偷戀: 第十章
嗰次之後嘅返工時間，我多咗偷望佢。
以前我只會喺佢地傾野個陣先毫無忌憚咁望。
依家，就算佢係位做野，我都會望。
有時我地眼神會不經意對上，佢就會微微一笑。
有時我會感覺到嚟自佢嘅視線，但我唔知道佢係望我有冇望佢，定還是想望我……
有好一段時間，我都喺呢種猜度中返工。
我好享受。
即使我有99%肯定佢唔會鍾意我呢種人，但我都不能自拔地將自己浸淫係幻想入面。係幻想中尋求幸福嘅感覺。
其實，諗深一層，KATHY對所有同事嘅態度都係咁上下。
佢本身就係個交際能手，同任何一個人相處都駕輕就熟。
對佢黎講，人與人之間嘅牆就好似從來都唔存在一樣。
我好佩服佢，亦都係佢其中一個吸引我嘅地方。
如果要講佢到底有咩地方吸引我，我諗我數到個故事完都未數得晒。
所以就暫且擱下。
自從個次去聽佢拉小提琴之後，我嘅收工時間又再推遲左一啲。
本來我同RECEPTION個位一樣，係擁有搭正六點走權利嘅人。
不過，我個心因為KATHY而多左一啲奢侈嘅盼望。
我享受同佢一齊走嘅個份時間，我享受同佢獨處嘅時間。
有一次，佢終於發現我為左等埋佢而遲走。
「其實，你係唔係特登留到咁夜等我架？」個陣係夜晚八點。
「無野做呀嘛……」我就好似個位打飛機被老母發現嘅巴打一樣咁回答。
「嘻～」
其實唔只一次，我真係以為佢鍾意我。
「如果下次夜過八點，我WHATSAPP你叫你走先啦～」
「哦……哦」
我重覆，我真係唔只一次，以為佢鍾意我。
不過當我冷靜落黎，搵盤水照下個樣，就知道世界需要我呢啲人黎襯托，免得天下大亂。
諗深一層，我都算為世界和平出左半分力。
「你屋企有冇煮飯呀，不如我地一齊食？」佢又問。
「好……好呀……」因為已經八點幾，我都錯過左屋企食飯嘅時間。
「你呢？你屋企人無話留飯俾你？」我問返KATHY。
「無呀，其實我屋企好少煮飯，依家多數都係我一個人係企，爹地媽咪長期去旅行，我又係獨生女。」佢答。
「會唔會好悶？」
「會呀，你得閒過黎玩囉～」
「呃……不如諗下食咩？」
「哈哈～你好好笑～」
「嗯……嗯…咁……食咩？」
「大排檔丫不如？」KATHY提議。
「你咁麻甩嘅？」
「咩呀，好食呀嘛！」
「你鍾意就得啦，有冇話去開邊間？」我問佢。
「有呀有呀，我帶你去～」
最後我地去左某間大排檔，嗌左半隻炸子雞，椒鹽鮮魷，蠔仔餅，黑柳粒，炒通菜同一碟瀂水拼盤。
仲有幾枝啤酒。
「你洗唔洗嗌咁多呀……」我問佢。
「食唔晒咪打包囉！反正聽日星期六，我地今晚一於飲多兩杯！」KATHY有少少未飲先HIGH。
我隱約FEEL到，佢有些少唔開心。
「你覺得，做人有咩意義？」係飲左兩啖之後，KATHY好似準備開一個吐苦水MODE。
「我唔知。如果真係要我答你，我會話殷海光嘅人生的意義一文入面嘅睇法同我好相似。」
「我無睇過呀，講咩架？」佢問，我差少少唔記得左佢係DSE學生。
「講人生在世追求嘅應該係真善美。」
「咁咩係真善美？」
「我都唔知。」
「咁你又講！」佢有少少責備嘅語氣。
「我諗，追求自己人生嘅目標，可以嘅話，為世界帶嚟少少正面嘅改變，就係真善美掛，我中化HEA讀咋，鬼知咩……」
「咁你呢，你覺得自己有冇達到？」KATHY 問我。
「呃……無掛……」
「點解？你無追求嘅咩？」KATHY已經飲左兩杯，紅住塊面咁問我。
「無呀，我基本上係無慾無求……或者我已經有少少睇透左呢個世界。」
KATHY無回應我，只係繼續飲酒，我都廢事講落去。
講真，我算係幾豁達嘅一種人，放唔低嘅，可能係兩老，不過唔記得同大家講，我有個搵到錢嘅家姐，所以都唔算太大負擔。
或者咁講，如果有一日我睜開眼，發覺眼前嘅全部都係外星人渣住手術刀對住我，我可能講句屌之後就認命。
呢個就係我嘅人生態度。
KATHY都仲係KEEP住無講野，一邊飲啖酒，一邊食舊肉。
原來，我地之間唔講野咁相處，都幾舒服。
我珍惜呢一刻嘅時間，甚至希望過呢一刻就係永恆。
「飽喇～」食左成個鐘之後，KATHY終於話飽。
飲左幾枝啤酒，我都係未有醉意。但KATHY似乎已經喪失左理智，係條街到FING黎FING去。
「我真係好鍾意拉小提琴呀！」佢大嗌。
我個心又痛左一下。
由於有啲唔放心，所以我送到佢返屋企門口，搞到我都差少少喪失理智入埋去……
「多謝你陪左我成晚～」
「早啲沖涼訓覺啦，走喇我。」
「咪走住！我要俾份功課你返屋企做！你諗清楚先答我呀！知道未？」
「你唔講係咩，我又點答呢？」我苦笑。
「你覺得，係唔係講出黎會俾人笑嘅夢想，先有實踐嘅價值？你諗清楚先答我呀！同我係WHATSAPP打500字SEND黎！」
我發覺，我地兜兜轉轉，都係講返夢想呢個話題。