是咁的，我嘅職業係動物傳心師: 143.五成機會

雖然平時啲人已經話我個樣睇落比較老積，但依家應該係再老多十年嘅版本。

每一晚阿媽同老豆都早咗放工返嚟陪我，仲要每餐晚飯都係我鍾意食嘅嘢，即使我嘅食慾大減，仍然可以食到唔少嘢：

餐蛋飯、壽司、焗豬扒飯、烤雞、pizza、冬蔭公、打邊爐、刺身、雞煲、煎牛排、炸饅頭、流沙包、車仔麵、拉麵、餃子、飯糰、肉醬意粉、漢堡包、大閘蟹、魚生飯、皮蛋瘦肉粥、譚仔、干炒牛河、蝦醬炒飯、生菜包、生牛肉河粉⋯⋯真係日日唔同款，無一日重複，可能因為知我唔食得幾耐，所以盡量滿足我啩？

其實有時我會諗，唔使買或者整咁好嘅晚餐畀我，反正一到半夜我有五成機會會嘔返晒出嚟，但我又唔想潑老豆阿媽冷水，所以最後都無講。

我開始習慣出街自備嘔吐袋，此外我一定會帶陳皮、酸梅依啲咸濕嘢嗒嗒下，以防自己突然想嘔，呀，仲有香口膠。





近日阿媽亦多咗祈禱，連向來唔太信神嘅老豆都一齊對住聖母像跪低。我問話佢哋祈咩內容，心諗個病點都無可能好得返，佢哋就話主要係祈求上帝保佑我夜晚瞓得好，唔會半夜起身嘔。

向來主張無神論嘅我忍唔住笑佢哋祈禱都無用，阿媽就話佢唔幫我祈禱的話，我嘔嘅機率會變百分百，唔係家下咁好五十五十。

雖然病情無好轉過，但所幸亦無嚴重惡化，所以我仍然拖住沉重嘅身體每日喺中西區內唔同地方流連，希望可以搵到新線索捉嗰個毒貓犯出嚟。