是咁的，我嘅職業係動物傳心師: 24.淚，是一樣

我知無論我點同佢講，佢有一個好愛佢嘅主人，大B都唔會承認，所以只能由佢自己發現一直喺身邊嘅幸福。

阿麗聽唔明大B嘅語言，反之亦然；對大B嚟講，佢都只係從阿麗嘅行為去了解主人。

阿麗無帶佢去訓練，所以佢知道主人唔明白佢嘅夢想；阿麗幫佢套口罩，對大B嚟講亦只係單純嘅懲罰。

「大B⋯⋯你唔好再亂咬嘢得唔得呀？」雖然大B複述我知，但佢其實唔理解依句人類語言嘅意思。

「你記唔記得，下一句，你主人同你講乜？」





大B嘗試重新講返當日，阿麗為佢套上口罩嗰時講嘅說話：「你咁樣⋯⋯我會好心痛㗎⋯⋯」

我將依句說話嘅意思翻譯畀大B知。

「你講大話！」

「汪！」大B向我吠叫，佢唔願意相信我解釋佢聽嘅意思。「佢套個口罩喺我個嘴度，根本就係罰我！因為佢唔理解我周圍咬嘢係想同佢講我嘅夢想，佢以為我曳所以先要我套口罩！有乜可能心痛！」

「之前佢心痛，係因為你亂咬嘢，一次又一次整傷下顎；依家心痛，係因為知道自己一直唔理解你。」





無論以前定依家，阿麗面對受苦嘅大B，都只有心痛。

大B望向阿麗，但阿麗唔敢抱實大B。

「就算無共通語言，你都應該可以理解主人。」

大B雙眼滲出淚水。「我⋯⋯記起喇⋯⋯」

淚，是一樣的。





「主人嗰陣⋯⋯喺度喊⋯⋯」

大B⋯⋯你唔好再亂咬嘢得唔得呀？你咁樣⋯⋯我會好心痛㗎⋯⋯