是咁的，我嘅職業係動物傳心師: 101.絕望盡頭

「喵咪⋯⋯我真係⋯⋯真係好掛住你⋯⋯你⋯⋯喺⋯⋯邊度？」

我嘅姿勢由踎低變成跪低，雙膝化成白煙。

我想將細貓抱住，但雙手一接觸到佢又再次變成白煙。

我抱住自己個頭，乞求自己嘅大腦停止運轉，但腦中心嘅熾熱並無停止，繼續無情咁將我嘅意識留喺過去。

我諗就算將個頭塞入冰水，最多都只係凍傷頭皮，但無辦法幫腦中心降溫。





細貓嘅呼吸慢慢變弱，身體嘅起伏亦變得難以觀察。

「喵咪⋯⋯喵咪⋯⋯喵咪⋯⋯」佢嘅雙眼變得無神混濁，擘大口想扯多啲氧氣入肺。

絕望到盡頭，殘酷無情嘅現實。

唔通真係連少少最後嘅救贖都唔會有？

大腦已經熱到臨界點，我幾乎以為個腦會燒熟咁滯。





突然，一隻貓喺我體內穿出，跳落地面，行到細貓身邊，舐細貓嘅頭。隻貓條脷，每當接觸細貓，就化成白煙。

「喵⋯⋯⋯⋯咪⋯⋯⋯⋯」有一瞬間，細貓嘅雙眼有翻神采，轉瞬即逝嘅迴光返照。

「乖⋯唔使驚，喵咪喺度。」

我跪喺原地，睇住依一幕，分唔清楚到底係我個腦創造出嚟，抑或當日細貓死之前，佢媽媽嘅靈魂真係出現喺佢面前，但係依家咩都唔重要喇，重要嘅係，細貓喺絕望嘅盡頭，得到少少慰藉。
細貓滿足咁合埋眼，斷氣。

一團貓形霧喺細貓體內穿出，兩隻貓挨埋一齊，互相舐對方；更遠處，仲有五隻由霧氣組成嘅貓影，向佢哋喵喵叫。細貓同佢媽媽一步步向遠方邁進、消失。