是咁的，我嘅職業係動物傳心師: 22.佢根本……咩都唔明白

自己嘅寵物撞車，喺阿麗腦中烙下強烈嘅印象，以至佢將記憶嘅重點放喺意外之上。

如果問兩年前嗰日發生咩事，阿麗只會講大B撞車，但唔會特別記起佢去追賊。事後仲要帶大B去獸醫診所，仲有一連串嘅擔心同忐忑，自然將大B為乜衝出馬路嘅事忘記。

「我唔制⋯⋯」佢嘅語氣，好似接受唔到父母去世嘅遺孤一樣。

唔好忽略我嘅夢想。

我係為咗話畀你聽，我想捉壞人、我想做警犬。我想你知道我個夢想，我先追出去㗎。我要再話畀主人知！我要再搵方法令主人知道我個夢想！





然後，大B就開始周圍亂咬嘢，同時喺撞車之後第一次咬嘢嘅剎那間，發現自己下顎嘅問題。

佢明白到自己已經唔可以追夢，無奈嘅係阿麗仍然唔理解佢嘅夢想。

大B繼續周圍咬嘢，就算再整傷下顎都要咬。

主人⋯⋯我想做警犬⋯⋯就算我已經做唔到⋯⋯我都想你知我個夢想⋯⋯

「大B⋯⋯你唔好再亂咬嘢得唔得呀？」





口罩套喺嘴前。佢根本⋯⋯咩都唔明白。