原來他是想讓我先平復心情。
「哈哈，原來你都識法文？真係好。Tu es quel âge （你幾多歲）？」Gaston 回到那熱情開朗的樣子。
「二十一歲。我以前學過少少法文，打個招呼就勉強可以，交流就唔太得啦。Gaston，你可唔可以話俾我知呢度發生乜嘢事呢？」
「哈哈，當然可以。不過你飲啖水同搵件武器旁身先啦。」Gaston慢條斯理：「你好嬲，所以不斷質問我。但就係你嘅怒火，令你將一切都聽唔入耳，咁有咩用呢？哈哈。」
十分玄妙的說話。
「希望你明白啦。我同你都係受害者，唔保持冷靜理性嘅話，大家都好可能會死。」接著他又喝了一口水。
「我明白。」我對Gaston敏銳的觀察力感到佩服，沒想到跟他見面不足五分鐘，他就能看穿我的內心情緒。的確，我這樣激動和焦躁是無補於事的。
我喝過一口清水後才發覺自己是多麼口渴。隧道本來就非常局熱，不久前又吃力地跑著，身體早已缺乏水分。我喝完半支水後就走到工具架前挑選武器。我記得Gaston用的是匕首，可我才不會拿近身武器跟敵人肉搏。我環視工具房，終於在房間角落找到心儀的武器。
「鐵鏟？」Gaston訝異地看著我手上的武器。
其實我選擇鐵鏟的原因有兩個：一是可以在較遠距離壓制對方；二是可以當拐杖使用，倘若跌倒亦可以借力起身。
「啊係，你攞多支電筒，地底嘅發電機已經壞左，要用電筒照明。」
「發電機？其實呢度係咪有咩工程進行緊？」
「哈哈，當然唔係你想像中咁簡單。記唔記得我話我專門研究乜野？」
「中國歷史。」
「係。不過正確嚟講，我嘅研究範疇主要係中國嘅千年古墓，以前出過幾篇論文。今次政府邀請我嚟到呢度，就係做考古工作。」
我實在不解，Gaston這樣說，那不就代表著……
「哈哈。冇錯，香港天水圍恒和邨嘅地底裡面，有一座陵墓。而根據三個月嘅觀察，包括我地掘出嚟嘅陶瓷片、古鼎、石刀、棺木、禮器、青銅器皿等文物，我地考古隊初步斷定呢座古墓係漢朝建成嘅，墓穴嘅主人好可能係某位漢朝天子。只不過考古隊最近搜索到其他線索，呢座王陵有機會係比較近嘅朝代，例如明朝、宋朝。我地本來好快就可以去到主墓知道答案，但琴日領頭嘅考古隊成員探索一間墓室嘅時候，遇到『守墓人』，而唔小心驚動左佢……」
Gaston說到這裡頓了一頓：
「之後就係全軍覆沒，血流成河，考古隊只有我同幾個人走得甩。你頭先遇到嘅『怪物』應該就係我所講嘅『守墓人』。」
怪物那副恐怖的面容此刻依然歷歷在目，說那是個「人」，實在難以置信。現在總是明白，守墓人是因為考古隊闖入墓地而大開殺戒，剛才升降機前的屍體也是守墓人造成的。倘若不是經常打電動和閱讀恐怖懸疑小說，此刻可能無法接受Gaston的說話。
可我現在更關心另外一個問題：我們如何逃出。
「咁有咩方法可以聯絡到地面或者離開地底？定可以等救援？」我單刀直入，向Gaston詢問最重要的問題。
「哈哈，我頭先喺出面唔係講左咩？」他從沉重的神情回到一副嬉皮笑臉，「冇人可以救到我地。」
「但係……」
Gaston的態度令我心中不安，明明是絕望的人才會說的話，他卻笑著臉輕然地說。
「應該有方法可以走上地面掛？」
「哈哈，本來就有。」
「本來？」
「哈哈哈，冇錯。」
-----------------------------------------------------------------------------------------------------
Gaston的回憶 （7小時前）
三人正處於隊長室裡靜待救援。
除了Gaston以外，還有古文翻譯Derek和考古隊成員阿銘。
「都等左已經差唔多八個鐘，點解仲冇人救我地？」阿銘開始感到懊惱。
「冇理由咁樣。」Derek也和應阿銘。
九個小時前，考古隊誤觸機關，釋放了守墓人。當時墓室裡只有Gaston和阿銘逃出生天。回到基地後遇上Derek，他們三人決定到隊長室，因為聯絡地面的方法只有一個，就是使用裡面的通訊器。
途中他們看見李隊長的屍體。他身中多刀，死狀恐怖。
通訊器不是一般的電話，只能接通政府內部。平常李隊長就是用這部通訊器匯報探索進展。
「喂？係咪政府人員？我係考古隊嘅Gaston，地底出左意外，好多人死左，請你立刻派救援接走地底嘅生還者。」
Gaston進入隊長室後，二話不說就使用通訊器聯絡政府人員，其他人則是看守門口。
「意外？李隊長呢？」聲音傳來一把成熟的女聲。
「佢……死左……」
「係……請問基地發生咩事？」
「王陵裡面有嘢追殺我地。」
「我唔講太多啦，總之我地要盡快得到救援！」Gaston強調了「救援」二字。
「好……請你地支持多一陣，我地盡快協助你地離開地底，呢段時間唔好擅自行動，免得遇上危險。」
接著就是掛線的聲音。
就這樣，三個人一等就是八個小時。
隊長室內沒有任何食物和水，三人輪流休息和守住門口，期間他們沒有很多說話，只是耐心地等待。
阿銘終於忍不住向兩人說道：「我地等得太耐啦，出面肯定發生左事，而家只可以靠自己。我地一於就試下走出去，去翻通往地面嘅路。」
「我地之前喺嗰度見到嘅嘢，你係咪唔記得左？」Derek想也不想就反對阿銘。
「我當然記得，但我地都唔可以坐以待斃。救援要嚟嘅話就一早嚟左，咁耐都冇嚟肯定係出左事。或者，從最壞嘅角度打算，政府嗰邊可能已經放棄左我地……」
「唔會嘅！好快！只要等多一陣……」
「你唔好呃自己啦，Derek。係時候醒啦。」阿銘斬釘截鐵：「冇人可以救到我地。」
這句說話令其餘兩人都心感不安。
經過無窮無盡的等待、八個小時的不吃不喝，三人早已心力交瘁。
「我知道出去或者會有危險，但係我地根本無得選擇，係逼不得已，要博一博啦。」阿銘露出同情的眼神，好像在說自己明白大家怕死的心情。
「唔得，我堅決反對。你地唔記得隻惡魔點樣手起刀落殺死其他同伴咩？出去就係等於自殺。」Derek盯著門口。李隊長的屍體就在門外不遠。
「留喺度都係自殺。」阿銘隨即反駁。
「Gaston，你話呢？」Derek把問題轉至Gaston。在爭吵的過程中，Gaston一直沒有發表自己的意見。
Gaston沒有說話，而是開啟通訊器想再聯絡地面。
「冇用架，自從嗰次求救之後，就再打唔到上去，而我睇過完全冇壞到，所以我先覺得政府係特登嘅。」阿銘無奈地看著Gaston。
「阿銘，呢度係香港嚟架，政府點會拋棄市民。」Derek駁斥道。
「咁你又點解釋，點解我地等左八個鐘都仲喺度呀？」阿銘的反問令Derek無話可說，可是Derek始終是不敢出去。
「嘟……嘟……嘟……嘟……嘟……嘟……」
過兩分鐘，通訊器的聲音終止，然而沒有傳出任何人聲。
「Gaston，我地要下決定啦。」阿銘焦急地看著Gaston，Derek也不知所措起來。
一段沉默後，Gaston終於說話了。
「阿銘講得啱，出去先有生機。」
「唔係呀嘛，你地真係出去送死？我先唔陪你地，我留喺度！」Derek死命不離開隊長室。
「Derek，我地三個要合作互相照應，咁有更大機會翻上地面，聽我地講一齊出去啦。」阿銘勸道。
「冇可能！我點都相信政府，擅自行動就真係必死無疑。」
阿銘在開口之際，Gaston上前阻止他，並走到Derek面前。