一場公司飯局，我們的命運從此改寫: 第七章：牛昇會議
(第七章：牛昇會議)
「你好，我叫Simon，係瓊華中心牛昇既經理。」眼前一位高高瘦瘦、說話帶磁性的中年男子說。「喺我身邊依位叫Yumi，係我哋餐廳既waitress。」
坐在他身旁的妙齡少女面帶微笑，以水汪汪的眼睛望著我。
我們坐在瓊華中心牛昇的一組靠窗座位。因為現在係落場時間，整間餐廳只有我哋幾個。室內熄左起碼一半既燈，靜得有少少恐怖。
「唔知你有無印象，」Simon說。「當日你蒞臨牛昇，主要就係我哋兩個serve你哋嗰檯既。」
「我記得，好似係我問你啲嘢食到未架嘛？」
「係，」他說。「關於你朋友失蹤既事，因為我哋有啲資料，而我check返個訂檯紀錄，搵到你個電話，所以就約左你出黎傾一傾。」
「好吖，請問係咩資料呢？」
「首先聲明，以下我將要講既嘢，可能會引起閣下不安，所以希望你有個心理準備先。」
「Okay無問題，你講啦。」
Simon吞了吞口水，開始說：
「你可能都知道，我哋牛昇餐廳係有一間總公司，叫做KB株式會社，簡稱Kabu。包括本餐廳，同埋近年流行既涮涮鍋，都係由Kabu從日本引入香港。」
「Kabu係香港公司，但其實頂上老細係一個日本人，叫山本先生。」
「日本當地既牛昇同埋涮涮鍋，重有好多其他食肆，都係由山本先生直接控制既母公司經營，我姑且稱依間母公司做Kabu Japan。」
「Kabu Japan係日本飲食界首屈一指既大企業，規模龐大，擁有自己既禽畜農場、中央屠房同埋食物加工場。」
我聽到這裡，愈來愈覺得奇怪，因為樂仔失蹤既事，似乎同Simon講緊既嘢毫無關係。
但我知道Simon只係啱啱開始講，可能重未帶出重點，所以我決定唔出聲，繼續耐心聽落去。
Simon續道：「Kabu Japan一直喺日本經營得非常好，有望躍升為飲食界既超級龍頭公司。」
「可惜，正當山本先生既事業如日方中之際，Kabu Japan爆出左一單醜聞。」
「約莫兩年前，有日本研究機構對Kabu Japan既牛肉進行化驗，結果相當負面，」
「研究人員發現，牛肉既內部已經開始呈現腐爛，但由於經過獨特既加工處理，外表睇落同正常無異，甚至連食落既口感，都同新鮮牛肉差唔多。」
「我好似記得睇過類似既報導，」我努力回想。「嗰陣報紙有賣過，facebook都好似有人share過，但我唔知原來係同牛昇有關。」
「係，當時香港媒體都有報導過，」他說。「但其實媒體所報導既嘢，根本就唔係事實既真相。」
「Kabu Japan運用左佢哋龐大既影響力，隱藏左嗰次研究既真正化驗結果。所謂肉質腐爛，只不過係用黎應付社會輿論。」
「嗰次研究真正發現到既嘢，比起肉質腐爛，係遠遠嚴重得多，所以Kabu Japan寧願發佈肉質腐爛既消息，都絕對唔可以畀真相曝光。」
此時他露出認真的眼神，輕輕吸了口氣，說：
「其實嗰次實驗，係發現到Kabu Japan既牛肉，竟然含有人類細胞。」
「含有人類細胞？」我心中一遍疑惑。「我唔係好明你想講啲咩，你係想話，佢哋殺左人，然後將人肉混落牛肉度？」
「唔係，」他說。「所謂含有人類細胞，並唔係俱俱牛肉溝埋人肉咁簡單。」
「化驗結果顯示，牛同人兩者既細胞，在Kabu Japan既牛肉之中，能夠完美咁互相融合。」
「換句話講，Kabu Japan既所謂牛肉，根本就唔係普通牛肉，而係屬於當今生物學界從未發現過，一種由牛同人既細胞結合而成既生物。」
「不如我單刀直入啦，」我打斷了Simon的話。
「你係咪想講，Kabu Japan表面係一間飲食公司，其實暗地裡進行生化實驗，企圖用DNA工程之類既嘢，創造一種全新既生物出黎？」
「無錯，正是如此。」他說。
「你有咩證據？」
「證據就係，上述所講既一切，都係我親眼所見，親耳所聞。」
Simon說著從身邊的公文袋拿出一疊相片，放在檯上。
「依度就係Kabu Japan既集合式農場，」他逐張照片解說。「而依棟建築物內部，就係Kabu Japan既中央屠宰場。」
「接住落黎依張相，你可能會覺得好恐怖，所以希望你有心理準備。」
看到Simon神色凝重，似乎唔係講笑，不其然令我緊張起來。我定了定神，向他點頭示意okay。
「依一張相，就係我所講既合成生物。」
此時我看到Simon手中的相片，禁不住倒抽了一口氣。
這是什麼！？
照片中央是一頭生物，從形狀看來，明顯是一頭牛。
這一頭「牛」，有著正常的軀幹和四肢。如果你從「牠」的後腿開始看，可以看到正常的蹄部和尾巴，然後向前移，是正常的前腿和脖子。
可是，當你再向前望，便是令人毛骨悚然的影像。
這頭「牛」的脖子所連接著的，並非一般的牛頭，而是一個人頭！
說是人頭，其實有點誇張，因為這個頭部沒有人類的頭髮，耳朵亦是一雙牛耳，但從臉部看來，卻明顯擁有人類五官的輪廓。
「你見到既依種生物，擁有人類既頭部、牛隻既身軀，」他說。「依種生物有一個暫稱，叫做mancow，係用牛隻作為藍本，再注入人類基因改造而成。」
我感到既驚訝又奇怪：無幾耐之前，我見到W商人手中既筆形麻醉槍，以為自己睇緊《占士邦零零七》，咁依家我又似係睇緊邊齣戲呢……會唔會係法國電影《人工進化》？
「依隻嘢，係咪淨係得相？」我問。「你有無拍埋片？」
「無，」他說。「我係千辛萬苦先影到依張相，其實嗰次差啲連影相既機會都無，更何況係拍片。」
我心中半信半疑：片又無拍，淨係得張咁既相，到底可信程度有幾高呢？
「關於Kabu Japan既實驗，或者我暫時講到依度先，」他說。「接住落黎，我會講返你關心既嘢，亦即係你朋友失蹤既事。」
「其實類似你朋友咁樣神秘失蹤既事件，並唔係第一次發生。」
「之前喺日本，都發生過幾單極為類似既個案，而且地點全部都係Kabu Japan旗下餐廳附近既場所。」
「咁即係點？」我說。「你係想話……其實我朋友係畀人捉左？」
「唔知，現階段重未有明確答案。」
「咁你估計呢？」我說。「你既然將我朋友單嘢同Kabu Japan扯上關係，即係話……你懷疑我朋友……畀Kabu Japan捉左去做實驗？」
「關於依一點，我無從揣測，」他說。「但從各種證據睇黎，你朋友既失蹤，都幾肯定係同Kabu有關。」
我心中不禁涼了一下。雖然我跟樂仔說不上是什麼好朋友，但如果佢變成相片中既嗰隻嘢咁……我真係覺得好恐怖……
「不過我個人認為，包括你朋友在內既失蹤人士，畀Kabu Japan捉左去做實驗既可能性其實唔高。」Simon續道。
「好簡單，假設你想捉人，會唔會次次都喺自己地頭附近捉人咁戇鳩？」
「再講，以Kabu Japan既能力，要搵到活人去做實驗，其實唔難，根本無需要特登去捉人。」
我認同Simon的想法。
「其實我同你講咁多嘢，個concern唔單止在於失左蹤既人，亦都在於未失蹤既人，即係同閣下都有關係。」他說。
「因為根據我哋既資料，喺失蹤者消失之後既一段時間內，佢身邊既人，唔知點解都會逐一遇害。」
「依啲人既死因各異，但絕少係自然死亡，死因好多都係他殺。」
我聽到這裡，全然摸不著頭腦：究竟一個人失左蹤，點可能會影響到佢身邊既人逐一被殺？
「你係想講，失蹤者身邊既人會畀人尋仇，所以逐一被殺？」我問。
「我都唔肯定，但睇返資料，就唔似係。」他說。「因為喺相關既謀殺案當中，殺人者既身份都好廣泛，包括死者既男女朋友、親戚、同事、鄰居，甚至連碰巧路過既薄餅速遞員都有。」
「我諗你都覺得好奇怪，有人失左蹤，同佢身邊既人被殺有咩關係？」他續道。「但請你相信我，因為根據我哋既統計，依個pattern係千真萬確，喺我哋調查過既咁多個案入面，全部都有發生過。」
此刻我的思緒萬分混亂，在千頭萬緒之中，我忽然想到Michelle，她不正是最近被男朋友殺死嗎？
「你講調查……而且你擁有咁多資料，睇黎你都唔係一個普通既餐廳經理咁簡單……」我說。「咁你既真正身份到底係咩人？」
「我哋今日同你會面，主要係講返Kabu Japan同埋mancow既嘢，重有失蹤者身邊既人會逐一遇害既事。」Simon說。
「至於我同Yumi既真正身份，恕我哋暫時不便透露，因為我哋有更重要既事情要處理，請你諒解。」
「事實上，今日同你既會面，係完全超出左我哋原本既計劃。」
「無論如何，今日同你講既嘢，希望你可以保密，唔好同其他人講。但你最好自己小心啲，因為我頭先講過既pattern，之前每單case都發生過，從來未試過有例外。」
(第七章完)