從前有個校長，佢禁錮左全校學生【更新至第二十一章】: 第十七章

望住眼前突然昏睡嘅敵人，我心中一陣驚恐。「造夢者」三個字慢慢浮上腦海，我低頭查看裙袋，嗰張被折斷嘅卡片已經消失得無影無蹤。反之我感覺到腦海中就好似有一張卡片，漂浮喺黑暗嘅虛空之中，慢慢地轉動，彷彿喺度渴求有人使用佢，撫摸佢。喺一片虛空之中，我用意識漸漸靠近嗰張卡牌。

「咻！」嘅一聲，原本死氣沉沉嘅走廊瞬間變成一個類似控制室嘅地方，正前方有一個空白嘅電腦屏幕，發出耀目嘅光芒，旁邊有一大堆五顏六色嘅按鈕。我走到螢幕前面，身後憑空出現一張疑似電競椅嘅物體。

抱住滿頭嘅疑問同黑人問號坐低喺電競椅上。剎那間，螢幕淡出幾個字：「美夢/ 惡夢」

造夢者
我細心思考起卡牌嘅簡介同內容，我係一個以夢境去勝利嘅精神控制者。

夢境係潛意識俾你嘅訊息，上世紀中有不少外國學者對夢境作出研究其中一個認為夢是「一種未經喬裝的象徵，它旨在顯現」，因此強調夢境公開地，而非暗中地表達了內在世界。他所提出的「被潛抑的雙性『陰影』自我」（the repressed bisexual 'shadow' self）





透過夢，可以擴大人類嘅恐懼，影響其情緒，甚至可以控制意志，即係一種精神上嘅折磨，咁到底算唔算得上係殺人？

到底我係咪做緊D啱嘅事？

到底呢場遊戲係咪已經拎走曬我地僅餘嘅人性？

到底……成件事到底有咩目的？

細個去街市嗰陣，我成日都唔夠膽去賣水產嘅攤檔嗰邊。每每見到一條又一條嘅魚喺狹窄嘅鐵盤上面靠住少量嘅水去做微不足道嘅掙紮，輕輕咁抬起軟弱嘅魚鰭，又無力地垂下。但人類卻企喺旁邊左選右擇，務求揀到最新鮮嘅魚，就令我感到心寒痛心。一條條未斷氣嘅魚連垂死嘅掙扎都未做得切就有一雙戴住黑色膠手套嘅手捉起佢，掉向木製砧板上，舉手一斬就身首異處。





對比苟且殘存，死亡或者係另一個開始啫……

「李佑年，呢D唔係你嘅錯，係人性同呢個無謂嘅遊戲所造成㗎……你只係幫佢解脫」

說服完自己後，我利落按下「惡夢」。良久，螢幕上出現一大堆亂碼。毫無預兆地，一個迷你黑洞出現在我腳下，以高速下沉至全身沒入黑洞，一種沉重嘅感覺包圍全身。

黑洞中，就好似墜落虛空中，跌入虛無縹緲嘅世界，巨大嘅壓迫感彷彿要將肺部嘅空氣榨乾。

眨眼間，我跌入一個充滿白霧，一片濛糊嘅地方，既唔係全白，亦只能隱約見到物件，似有似無。





「歡迎嚟到周景言(敵人)嘅低層潛意識(低層潛意識容納了所有不被意識接受的壓抑，因而形成了恐懼症、強迫性的思想行為、妄想、幻覺及噩夢。)，請製作夢境……」一把聲音從四處傳來，連帶住強烈嘅回音。

原本我想問要點樣去創造「夢境」，但下一秒腦袋就制止我發問，然後我好自然咁明白要點做啦，就好似我突然記返起點行路咁，好平常又好訝異嘅感覺。

我閉上眼睛，憑空想像剛剛發生打鬥嘅走廊個樣，除去燒毀嘅痕跡及血漬。一睜開雙眼，腦中所想竟呈現喺眼前，一條格外陰暗嘅走廊、變成牆壁嘅樓梯、血漬斑斑嘅課室……

有場地就必須要有道具，而家所有人嘅共同恐懼都係殘忍可怕嘅怪物。

一提起怪物，我就諗起「移動迷宮」嘅「夜煞」，半機械半怪物，身上有很多危險嘅武器例如大刀、長棍等等，任何一樣都可令到受害者體無完膚。

問題係……我一諗到細節就好想嘔啦……