純屬虛構

《純屬虛構：大學宿舍》


我聽講三年前有個師姐係我而家住緊嘅宿舍裡面變咗做植物人。冇人知點解，警察同醫生都搵唔到合適嘅理由，網上搵到嘅報道冇提過之後佢有冇康復，我估應該冇。師姐變成每年O Camp都要講幾次嘅鬼故，雖然其實佢仲未死；而除咗呢種時候之外，你真係唔會記得自己其實係住喺一個「出過意外」嘅地方，除咗講下笑之外其實無乜特別。

除咗有一晚得我一個喺宿舍嗰陣發生過一件事，姑且可以話係呢個故事嘅延續，或者係令佢唔好爛尾嘅結局。你當我作出嚟嘅都好，我唔會同你拗件事係唔係真、係唔係我溫書溫懵咗自己幻想出嚟。

啱啱我講過我嗰晚喺宿舍溫書，溫到已經唔知而家幾點，但係未到本來諗住休息嘅鐘數，但係突然間有人好急咁不停敲我道門。本身以為係另外個女仔冇帶匙卡，但係咁佢應該會whatsapp嚟同我confirm一聲我喺唔喺度，而唔係突然咁用力拍門；神奇嘅係通常拍得咁急我點都會開咗門睇下發生咩事先，但係嗰晚我決定喺防盜眼望一望先開門，而家諗返其實我唔知自己點解要咁做。

防盜眼望出去見到勉強認得出係宿舍走廊嘅地方，但係盞燈不停閃吓閃吓，本來新淨嘅牆油漆剝落，露出睇落好污糟嘅磚塊，上面黑色一撻撻唔知係咩污漬嚟。門前面有個女仔不停拍緊門，佢挨得太近其實我睇唔清楚，但係我覺得個樣好似O Camp嗰陣時組爸show過俾我哋睇嘅相咁，不過喺佢仲未變植物人之前師姐係個好開朗嘅女仔，而家隔住防盜眼，我望到佢嘅面上只餘下恐懼。



嗰晚無論佢拍得幾大力，我都冇打開過道門。

之後到我搬走都冇再遇過同樣嘅事。

可能有一日住喺嗰間房嘅師妹會打開嗰道門啦。