是咁的，我嘅職業係動物傳心師: 137.真心咁諗

每個人一旦面對無辦法扭轉嘅事實，都會習慣改變心態改到懶係正面咁，外面大把金句名言係話就算你改變唔到外在環境，你都可以改變自己思考角度，咩境隨心轉啊之類，但對於我依種執著嘅人而言，所有改變心念嘅說話都係無用嘅廢話，所以我都好驚阿媽同我以前失去女朋友或者餐肉嗰陣一樣，諗住就算一路沉浸喺傷心感覺之中都係改變唔到狀況，於是自欺欺人嚟逃避現實，喺心入面否定悲劇嘅發生，但台上係演緊悲劇的話，任台下嘅觀眾點樣喺心入面扭曲佢嘅意義都好，佢仍然係一套悲劇。

阿媽諗都無諗就答我：「如果我只係面對無辦法改變嘅事實而咁諗去說服自己，就係自我安慰。」佢伸手到我面上，我哋滲出眼淚嘅四目交接：「但我係真心咁諗。」

啊⋯⋯依個大概就係我同阿媽嘅分別。

五年前到依家、三年前到依家，我都一直只係想說服自己接受難以接受嘅結果。

因為餐肉死咗無可能復活，所以我同自己講：「無辦法啦，生老病死係生命必經嘅階段，唔開心佢都唔會返嚟㗎啦，所以開心啲啦。」





因為前度走咗就無返過嚟，所以我同自己講：「正面啲睇，自己一個用少好多錢，又少好多責任。舊嘅唔去新嘅點嚟呢？傷心佢都唔會返嚟㗎啦，所以放下啦。」

然後我發現無論我點樣諗，點樣改變心態都好，始終都係放唔低。

其實依家阿媽知我就無命，同我五年前面對嘅生離、三年前嘅死別都係一樣，人嘅一生一定會經歷重要嘅人離開，而點樣放下亦係又難又痛苦嘅學習過程。

如果面對失去，你可以無任何留戀即刻放低晒所有嘢，咁代表你從來無真正重視嘅人同事物。

而喺我阿媽嘅諗法入面，著重嘅根本唔係點樣接受分離嘅現實，亦唔係說服自己去樂觀接受我有絕症嘅事實，並唔係無可奈何下嘅自欺欺人，因為佢嘅著眼點，由一開始就係生我出嚟之後，直到今日為止嘅過程。