是咁的，我女朋友人間蒸發咗。: 第02章
聽咗幾首歌單嘅英文流行曲，我已經到咗學校。我落咗巴士，將我塞住耳仔嘅耳機擺翻落褲袋。沿住馬路行，右邊就係我學校。透過鐵絲網望入去，我見到我老死Terry喺度同班同學打緊波。原本就無咩心情嘅我繼續走到校門，諗住早啲上班房補眠，因為尋晚都無覺好訓。
「韓逸林，過嚟打陣波先啦，咁早上去做咩啫你？」Terry見到我連招呼都無同佢打，就攞埋個籃球，行咗過嚟我隔離。
「唔喇，好攰。」我抬起頭，指住自己大過熊貓嘅黑眼圈，無聲氣咁答佢。
「做乜咁頹啫你，成晚無訓又喺度打飛機啊。傷身啊少年，回頭是岸啊。」Terry一面嘲諷咁望住我，陰陰嘴笑道。
「算吧啦你，你試下條女玩失蹤，睇下你會點啊。佢前日開始無復過我機喇，都唔知我今次衰乜。唉。」我一邊攞部電話出嚟，一邊好頹咁講。「你睇，喺咪啊。屌，今次仆街喇真係。」
「咦，喂~死仔包啊，幾時有女架，唔同哥哥講嘅，等哥哥幫佢驗下身啊嘛，嘿嘿。喺呢，有無相俾我睇睇咁，唔係唔益我啊嘛，一世人兩兄弟，唔好咁小氣啊你。」佢一輪嘴講咗一大堆野出嚟。
「咩啊Carly喎，之前你咪見過囉，唔好裝傻扮懵好喎你。上次呢，去apm嗰次啊，我咪俾咗我地張相你睇囉，乜你唔記得咗咩？」我聽到佢講咗一堆廢話之後，我就覺得好奇怪。
Terry喺我小學識到中學嘅死黨，無論係學業定係私生活，我地乜春都傾餐飽。我好清楚記得，我同雨桐之前影過一張即影即有相，跟住俾咗Terry睇，仲同佢曬命話自己終於唔係A0。但係頭先佢話我無女？傻的嗎？我霎時間呆咗，究竟佢做咩扮曬唔知咁？
「乜啊，你幾時有女啊又，未訓醒喇梗喺。哎唔同你講住啦，我打多兩球先上班房啊，你自己上去訓陣覺先啦下。」Terry攞翻個籃球，轉身行翻去籃球場。
翻到課室之後，我一個頭就盅咗落去訓教，訓到小息。小息嗰陣，我坐咗喺籃球場嘅嚟嘅看台，自己一個涼下風。我攞出褲袋嘅鎖匙扣，一路嘗試諗下自己究竟做錯咗啲咩事。唔通喺上個星期唔記得搵佢食飯？唔會啊，平時我地兩個都好少見面，始終我地兩個都好緊張學業，放咗學就翻屋企溫書，最多都係放學喺紅綠燈路口度見一面。就算我真係太忙無搵佢食飯，佢都唔至於會玩咁大失蹤三日架。唉我真係R曬頭，諗極都諗吾到究竟自己做咗咩事。
「韓逸林，放學得唔得閒，去海邊散下心，哥我失戀。哎，又係一段淒美又離奇但又不失浪漫嘅一段愛情故事。」Terry啱啱喺小賣部買咗兩罐凍冰冰嘅可樂，佢見到我自己一個坐喺度發呆，就行咗埋嚟俾咗一罐我。
「我？得掛。唉我都好愁啊。」我開咗罐可樂，一野飲咗就快一半。「啊你話呢，女人喺咪真係一種好奇怪嘅外星生物，佢地啲野真係好鬼難捉摸。」
「鬼知咩，女人心，海底針啊嘛，你老母無教你咩。你撈到出嚟就唔係讀緊書啦，你做緊漁夫喇，撈針喎真係啊。」Terry又對咗兩啖可樂。「打鐘喇，我就去排隊先喇，你自己一個喺度慢慢思考人生啦下。」
我見Terry都走咗，我都無繼續留係看台，飲完罐可樂就上咗班房準備第二輪睡眠。
係啦上堂都無咩野好講喇~
話咁快就放學，真係唔知返學為乜，平時上堂都會聽書嘅我完全無精神，早知真係喺屋企訓下覺好過。我嚟到學校門口，買咗兩罐可樂，順便等埋Terry一齊去佢所謂嘅海邊。
「去邊啫喂，我想訓教啊死鏟。」我見Terry已經行到我前面，我又好唔耐煩咁問佢，再將我手上嘅一罐可樂遞咗俾佢。
「中環啦，九號碼頭，老地方，涼海風，正。」Terry例牌咁講咗句。講真，次次佢話去吹風都凈係識去中環九號碼頭，一啲新意都無。
「巴士？」我問。
「唔通地鐵咩，行啦就快有車喇。」佢話。
我地上咗架由我屋企樓下嗰巴士總站開出嘅巴士去中環。講起中環碼頭，好似我第一次同雨桐約會嘅地點，都係喺中環九號碼頭，又係搭呢架車。一路欣賞住車窗外嘅街景，我一邊諗起雨桐。大概過咗四十幾分鐘之後，我地落咗車，行咗幾分鐘，到咗九號碼頭。
九號碼頭喺TVB嘅御用拍劇場地，一個圓頂嘅瓦遮頭，連接住一個圓形嘅平台。平台上面有幾張凳。我同Terry揀咗張無咁曬嘅凳坐。
「其實呢，兩個男人嚟，喺咪有啲Gay？」Terry坐低咗之後，無啦啦問我。
「其實呢，真係有啲Gay。」我答。
「你喺咪跌咗個鎖匙釦？幾靚喎。」Terry手上面唔知幾時多咗嘅紅色嘅圓形鎖匙扣。
「攞翻嚟啦，我架。」我一下搶翻個鎖匙扣，用冷衫抹咗一抹。
紅色嘅圓形鎖匙扣喺太陽光照耀底下，表面嘅玻璃面反射住一陣嘅紅光。紅光好似帶我走入時光嘅隧道，回憶起好多好多野。
「Carly啊，你之前有無嚟過呢度啊？」我實在唔知可以講啲乜，就求其問咗啲問題打破僵住嘅氣氛。
「無喎，不過呢度又真係幾靚嘅啲風景。」雨桐又露出咗佢嘅招牌笑容，面頰嘅酒窩真係好甜。
跟住，我地一路無講野，享受住迎面而來嘅海風。我一直側身咁望住雨桐嘅側面。佢嘅面孔我實在熟悉不過，但係，但係唔知點解就係有啲模糊嘅感覺。可能喺一種朦朧美。
「問你野啊衰仔，喂，喂，喂醒喇。Helllooooo~喺咪死咗啊？」Terry喺我面前不斷揮動佢隻死人手。
「無， 我諗野諗得太入神啫。」我放翻嘅鎖匙扣落褲袋。
「不如去食野算啦，好鬼肚餓啊。」Terry扮曬肚餓咁，撳住嗰肚，唔講真係以為佢喺非洲饑民，餓咗幾個禮拜。
「喂嚟咗無十分鐘咋喎，咁就走喇？」我翻曬白眼，早知就唔鬼跟佢嚟“涼海風”啦，嘥我車錢。
「行啦，唔好嘥時間啦。」Terry扯住我嘅書包，好似拖住隻狗咁。
「得啦得啦，放開我個書包啊，好貴架，無錢喇我。」我好大聲咁講，驚死佢聽唔到咁。
喺吵鬧之中，我地兩嗰就離開咗呢個有住不少回憶之地。