是咁的，我嘅職業係動物傳心師: 141.最後一支

每當首歌播完，支煙亦燒到盡頭，有時我會被掉落嘅煙灰辣到手指，痛楚令幻想破滅，而喺嗰段時間，記得有一次，我覺得盒煙少咗一支。

當時我雖然覺得奇怪，因為每點一支煙我都會計住，無理由無啦啦少咗支，不過之後都無再唔見煙，而我亦慢慢戒咗依鋪癮，所以就無再擺喺心度。

今日我先知，原來嗰陣係老豆偷偷地拎走咗一支。

我仲以為自己收得好埋，點知都係被佢發現咗我「食煙」。

佢話，依個只係一個小小嘅道別儀式。





「放低唔係刻意唔再諗，而係再諗起都已經無所謂。」

我望住火星蔓延，將煙草化成灰燼，熟悉又久違嘅味道喺鼻腔入面植根。

以前嘅我，聞到依陣味就會開始幻想佢仲喺我身邊，縷縷白煙就好似互相纏繞成一個人形咁，直到灰飛煙滅；但依家，我咩都諗唔到。

老豆都知道我真真正正放低咗，佢將煙㗎喺煙灰缸，經過我身旁，拍兩拍我膊頭。

「老豆咩都唔怕，最怕你到最後都放唔低。依家知你終於諗通，我就安心㗎喇。」佢行出廚房。「我會睇住你阿媽，所以，你都可以安心㗎喇。」





我睇住架喺煙灰缸嘅最後一支煙燃燒到盡頭，聽住廚房外傳嚟收好相簿同埋閂房門嘅聲音。

嗰晚瞓覺嘅時候，我隱約聽到隔籬房斷斷續續嘅喊聲。