是咁的，我嘅職業係動物傳心師: 49.我嘅幸福

我另一把聲同自己講，係咁㗎啦，唔通搞掂咗仲帶你返屋企呀？女神叫隻兵畀完飯錢，唔通就同佢結婚生仔咩？

我雖然有超能力，但講到底都只係一件會行會走、解決問題嘅人形工具，邊個會上完螺絲，拎埋個螺絲批一齊食飯？人只會搵同自己有關係嘅家人、朋友、戀人共享溫暖。

只要我失去超能力，唔再係傳心師，就無人再需要我；就好似一個唔再出書寫故嘅作家，亦無讀者需要。

作家搵到即使唔出故都支持自己嘅讀者，就最幸福；動物傳心師擁有一隻無咩問題要解決嘅寵物純粹喺屋企等佢返嚟擁抱嘅話，就係幸福，但餐肉已經唔會再喺屋企等我返去。