是咁的，我嘅職業係動物傳心師: 9.辭職

不過頭幾日我真心好辛苦，事關小弟喺某動物機構入面做嘢，間嘢叫受獲動物協會，一返工，見到籠入面一隻一隻被執返嚟嘅流浪貓狗，一大堆噪音喺腦中炸出嚟：

「好痛」、「媽咪！媽咪！」、「點解主人唔要我⋯⋯」、「我以後會乖，你返嚟未？」、「好唔舒服」、「我唔想死呀、「我想死呀」、「好肚餓⋯⋯」、「好凍呀」、「好臭呀」、「唔開心」、「點解得自己一個」、「恨恨恨恨恨恨恨！」⋯⋯

大腦過熱，「啊啊啊啊啊啊！」我撳實耳仔，但聲音繼續喺腦入面不停迴響。

鼻血飛出，我翻白眼，嘔白泡。

如果有咩人真係有咗動物傳心能力，記住唔好去依啲多動物聚集嘅地方。





我向公司請咗三日假，然後去公園睇人放狗，順便訓練下自己點控制能力。

「哇佢好索呀，好想搞佢。」一隻狗公幾乎掙脫主人嘅狗帶，撲上去一隻貴婦狗度。

「想搞我？有無樓呀你？死狗公！」

當我學識點樣控制能力之後，我就辭咗自己喺受獲動物協會嘅工。