是咁的，我嘅職業係動物傳心師: 62.肥榮叔

「哇，咩風吹我哋嘅金大爺返嚟呀？你做傳心神棍唔係搵唔少咩？」幫大家recall返少少memory，當年我辭職就係因為依位個樣好似阿雪嘅肥榮叔──留意返，係林雪。

「唔係有嘢查我都唔會返嚟，我問你，近排有無印象係荷李活道公園附近捉過貓？」

肥榮叔蔑嘴蔑舌，用尾指挖耳仔：「你當自己差人咩家陣？你問我就要答呀？」

「死肥佬你想點呀？」

「你估我仲十八廿二咩？老喇，邊有咁好記性吖。」佢遞個文件夾過嚟，我將一百蚊攝入去，畀返佢。





肥榮叔見到，「嘖」一聲：「有啲印象嘅，但年中喺嗰邊捉咁多貓貓狗狗鬼記得咁多咩。」

佢遞返個文件夾過嚟：「有無相呀？相～呀？無相點知呀？」見佢係咁強調個「相」字，我唯有攝張五百蚊入去。

「哎呀，突然間好深印象喎，嗰隻咩吖嘛？貓嚟嘅，事關有人報料過嚟話嗰度有貓生咗，咁咪派人捉佢返嚟絕育咯。」直到依度都可以同細貓講嘅嘢對得上，佢話媽咪被人類帶走咗，之後放返。

「係，就係依隻。但佢之後又唔見咗，發生咩事？」

肥榮叔又隊個文件夾埋嚟。





我火都嚟埋：「死肥榮知道乜好講晒出嚟呀！」

肥榮叔被我揪住衫領，眼眉一高一低，成個挑機樣。