從前有個校長，佢禁錮左全校學生【更新至第二十一章】: 第一章

31/10/2017早上7:01
「颱風瑪姬正在逐漸接近香港，天文台考慮於早上八時前改發八號暴風信號」一段藍底白字，看似平淡無奇嘅信息躺在屏幕嘅右方，狠狠咁刻喺我心中。其實我學校就8:10先計正式上課時間（嚴格黎講係8:10後要聽副校長廢up同學生會主席「動聽」嘅英文），但係按照我出門口嘅時間，返到頂籠都係七點八左右，點捱到8:00先冒險拎部手機出黎仲係為左突登上天文台就係為左睇新聞？免啦，無謂又扣三分，雖然喺老師眼中我都算係幾安份守己嘅女學生，暫時加左兩分又扣左兩分咁，都無乜嘢。（我地學校要交手機，好似係話之前有人唔見電話所以先會咁。根據校規，唔交手機要扣3分，校園內使用電話扣2分，麻鬼煩）

7:07
既然八號波無望，咁唯有死死地氣返學啦。我行去廁所，做女仔會做嘅嘢---------紮辮（想歪嘅去面壁）。老實講我真係好憎紮辮，我個人認為我散頭髮靚D，而且紮辮嘅過程又痛，又可能會打kick，總之就係好麻煩。我紮辮嘅style 同其他女仔唔同，基本上大部分女學生都係清一色嘅all back馬尾，同一條短袖白色連身裙加條紅色嘅皮帶同紅白交錯嘅布呔，喺純白嘅校裙上面有一個標準保良局嘅盾牌標誌，十足一個清純嘅女生。不過其實我地學校嘅女仔都算幾乖，但男仔就唔同，簡單嘅白色短袖恤衫同一條灰色長西裝褲，本應應該似一個紳士，但偏偏我地班部分嘅男仔又懶係扮型扮威，以為自己巴支閉，但其實又咪係無料扮四條。

7:10-7:18
啱啱落樓，一出閘就感覺到陣陣嘅涼風，為入秋但都熱過夏天嘅地面帶黎一絲涼意。事到如今我都應該要自己介紹一下……我叫李佑年，朋友通常都叫我小年，喺中學成績平平，運動好差，畫畫幾好，操行唔差，人緣麻麻咁。基本上，我都無咩特點，不過我就係一個奇怪嘅人---我特別鍾意睇災難小說。並唔係我性格變態，只係我唔想人生平平淡淡過一世，所以有時就睇下文FF下。此外，災難小說大多數都係講人性嘅變化，真心想睇下我地班嘅人會點樣人品大爆發，佢地會互相廝殺定英雄救美，我都想睇下。噢………唔講住，要追車ar……

7:26




好彩頭先上到班巴士，可以喺7:30學校開門就即刻入去。學校對面係一座屋苑，穿過屋苑就有兩條雙線行車嘅馬路，馬路隔離就有一個巴士站，其實個巴士站同學校都有段距離，但搭嗰班車就貪佢唔使10分鐘就到，行多幾步咪當減肥囉。平時，我會同蕭永一齊搭巴士返去，不過今日就唔見佢。上到向通往學校嘅天橋，竟然感覺得到點點寒意，由於天橋太食風嘅關係，強風不停吹襲天橋，行人都迫住要背風行。

7:30
董中（故事內容同學校無關）係一間有30年歷史嘅中學，一直以黎校風都唔差，只不過自從我地嗰屆升左F2，加上我嗰班2B嘅男仔又唔知個死字點寫，所以基本上三頭五日就有DC（訓導組）上黎訓話。望向小保良嗰邊，見到一個微胖嘅女生低着頭，慢慢咁行過黎。我翹埋雙手，企喺學校門外嘅藍色欄杆，望住女孩嗰種彷彿地震都唔急嘅腳步就着D忍唔住舉中指。【係咪好緊張第一個出場嘅係邊個先？】當個女仔行得愈黎愈近，就見到佢白哲嘅皮膚，在一個圓圓嘅滿月臉上寫住不滿【第一個出場嘅就係moon！】

7:31
moon：「妖！點解唔7:00就打八號啫？學生又唔使返，老師又唔使返都攞得人工嘅，明明就係win win」
我：「證明連個天都唔鍾意我地」
之後我地就傾左D關於功課，上堂仲有老師嘅壞話，不過只係短短嘅兩層樓，好快就到左202室---我地嘅班房2B。一切罪惡嘅温床同災難嘅起點…………