是咁的，我嘅職業係動物傳心師: 12.腦檢查

記得餐肉死嗰年，我二十三歲，計一計，原來依家已經做咗動物傳心三年，我唔知自己嘅能力幾時會突然消失，不過做得一日得一日啦。

自從有咗超能力之後，我開始時不時會頭痛，直至近排頭痛密咗，於是我去咗搵個喺私家醫院度做嘅醫生朋友幫手，做一個詳細嘅腦掃描。

「個腦掃描嘅結果大約等兩三個星期先出，我到時聯絡返你啦。」巴膠係我大學時期因爲活動而識嘅好朋友，唯一一個知道而且相信我有動物傳心能力嘅朋友。

「你又無嘔無剩，暫時睇嚟應該就普通頭痛嚟㗎啫，咪諗咁多無謂嘢啦你。」

「得啦。」





「我開住啲頭痛藥畀你先，唔痛就唔使食。」

「唔該晒你。」

離開醫院，我就去見今日第一個客人。