請好好愛惜你的豬朋狗友

自從踏入社會大學，開始為生活而每日拚博，逐漸將生活變成工作。呢段日子，每個人難免都會懷勉一下過去。觀塘，呢個地方算係陪伴住我半個童年，因為本身住藍田，讀書自然又喺藍田，以前放學有乜消遣？細個就話仆去德田玩四驅車同Gameboy，到長大小小就梗係落觀塘，以前觀塘無APM，人流亦無現在咁熙來攘往，但係成班同學玩埋一齊，為節省少少車錢行路落觀塘網吧嘅日子，真係好開心。今日，因為其中一個同學嘅母親患重病，成班舊同學先有機會聚埋一齊，睇吓有乜幫到手。




無錯，我相信每個舊同學應約之前心裡都有個數，表面就話「幫手」，但係大家都唔係醫生，又點幫手丫？講到尾咪又係錢。不過，人到某一個年歲，就會想見番舊時中學識嘅朋友，大家聚埋一齊，可以懷念吓以前無休無慮嘅日子，又可以俾某部分人自吹自擂，展示自己人生變得有幾燦爛。呢類場合，如果唔係有我幾個最好朋友在場，我一定唔會出席。可能係我幼稚，眼見個個都變晒，唔單止個樣變得成熟、發福、皺紋貼滿面。就連思想都變得無咁樂天，大家表面就話聚舊，但我睇得出每個人都不斷找機會展示俾人睇，自己已經變得成熟，已經唔係以前幼稚嘅自己，唔知點解，我覺得咁樣做好嘔心...










到底變得成熟，係咪真係值得自吹自擂嘅事？












衰小小講句，全靠呢位舊同學嘅母親，成班舊時嘅玩伴先有機會聚埋一齊。今日我地去APM HIPOT打邊爐，成餐飯嘅味道同價錢都唔係重點，大家一開始都好關心伯母情況，朋友阿達話機會一半半，但真係急住要錢做手術，住院費醫藥費每日都燒緊錢，阿達已經去到借無可借嘅地步。以前放學上阿達屋企打機，伯母對我地都好友善，閑時又會煎雞翼炸薯條招呼我地。所以我地一句聲都無出，幫得幾多得幾多。回想起以前，Online Game成班一齊玩，朋友想買裝備又唔夠錢，每個都即時扮窮，死都唔肯借錢俾大家，為咗一堆虛擬數字都可以吵吵鬧鬧，可能呢Ｄ就係幼稚。




唔開心嘅事好快完結話題，大家開始例牌講吓近況，吹噓自己份工作，但又死唔肯透露人工，自己再暗地裡同其他人比較，討論完一大輪，好似知道咗好多嘢，但結果又好似無乜得著咁。突然有人講開觀塘，大家都有個同感，「面目全非」。我工作關係，每日番屋企都要經過觀塘，由幾年前開始，唔知搞乜城市發展，成個觀塘嘅舊商舖執吓一間，執吓又一間。銀都戲院細細個我記得同屋企人睇周星馳《西遊記：月光寶盒》，第一次睇電影有分上、下集，以為係呃錢招數，點知長大後先知係經典！仲有行過對面巴士總站條小巷，以前放學成日去食嘅牛腩河，閑時都有去幫襯，點知突然間先知道搬咗。而家觀塘可以俾到回憶我嘅，就只有地鐵站對出，開咗差不多有廿年嘅麥當勞。以前雖然成條裕民坊都係餐廳小食，但係學生時期，最鍾情始終都係麥當勞叔叔。以前就算放假出觀塘，諗住搵吓有乜好食，一邊傾計一邊由街頭行到街尾，最後結論都只會係「超，不如都係食番老麥！」。











我唔知道觀塘會發展成咩樣貌，但係，呢個已經唔係我認識嘅觀塘。














餐飯一直食到大家都DEAD AIR，今次飯局搞手就係阿達，佢需要幫手又自己開到聲，呢份唔要面嘅勇氣大家都感受到，所以都好俾面出席。埋單時個個你推我讓，「下次先再夾翻啦～」「下次你請我啦。」我心諗，乜真係有下次咩？下次要等到幾時，又或者邊個家人出事先有機會咁齊人。最後大家都一致決定請阿達食餐飯，當係預祝伯母可以平安無事。最後成班聚集喺HIPOT對出書店前，互相留低聯絡電話同埋再一次祝福阿達。我即場都入咗差不多七、八個電話，十幾個FACEBOOK，但係我相信除左FACEBOOK提示有人生日，會留句「生日快樂」之外，無乜事都唔會再搵大家。又或者到我一年後換電話，例牌有一堆號碼都唔會入落新電話度，而呢班舊同學，就係「嗰一堆號碼」。




當大家一齊漫步離開APM進入地鐵站口，我話，食飽飯又唔趕時間，不如周圍行吓丫。當時我望見大家嘅眼神，每個人都歸心似箭咁望住個地鐵入閳機，好多同學都搬咗出黎自己住，或者屋企換咗樓，得翻阿達仲住緊秀茂坪，其他人又話夜又話凍，觀塘而家又無野行，所以最後係決定散場。我同阿達由地鐵站行落去搭小巴嘅途中，全程都無講過一句說話，氣氛好尷尬。係幾時開始嘅事？一個好朋友企埋身邊，竟然會覺得尷尬，會驚DEAD AIR？以前放學，成班朋友無野做又唔想咁早番屋企，由藍田行到觀塘地鐵站轉入觀塘廣場，睇吓老翻25蚊一隻嘅GAME BOY帶，上頂樓借幾本漫畫，偷偷地經過咸碟舖望幾眼，就算大家無話題，都唔會有尷尬嘅感覺，當時覺得有朋友企埋一齊，就算每一日放學睇同一樣嘅野，都係咁開心。







朋友唔需要有講不完嘅話題，最緊要係個感覺...















送完阿達去搭車，我自己一個人周圍行咗陣，每間舖都貼住「城市發展局」。觀塘變得唔再熱鬧，周圍都變得黯然失色，呢種黯淡，唔係用一、兩個大商場就可以解決到，細細個觀塘小巴站經歷過一次大火，幾間連住一齊嘅五金舖一齊燒，成個小巴站燒到黑晒，幾乎成個月都仲聞到一大陣燒焦味，入面有幾隻焦黑色嘅死貓無人肯執走佢。當時因為被警方封鎖，有好多店舖都做唔到生意，但係我知道當時一定會恢復過黎。但係今時今日，一句「城市發展」，就將整個觀塘都燒乾燒淨。以前推車仔小販一到夜晚就周街都係，銀都戲院塞滿晒睇完戲或者準備入場睇戲嘅人，以前銀都有午夜場，成個觀塘即使去到凌晨都充滿住生氣。我將來都會搬走，我真係唔知第時番黎觀塘，呢度會變成點樣。











行咗一陣就搭車番屋企，番到屋企個腦仲係不停咁懷念緊以前。我特登搵番收埋咗好多年嘅一堆老翻電腦Game，以前電腦仲未普及化，Online game根本仲未出現。有時候有新game出，朋友們都會夾錢買隻老翻，然後上我屋企度玩，我無聊地裝咗一隻叫《上帝也抓狂》嘅遊戲，呢隻係我花最多時間用心機去爆機嘅遊戲。估唔到以前覺得遊戲性咁強嘅遊戲只係得200mb左右，以前成班圍住部電腦，指揮同提醒邊度俾敵人攻擊，再諗方法去過關。十幾年後再玩番，又係另外一回事。我玩唔夠半個鐘就刪咗，始終都搵唔番以前玩嗰種味道，有朋友喺身邊，乜野都會覺得好玩Ｄ，開心Ｄ。呢一刻，我真係諗唔通，究竟真正朋友嘅作用，係咪有事先會出現幫手？除咗今次阿達母親有事，上次肥華搬屋、傻仔鋒結婚、計埋阿豬阿狗生日慶祝。無錯～成日聽人講，出到黎工作，根本無可能搵到真朋友，我嘅成班朋友們都好講義氣，每次一有事就會出現，但係只限於「有事」，平時想約出黎食個飯聚下舊，真係難個登天，呢個話要陪老婆，另一個又話工作忙...





雖然佢地仲係我嘅好朋友，但係我就失去咗，一班以前無無聊聊，一齊浪費青春周圍hea嘅好朋友。每當有事，大家就會出現，但係當事情完結咗之後呢？大家又急急腳咁走番去自己嘅生活圈子...以前我嘅生活就係同成班朋友一齊，而家每個人都有各自嘅生活，我諗呢個就係我同阿達行埋一齊，會覺得尷尬嘅原因。


可能大家都老喇，大家都變得成熟，唔願意再為其他人去浪費時間。估唔到今時今日，我身邊連一個想食飽飯無野做，周圍行一圈嘅無聊朋友都冇埋...











原來有時候，你最需要嘅朋友，唔係肯為咗你出錢出力，每次有事都出手相助嘅人，

而係一個肯陪你浪費時間，無無聊聊hea嘅朋友...


各位，請珍惜你地身邊嘅豬朋狗友...