偷戀: 後記

「阿傑，或者咁講你會覺得我唔係一個好女仔。
但其實，我已經同我男朋友分咗手。
原因係咩，我諗你都明……
因為一個心，裝唔落兩個人。唔知你會唔會覺得好奇怪，奇怪唔知點解我會鍾意你。
但其實，喺好耐好耐之前，你已經係我心入面嘅英雄。至於原由係咩，等遲啲有機會先講。
 
初初見返你，我一眼就認得出你係你，但你應該已經唔記得我。但令我失望嘅係，你竟然同以前嘅你完全唔同。你再無發光，而係因為現實而低頭。我唔鍾意咁樣嘅你，所以我希望用自己嘅夢想，感染你去追尋你嘅夢想，過返個你想要嘅人生。點知到頭來，係你感染我。
 
本身，我諗住可以同你發展為親人關係，我一直努力說服自己，但一直都係自欺欺人。係你嘅結他，你嘅歌，叫醒返我個心。我終於明白自己唔可以逃避，而同佢講咗分手。但喺呢一刻，我接受唔到同你一齊，因為我覺得自己背叛咗人，背叛咗自己……
 


我決定咗喇，我要去追尋我嘅音樂夢。我唔會叫你等我，因為我知道，就算我行開一步，你都會緊貼返上嚟。就好似之前我地嘅關係咁！我相信，如果有緣，終有一日，會再相遇。」
．
．
．
．
．
．
．
．
．


．
「細佬！你無事嘛？做咩對住張白紙唸唸有詞？」
 
「咩呀！係佢俾我嘅信嚟架！」
 
「細佬……不如……聽日跟家姐去一個地方……」
 
「去邊？」
 
「去跑馬地……見佢。」