偷戀: 第十三章

不過，變，講就易者，點變呀。
 
為咗KATHY，我重新審視過自己係一個點樣嘅人。
 
結論係，廢人。
 
不過，或者每個雄性心入面都有一顆爭勝嘅心，喺未知道KATHY有男朋友之前，我只係想係一邊仰望呢個女神，守護佢，供奉佢。甚至乎我以為我已經做好心理準備，佢會俾老細或其他某個男同事追走，然後結婚。
 
喺我知道佢有男朋友之前，我一直都係咁以為。
 


知道之後，事與愿違。
 
我唔係話想喺佢手上搶KATHY 過黎，只係，唔想被佢比下去。
 
只係單純嘅爭勝心，雖然我廢，但我應該可以，令KATHY開心。
 
我想俾多個選擇KATHY，我想係一邊等佢。
 
為咗呢個目的，我要改變。
 


變成一個更好嘅人。
 
「唉，燃點香煙飲啖酒，所有不快都溜走啦！乾杯！」阿樂舉起酒杯。
 
哐！
 
我將斟到半滿嘅啤酒一灌而下，灌完一杯又一杯……
 
除住酒精係胃部揮發，我個心好少舒服咗少少。
 


「咪咁愁啦，女死女還在喎！」
 
「你唔明架喇……」酒精開始影響思考，或者，刺激思考……
 
「有咩唔明呢？女咋嘛！」
 
「你覺得女多，只係因為你未試過真正鍾意一個人者……」
 
「樂仔……你唔明架喇……」
 
「我真係唔明。」
 
「我真係好鍾意佢呀……唔只係因為佢靚，唔只係因為佢笑得靚，唔只係因為佢可愛，唔只係因為佢細心，唔知係因為佢開朗，唔只係因為佢體貼，唔只係因為佢白痴，唔只係因為佢身材好，唔只係因為佢鼓勵我……我鍾意佢，因為佢係佢呀……對你嚟講，可能再多女你都覺得唔夠食，對我嚟講，剩係佢一個已經太多……因為我真係鍾意呀……」
 
「唔撚明。」


 
「屌！」
 
 
屌完嗰聲，我已經斷咗片。
 
回復意識嘅時候，已經係阿樂將床上面，赤裸上半身。
 
屌，真係好撚GAY。
 
雖然講係咁講，我個心依然係充滿感激。
 
如果我真係GAY，我應該會鍾意佢。
 
「你條撚屌！訓撚醒拿？」


 
「仆街幾點？」
 
「十二點啦。」
 
「唉屌，做咩唔叫醒我返工？」
 
「幫你請撚咗假啦，你琴晚飲到咁，點撚樣起身返工呀？」
 
「呼，唔該晒。不過，你做乜除撚左我件衫？」
 
「唔止呀，我幫你抹埋身呀！你每一寸肌膚都俾我撫摸過～」
 
我一腳伸埋去阿樂條死剷到。
 


「話時話，真係好耐未見你飲到咁醉，仲斷埋片。」
 
「咁我琴日無做啲咩嘢呀嘛？」
 
「無呀，你打咗個電話俾KATHY表白之嘛。」
 
「係真唔係呀屌你？」我慌張到即刻搵部電話出嚟睇，連阿樂忍住唔笑個樣都睇唔到。
 
「睇你成個戇鳩仔咁！」阿樂瘋狂恥笑我。
 
「咪撚玩我啦……我個心就快跳出嚟啦。」
 
「不過，你琴晚真係喺條街到大嗌『我好鍾意你呀KATHY』，我真係唔知會唔會有佢嘅熟人係附近聽到呀。到時佢知道咗，咪撚瀨係我爆響口喎。」
 
「唔撚係掛……」


 
「你條死仔，嗰次你暗戀咗好撚多年嗰條女俾人中出搞大咗奉子成婚請埋你去飲你都無飲得咁醉，你今次搞咩呀。」
 
「你話阿欣？無啦，其實我只係唔知，我係鍾意佢，定係鍾意鍾意佢嘅自己者。」
 
「屌你呢排講嘢咁玄嘅？」
 
「我諗我一開始真係鍾意佢，但去到後期，我發覺我只係鍾意幻想中嘅佢，而唔係真正嘅佢。我發覺，我係唔捨得嗰個全情投入去鍾意一個人嘅自己，因為我由細到大都無試過全心全意咁投入去做一樣嘢。」
 
「哦……都係唔明。」
 
「屌。晒鳩氣。」