是咁的，我嘅職業係動物傳心師: 結局︰在彩虹橋再見

至於mk店長點解會變成咁，我都係過多幾日先從miki口中得知，佢睇腦科之後發現腦入面有小部分細胞同組織壞死咗。我都估唔到強制將能力共享畀另一個人，原來會有咁嚴重嘅後果。聽講有機會醫得返，我先無咁內疚。
解決依件事之後，我嘅身體狀況已經差到無辦法接客，而且就算完全唔用傳心能力，都會突然暈低，終於好似一個真正嘅病人咁成日喺醫院進進出出。

隨住入院嘅次數開始增加，我開始發現自己落病床之後對腳好難用力，而且全身都好攰。

原來當體力下降到一個點，瞓、坐、企呢啲基本動作都變得唔再必然。無辦法之下，老豆幫我租咗一張輪椅，我就咁被佢兩老推出醫院。

臨走前，巴膠叮囑我如果再入多次院，佢就唔會再畀我出院。

老豆叫咗架傷殘專用的士搭返屋企，我咁大個仔都係第一次坐住輪椅咁上的士，不過我太攰，好快就瞓著咗。





到我瞓醒已經返到屋企，佢哋問我想食咩，其實我無咩胃口，但都想食餐蛋飯，不過屋企無晒午餐肉罐頭，要阿媽落街買。

我一路等自己嘅最後晚餐，腦入面仍然仲係毒貓犯嘅事，但問題係我已經無晒體力同心力再去搵兇手出嚟。

人生就係咁，總係充滿遺憾。

唔係話你仲有嘢未做，死亡就會對你寬容。要講的話，我嘅遺憾就係無辦法親手捉到個毒貓犯。

但同時我又已經無遺憾，因為我已經放低咗前度。





我合埋眼，聽到阿媽開心入嚟。佢同老豆行到我身邊，手放喺我頭上。

靜靜……靜靜咁沉入黑色嘅海。

黑色嘅海漸漸現出一道彩虹。

喵。

餐肉。





「好耐無見喇。我好掛住你。」

（網絡結局完）

毒貓案事件將會於實體書中的新結局解決，感謝各位讀者的支持。

購買電子書︰https://play.google.com/store/books/author?id=%E5%81%9A%E9%87%91%E5%BA%B8%E7%9A%84%E7%94%B7%E4%BA%BA

購買實體書︰https://www.enrichculture.com/products/9789887826514

電子書及實體書含真實結局