是咁的，我嘅職業係動物傳心師: 139.煙味

阿媽摟住我，我亦係嗰一刻先知原來自己喊到好似個小朋友咁。

「殊⋯⋯無事，媽咪喺度。」

喺阿媽嘅角度，大概係以為我因為有病，驚死先喊，但其實我唔係。

「放低咗喇，咁咪好。」

聽完，我喊得更大聲，廿六歲人就好似個細路咁摟實阿媽喊真係好醜，但我今次真係完全忍唔住，因為我感覺到呢一刻嘅心靈相通。





阿媽完全無任何理由會知道我係因為放下而喊，但偏偏佢就係知道，或者依樣就係發叔所講，平凡人嘅傳心術。

我喺阿媽嘅安慰之下慢慢冷靜落嚟，然後聞到熟悉嘅煙味。

老豆依家先點煙，奇怪嘅係啲煙味雖然我好熟，但唔係佢平時食開嗰隻。

我抹乾眼淚，行入廚房，老豆坐喺窗邊，食指同中指夾住支煙，手臂枕喺窗框。