《癲　才　殺　局》 兩個天才，玩命鬥智！: 《傳瞬凶間》出書了!! 另加絕密肉麻感想...

《傳瞬凶間》出書了，明天上架！

大約兩年前，我同一班朋友出黎飲野吹水，已經唔記得當時大家傾緊咩話題，我講起：「近排我諗到一個故事大綱，想試下寫出黎，然後放上網．．．」

勢估唔到，我果句「然後放上網」都未講完，其中一個朋友就衝口而出：「算鳩數啦你！哈哈哈哈哈．．．」
其餘幾位朋友聽到，亦都笑埋一份，成個場面搞到我鬼死咁懢尬，我唯有打完場咁應佢：「屌你，咁鬼老死都笑鳩我，哈哈哈哈．．．」

認識左果位朋友咁多年，我知道佢並無惡意，佢之所以咁講，可能係因為佢睇唔起網上寫作，又或者，佢唔明白點解要花咁多時間寫個故仔出黎免費俾人睇，又或者，純粹只係出於老朋友之間既戲言。

不過，依一句戲言，事後就不斷係我腦海浮現。





「算鳩數啦你！」

正因為佢依番說話，我問自己究竟我有幾大決心，去寫完一個故事？
假如到時一個讀者都冇，咁我寫黎又為左咩呢？
最重要既係，明明用黎寫故仔既時間，我係可以好好利用黎做其他事，宜家我不計回報地去寫一個故仔，對我黎講又有咩好處？

唔甘心，但掙扎，再唔甘心，再掙扎．．．

最後，我將「想寫故仔」依個諗法講左俾我老婆知。




須知道，要你老婆明白同埋接受你將自己既空餘時間投放係一件無回報既事情上面，絕對唔容易，但係我好好彩，因為我老婆就係一個異數。

我永遠唔會忘記，當佢聽到成個故事大綱之後，果一副雀躍既表情。
佢一句「條橋掂呀！」，為我打左一支強心針。

一個娶得過既女人，除左肯陪你捱麥記，仲會支持你去做你認為有意義既事。

全靠佢既鼓勵，我終於「的起心肝」開始左網上寫作 (所以《傳瞬凶間》既出現，有一半既功勞係屬於我老婆)。

由《傳瞬凶間》開始，到宜家連載緊既《癲才殺局》，雖然成個系列已經設計好一個大方向，但究竟有幾多人買，之後仲有冇幾會出書，一切一切都唔輪到我控制，不過能夠行到黎依一步，其實我已經好滿足，因為我證明左，我並唔係一個輕易「算鳩數」既人，而我亦有一個好老婆。





最後最後， 當然仲要多謝咁多位讀者，o拿，你笑鳩我肉麻我都要係度講架喇，事關我就只有係網上面先敢講出口，就係：

你地一字一句既支持，我都會銘記於心，無言感激，愛死你地呀！！！