《香港革命戰》(上): [13-陷阱] PART 3
“吱...依...”黑色大閘門打開，閘門後面就係INTRUDER既主腦室。
360度全圓設計，黒色既牆身及空間中都充滿EVE粒子飛舞。
主腦室中央，懸浮住一個大約有一個成年男人身形大細既圓筒狀壓縮空氣管。
壓縮空氣管懸浮喺主腦室既正中央位置，並無任何支柱連接。
一條壓縮空氣通道由門口伸展到壓縮空氣管，形成連接兩處既唯一路徑。
我向住壓縮空氣通道踏出一步，一步，一步接一步...
雙眼望住壓縮空氣管裏面，充滿淡淡藍色既液體。
呢D液體稱為LILITH Connect Liquid，簡稱LCL。
LCL係人腦連接AI中既重要媒體。
無左LCL，人腦就會被AI直接破壞...
而浸泡喺液體裏面既，係赤裸裸一絲不掛既細妹－陳月...
我越行越近，越行越睇得清楚...
嬌小既身軀，白到發光既皮膚緊閉雙眼，頭髮喺液體裏面飄下飄下，好有美感...
當我行到差唔到一半路程既時候，身處LILITH Connect Liquid裏面既阿月應該察覺到我走左入黎，佢慢慢睜開雙眼，對我莞爾一笑...
壓縮空氣管裏既LILITH Connect Liquid開始由氣孔排出，變成無數藍色粒子，飄到圓形既空間裏。
當LILITH Connect Liquid完全由壓縮空氣管排出後，“颼”...壓縮空氣管亦都解除。
阿月赤裸裸咁行到壓縮空氣通道上面，雙手輕輕撥弄一下仲黏有LILITH Connect Liquid既頭髮...
LILITH Connect Liquid變成藍色粒子，飄到空間中。
阿月一路保持微笑望住我，一路行過黎...
『又掛住偷窺嗰個李飛揚呀?妳唔好唔記得妳只有三分鐘架咋。』我將我身上既黑色長身皮褸披到阿月身上。
「我梗係知啦~一早就斷左線啦~我岩岩只係Check緊INTRUDER收集返黎既數據咋嘛~嗯~都係咁樣既哥哥好睇D~」阿月一路講，一路蹬起纖纖雙腿，雙手繞到我頭後，幫我解開白色頭巾同頭圈。
『阿風呢?我叫左佢睇住妳架，免得妳偷窺到唔記得時間。佢人去左邊?』我四維咁望...
「你唔係咁忍心俾你個妹既全相任人睇呀嘛?我叫左佢去做要做既事啦!都唔知咩阿哥黎架...」阿月雙手叉住條小蠻腰，扁住嘴咁對住我講。
我先唔知妳呢個係咩阿妹黎架...
『妳唔係唔知妳架啦，一見到嗰個李飛揚就好似失晒性咁，唔好話時間，阿哥姓乜都唔記得架啦。妳唔好唔記得MINDER只需三分鐘就可以捉到妳出黎，繼而入侵妳個腦!到時妳就真係一世都唔駛旨意見到嗰個李飛揚咯~』我轉身向住門口行出去。
「我當然有好好記住啦...一日只可以三次入侵MINDER，每次只可以三分鐘嘛...不過照我睇，唔駛過多兩個星期，一日一次都未必做到...」阿月一直跟住我身後行。
『吓?MINDER已經...』我仲未將說話講完...
「嗯...MINDER既成長速度實在太快...快得驚人...雖然話INTRUDER既AI設計比佢先進，但始終MINDER比INTRUDER早好幾十年製成...要追返呢段時間，仲有好長既路...」阿月認真起黎。
『就算係妳同INTRUDER加埋一齊，都唔夠MINDER...』我仲未將說話講完...
「仲差好長...始終AI既設計係越早製成，越學得多...」阿月遙遙頭。
『我地已經無乜時間...』唔可以再拖...
行出主腦室後，“吱...依...”身後黑色大閘門再次關閉。
「不過另一方面進展相當順利...」阿月行到我前面。
『關於陷阱?』我望住嬌小既背影...
「嗯，錢已經收到。」阿月喺黑色既通道裏面一直向前行。
『嗯，照舊咁將D錢分晒俾有需要既下等人啦。』錢對我地黎講並唔重要。
『嗯，我知點做。另一方面，經過今次交易，李飛揚好信任我，只可惜我地犧牲左五十個行者...」阿月低住頭...
『五十個行者無白白犧牲...至少換取到李飛揚對妳既信任。佢對妳既信任越大，距離陷阱就越黎越近。』我知道咁樣講係唔會安撫到阿月...
阿月一直都無出過聲，一直行到入升降機入面...
我見到阿月面上充滿哀愁...我真係唔係咁忍心...
『阿月...』我仲未將說話講完...
「哥哥...唔好再要人犧牲啦...可以嘛?」阿月一雙憂鬱既眼神，真係攞我命...
『非必要時...盡量啦...』如果可以既話，我都唔想犧牲任何一個人...
「哥哥應承左妹妹既，就唔可以食言架啦!」阿月用上一雙堅定既眼神盯住我...
我真係無呢個細妹辦法...
好多野我都唔可以唔應承阿月，因為佢係一個好關鍵既人物...
INTRUDER要借用阿月黎操控，又要借用阿月帶李飛揚走入陷阱...
而阿月呢個人又非一般固執...
最慘既係阿月所做既每一個決定都經過深思熟慮，係萬無一失...
一個既理性，又固執，仲要諗野比人快既人...
真係好難應付...
升降機上到地下66層，阿月房間所處既樓層...
「接住落黎就係要將綽姿既容器擄返黎。」阿月一直向住佢既房間方向行。
『嗯，我已經根據你由INTRUDER收集返黎，分析出既資料做好準備，再過多兩日就可以行動。』每次行動都要確保萬無一失...
「個容器...好似好靚女，係唔係呀哥哥?」阿月突然轉頭對我笑一笑...
『呀...OK啦...』無啦啦咁問，叫我點解呢?
「不過...我都係可以肯定，飛揚係唔會對佢心動!」阿月行到黑色房門前...
“吱...依...”黑色房門自動為我地打開...
行入阿月既房間...
“吱...依...”身後既黑色房門自動閉上，以黑色為主既房間...應該話成間房都係黑色...
阿月就係一個只愛黑色既人...
著既衫要黑色...車要黑色...房要黑色...咩都係黑色...
老實講...我都係一樣...
更真實既係，整個SPIRIT都係以深淵既黑同閃爍既綠光配襯而成...至少我地屯門領域仲係咁...
一個無陽光既世界，就連色彩都缺乏...
「就算個樣再靚，身材再好都無用~」阿月蹬一蹬起纖纖雙腿，將身上既黑色長身皮褸披返上我身上...
『妳會唔會對嗰個李飛揚太有信心，又或者妳太過自大呢?』妳估我唔知妳諗乜咩...又係D咩李飛揚對妳一條心嗰D骨都痹既說話...
「No~No~我唔係自大~哥哥~過黎幫幫我...幫幫我扣...」阿月帶起左個黑色Bra，轉身向我示意幫佢扣個Bra扣...
咁大個人仲要人幫扣Bra扣...
「扣晒三格...扣晒三格...唔該~」阿月轉身喺我面前托一托對乳房...
胸前無幾両肉...托黎做乜呢...
「講道邊話?」阿月一邊穿上黑色內褲，一邊問...
『講到妳自大...』我已經拎定一件T-shirt同一條黑色短褲放到阿月面前。
「唔係我自大~係我太了解飛揚~係我太了解飛揚~」阿月一邊著我幫佢拎既T-shirt，一邊念念有詞...
講真，我坐左喺道都唔係好想聽佢講野...
“我太了解飛揚~我太了解飛揚~”呢句說話，我差唔多每日都由阿月口中聽到幾十次...
真係妳唔厭，我都煩...
試問世上邊有一個人可以完完全全了解另一個人?
我同妳係孿生都唔係好知妳諗緊乜啦...
妳話妳同佢青梅竹馬，所以好了解佢...都過左三年啦，唔好話人啦，咩都變晒啦...
三年咁長時間，我又真係唔信佢會對妳一條心囉...
不過...我求神拜佛都希望嗰個李飛揚真係對我細妹一條心啦...
唔係既話，我都唔知仲可以用咩方法引到佢掉落陷阱...
「飛揚只會愛我一個~我靚嘛?哥哥~」阿月披上一件黑色長褸後，係我眼前轉一個圈...
『靚啦...靚啦...今日妳最靚啦...喂...等等...妳要去邊?』阿月每次問得我靚唔靚，都係想出去架喎...
「同你一齊去天水圍領域開會囉~」阿月對我莞爾一笑...
『我幾時講過要帶埋妳去?』我肯定我無講過要帶阿月去天水圍領域開會!
好無奈咁坐左上車之後...
「都話哥哥對我最好架啦~嘻嘻~」阿月坐喺我隔離，對我莞爾一笑...
『哈...哈...』都話左我無呢個細妹辦法架啦...
認真，實在唔應該帶埋阿月去天水圍領域...
實在太危險!
真係唔應該要阿月冒險...
阿月係關鍵人物...唔可以有任何閃失!
好話唔好聽，就算我死左，都仲起碼有阿月喺道，阿月有方法可以令死海文書可以繼續實行...
假如連阿月都死埋，咁就真係玩撚猿...
但...阿月佢又呵又哄又拉又扯又嗲又扁晒嘴咁真係好難搞...
「其實又有咩危險喎~」阿月望住車外既風景...
其實車外無咩風景好望...
成條架空高速公路既左右兩邊都係黑黑既建築物，綠綠既光...
公路上面既車輛都係黑色為主，而且差唔多都係一色一樣...
『SPIRIT始終都係分裂左，而家三個領地都已經變成對立局面...』嫉妒...人類始終都係擺脫唔到七宗罪...
「但係佢地又可以對我地點?規條裏面第五條列明不可殺人。」阿月都仲係望住車外既風景...
『規條裏面夠列明要保護原核啦，妳睇下我地而家似咩樣?』我指一指天上面虛弱既EVE...
今時今日既EVE比起五年前，SPIRIT分裂之前真係弱左好多...
「所以我地而家咪受梗懲罰囉~」阿月既眼神中充滿信心，就好似世事都盡在掌握之中...
『唔關我地事架喎...係前人作既孽，點解要我地黎受?』我真係有D唔憤氣!
要分裂SPIRIT唔係我既主意，但點解要我地收拾殘局?!
「我地既罪，本來就係由我地既祖先ADAM同EVE帶俾我地。我地都要為佢地既罪受苦受死啦~好合邏輯喎~」阿月對住我笑笑口...
但我都仲係好唔憤氣!
因為某部份人為求滿足一己私慾，犧牲其他人應有既權利，而且仲要無辜既我黎受罪?太唔公平喇掛...
「況且...我相信你有咁既力能去改變呢個已被嚴重扭曲世界...我最愛既哥哥~」阿月又對我莞爾一笑...
唔好咁樣對住我笑好唔好...
我地架車一直以時速800公里喺高速公路上面行駛。
好快就已經見到分裂之牆...
分裂之牆同誡律之牆整體黎講基本上都係一樣，分別在於誡律之牆係由“神”製造，分裂之牆係我地仿照誡律之牆建成。
十年前，當時三個領域既統治者因為意見分歧，大家達成最後一次協議，就係要將三個領域分開。
而協議最重要既部份就係，將地底下面既LILITH一分為三...
可惜...愚蠢既人類仲未察覺到自己既愚昧創造左一次嚴重災難...
依呢個災難一至伸展致今...
架車開始由架空高速公路轉向地面，而且開始減速...
『阿月，妳都係留返喺道啦。反正我都帶唔到妳去天水圍領域議會廳架啦。』我都仲係唔想要阿月冒險...
「唔制~邊個話我要去到議會廳?你帶到我入天水圍領域就OK架喇~嘻嘻~」阿月又對我莞爾一笑...
唉...救命呀...
有時真係想一腳就踏阿月出返去...
又或者叫嗰個李飛揚接佢走算...
雖然話阿月思想正確，方向都無偏差...
但我硬係覺得再係咁落去，死海文書遲早都會俾佢搞禍...
因為阿月就好似D不穩定元素咁，唔好好小心處理，爆起上黎真係一發不可收拾...
我真係有DD後悔，點解當日要咁衝動救妳返黎...
不過算啦...無阿月，乜都完...
我地架車駛到一個比較荒蕪既地方，一個無乜建築物既地方。
兩邊草地長滿世界之草...
為左安全理由，習慣接近牆既地方都係唔會起建築物，呢個年頭，始終係動盪不安既年代...
我地唔知道，有無人想打破規條...
我地亦唔知道，會唔會有人嘗試梗打破規條...
我地更唔知道，幾時會有人會打破規條...
規條...已經變得唔安全...
規條...已經變得無保障...
我地架車慢慢減速...慢慢減速...慢慢...“依...”停左落黎...
『妳真係要跟我去?講明先，我保護唔到妳，妳要自己保護自己呀...』我落車前作最後嘗試...嘗試說服阿月留喺安全既地方...
「放心啦哥哥~我會識得照顧自己架啦~你專心忙你既就得架啦~」阿月已經急不及待，邊解開安全帶，邊打開車門...
做阿哥既，幾時會放心細妹架...
“沙...沙...沙...沙...”阿月喺世界之草上面左擺擺，右飄飄，雙手放到背後，轉一轉圈，就好似蝴蝶咁輕舞飛揚...
究竟點解呢隻蝴蝶可以咁輕鬆自在?
究竟阿月心裏面諗梗乜?
我地而家可以話係處於腹背受敵既險境...
地獄對我地既虎視眈眈...
SPIRIT裏面既分裂對立...
而迫在眉睫既係能源既問題...
呢D野阿月都知道...都了解...都清楚...比任何人都清楚了解...
但點解佢仲可以咁輕鬆自在，處之泰然?
阿月一路跳，一路舞，優美既舞步吸引左駐守喺道既十六部防禦者RU既目光。
駐守喺呢道既十六部防禦者RU早就已經列好隊。
左右各八部防禦者RU並列出一條闊有兩個身位既通道。
阿月跳到十六部防禦者RU面前停左落黎，雙手放到背後，帶住微笑向住呢十六部防禦者行個禮。
十六部防禦者RU好似有D唔好意思咁點點頭...
呢個阿月...唔好搞到控制呢十六部防禦者RU既行者分心得唔得架...
要知道呢道係一個重要既地方...
『喂喂阿月!唔好搞事!妳要知道，面前呢道牆，唔係好似今日呢D特別日子，就連我都無辦法進出。呢道係一個好嚴肅既地方。莊重D。』我向面前既阿月發出嚴厲既警告。
「哦?你都識講唔係特別日子，就連你都無辦法進出，咁仲有咩人可以進出呀?仲要咁多防禦者喺道駐守做乜呀?放佢地假好過啦~」阿月扮晒天真咁行到我身邊...
『妳呢個...』我仲未將說話講完...
「快D行啦哥哥~」阿月翹住我左手，拉住我行...
我地一步一步咁行入防禦者排出既通道...
『喂...妳仲未嫁架...唔好咁翹住我行得唔得?』咁樣真係有損我平日嚴肅既形象...
「綵排定差唔多架啦~」阿月得意洋洋咁繼續翹住我行...
『搵鬼娶妳...』我就係唔抵得阿月咁囂張!
「我知道飛揚一定會黎娶我既~」阿月帶住滿面幸福既笑容...
『妳真係咁老定?我意思係，妳真係咁老定我唔會殺左佢?』我回以一個陰險既眼神!
「你答應過我，唔會殺死飛揚。我知你唔會呃我既~」阿月既眼神中完全無丁點懷疑...
『我係話非必要時。如果唔可以好好跟著死海文書發展，我一定會親手殺死呢隻惡魔!』陰險既眼神變得邪惡!
「我知你唔會既~你咁錫我，你又點會捨得要我傷心呢~我既好哥哥~嘻嘻~」阿月對我莞爾一笑...
夠啦...
唔好成日都用呢招...
認真講句，如果妳會阻礙到劇情唔跟死海文書發展既話，我真係會連妳都殺埋!
唔好以為我唔忍心，任何阻礙我拯救世界，審判世界，我都會親手剷除!
“沙...沙...沙...沙...”當我同阿月行到去分裂之牆前...
「呢幅就係分裂之牆?」阿月跑到牆身前摸兩摸，「三年黎都無親手摸過...睇黎人造既分裂之牆比唔上神造既誡律之牆~」
我亦都行到分裂之牆前，認真睇一睇...
就咁睇，牆身都好光滑...而且無乜損壞...
『點解妳會咁講呢?我們已經跟足誡律之牆既資料黎起，而且相比起誡律之牆，分裂之牆既牆身更加光滑，更加新淨。點解妳會覺得分裂之牆比唔誡律之牆呢?』我亦都摸兩下牆身。
只見阿月合埋雙眼，笑笑口，遙遙頭:「仲差好遠~」
阿月咁講既話，就總有佢既理據...
我係唔應該質疑佢...
始終，喺呢個世界上，可以同EVE系統產生共鳴既，應該就只有阿月一個...
「你地喔...以神之名創造出偽神之物，得到報應啦~」阿月帶有諷刺既笑容責怪我...
『我已經講左好多次...我無份架好唔好...』我係唔會接受呢個指控...
「唔好逃避責任~你無好好阻止佢地，所以你都有錯~」阿月既笑容就好似向世人宣佈罪名既天使一樣...
『所以我咪努力梗贖罪囉...』喺天使面前，我都係乖乖認罪罷啦...
「仲未夠呢~」阿月左手向後拉弓，「你要親手毀滅佢!」
“啪”一聲，阿月一個左直拳打向分裂之牆...
定格兩秒後...
「呀!好痛呀!痛死啦!」阿月好型咁出完個左直拳後，捉住自己隻左手係咁嗌痛...
妳係唔係傻架...
要摧毀分裂之牆...談何容易...
可能對阿月黎講，分裂之牆真係比唔上誡律之牆，但堅硬程度已經達到連EVE粒子砲都打唔入...
仲有唔好唔記得E.R.F.D.S....
我地根據誡律之牆發出既EVE光段，研究出黎既E.R.F.D.S.吸收力已經非常強大...
而要關閉分裂之牆上面既E.R.F.D.S.既話，就要得到三個統治者同意...
就算我提出，天水圍領域同元朗領域嗰兩個自私既統治者都唔會肯...
所以話...喺呢個既有制度下，就算你知道係錯，都改變唔到...
制度已經合法地保障左錯誤既觀念...即使佢唔合情...唔合理...
神所定下既規條，慢慢咁俾人類既制度打破...
“吱...吱...”聲由分裂之牆傳出...睇黎差唔多時候...
每個月既今日－23日，分裂之牆都會打開。
分裂之牆建成後，三位統治者共同協定左每個月既呢一日，都要聚集一齊召開會議。
為公平起見，會場每個月都唔同，由屯門到元朗再到天水圍一個循環咁去。
但其實，開會又有咩用?
“吱...吱...”分裂之牆中間出現一道裂縫，裂縫由地面伸展到天空。
裂縫慢慢擴大，向左右兩邊張開。
“吱...吱...”裂縫越黎越大，越黎越闊。
“吱...”最後開出一條兩米闊既通道。
「嗯?人類製造出黎既野硬係要咁浮誇既~簡簡單單整道門唔得既?」阿月冷眼望住條有30米長既通道...
『咁摩西分開紅海又點計?喺海面上面整條路出黎都得啦。』我一路行入通道一路講。
「呵~你真係有所不知啦哥哥~上帝既本意係諗住當以色列人行過紅海既時候，如果有任何一個人對上帝存有猜疑之心既話，上帝就會將法力取走，用紅海淹沒佢地!」阿月又再翹住我行。
唔係呀嘛?
咁講法...如果而家分裂之牆突然閉合...我地咪變成三文治?!
『等等先...太殘忍啦掛...只係一個人既錯，就要全族人一齊承擔?』我唔認同阿月既觀念...
「哦?哥哥無聽過一個故事咩?是咁的...」阿月遙一遙我手臂...
又要聽故仔喇...
「有一隻船載有300人，當中有3個殺人如麻既強盜。上帝為左懲處呢3個強盜就將隻船打沉。船上既人無一幸免，全部葬身大海...」阿月扮出一面無奈既樣...
『哦哦...』聽故仔係要俾反應既...
「呢個時候，有一個智者咁岩喺沙灘上目到整件事發生既經過喎~」阿月扮出驚訝既樣...
『哦哦...』
「個智者就問上帝喇~天父呀天父呀~點解你要咁殘忍，連無辜既子民都要殺死呀?」阿月攤開雙手，望住個天...
『跟住呢?跟住呢?』
「上帝就話喇~我而家唔答你呢個問題...」阿月扮出嚴肅既樣...
『跟住呢?跟住呢?』
「跟住，智者腳板突然一痛!望一望腳底，有隻螞蟻咬左佢隻腳一下，原來佢腳底下面係一個蟻洞!」阿月扮出驚奇既樣...
『之後呢?之後呢?』
「之後，智者好嬲!佢一怒之下，喺蟻洞上面狂跳猛踩!一瞬間，蟻洞被智者毀滅左...蟻洞內外屍橫遍野...血流成河...」阿月再次扮出一面無奈既樣...
『...』
「呢個時候，上帝就同智者講...你而家明白點解我要將隻船打沉啦?」阿月對我莞爾一笑...
『...我始終都係相信啟示錄多D...第五枝號筒響起，一顆墜落的星開啟了無底坑，釋放監禁在坑裏的一大群蝗蟲去襲擊那些額上沒有上帝印記的人。』任何時候，我都相信善良既人得永生，邪惡既人必遭天譴!
「我一直都對哥哥好有信心架~我知哥哥一定比上帝更加秤職~嘻嘻~」阿月又再翹住我行...
唔知點解，我硬係覺得阿月呢個回答帶有諷刺成份...
阿月呢種咁自負既人，又點會識讚人...
唔踩多你兩腳算偷笑...
“咯...咯...咯...咯...咯...咯...”我同阿月行到去通道既盡頭，行到去天水圍既領域...
左右兩邊已經有八部防禦者EU整齊咁排好列隊。
防禦者EU...EU意指EVE Unit。
睇黎天水圍仲未研究出防禦者EU與EVE系統分離既方法...
十六部防禦者EU既盡頭企左兩個著住黑色長袍，額頭紋左黑色“天”字既行者...
我地三個領域既行者，額頭都會紋上代表佢地領域既字樣。
分別係“天”、“元”、“門”。
當然亦都有D因為貪靚既關係，唔去紋啦...
就好似細妹同綽姿咁...
佢地都話:「紋左仲點嫁得出?!」
當然我唔會迫佢地...始終紋唔紋都係佢地既自由...
我地SPIRIT好講自由，至少我地屯門領域仲係...
「等等!我地只係俾屯門統治者一個入境!其他閒雜人等快D離開!」當我同阿月行到去兩個行者前面，其中一個行者好唔友善咁講...
執行者?好大口氣!話晒阿月都係先行者...
就算係無階級觀念都係咁話...
都係喺阿月未發火之前解左圍先，唔係既話就麻煩...
『咁既，佢...』我都未講完...
「對唔住~對唔住~我只係因為成日聽人講話天水圍領域好靚~好先進~D行者又靚仔又好人~我好仰慕你地架~所以先求哥哥帶我黎見識見識~求下你俾我跟埋你地去啦~求下你啦~」阿月對執行者又呵又哄又拉又扯又嗲又扁晒嘴咁...
噢...我差D都唔記得，阿月既嗲功先係最厲害既武器...
眼前兩個行者面紅紅唔好意思咁...
「好啦...好啦...但妳唔可以跟入去議會廳，只可以留喺貴賓廳入面等候架咋...」中計了...
少年...你們太年輕了...
你地真係唔知眼前呢個貌似純真既天使，實則係一隻攻於心計既惡魔...
「無問題~無問題~只要可以俾我入去你地領域坐一坐都心滿意足架啦~多謝兩位執行者哥哥~嘻嘻~」阿月對兩位年輕既執行者莞爾一笑...
願主赦免阿月的罪...阿門...
上到一架黑色既豪華房車...估唔到，天水圍已經開始腐敗...
比想像中黎得早...
我地SPIRIT既宗旨一直都係簡簡單單，無需要有貴賤之分。
一切都係出於實用同需要，絕對唔需要裝飾，唔需要修飾。
但由呢架車可以睇得出，天水圍變左啦...
變得有貴賤之分，變得有高低之別...
只係兩個月無過黎，竟然可以有咁既轉變...
唔通SPIRIT既末日真係要降臨?
人類...始終逃唔過自甘墮落...
阿月上左車之後就一直留意住出面既情況。
究竟阿月又喺道盤算梗D乜呢?
我呢個細妹，心裏面總係有好多鬼主意。
有好多鬼主意仲要實行埋先話俾你聽...
有D仲要實行左出埋結果你先知...
所以話，有時候我都幾驚佢...
幾驚佢會唔聲唔聲做D有嚴重後果既舉動...
雖然話就話佢冷靜、理性、有分寸，但呢種天才總有發癲既時候...
而你永遠都唔知佢會幾時癲起上黎...
更真實既係，當你知道佢發癲既時候，已經係你伏已中既時候...
無可否認有時我都覺得嗰個李飛揚幾慘...同一個癲既人相處左咁多年...
咁而家，我又算唔算救左佢呢?
究竟我係救左我細妹，定係救左李飛揚呢?
對住佢地，我真係好亂...
豪華房車好快就駛上高速架空天橋，望到天橋上面都有唔少車輛行緊...
睇黎，大家都係仲未搵到方法...
而家只可以盡量保留LILITH，所以盡可能都唔用折疊之門...
折疊之門所消耗LILITH既能量實在太大，喺結界範圍裏面，都係用車輛代步比較好...
除左折疊之門外，仲要盡量減少使用能源...
始終產生EVE能源既過程中，都要消耗LILITH...
睇得出，天水圍呢邊既EVE粒子所發出既光都比較弱...
照咁睇，天水圍既情況應該都係同我地差唔多姐...
「天水圍既執行者哥哥~你地既領域真係好先進丫~」阿月又喺道扮天真...
「梗係啦。喺我地既統治者領導之下，我地既領域可以話急速發展!」其中一個坐喺前面既執行者已經急不及待向阿月展露威名。
「喂!我地唔可以講咁多架!」坐喺佢隔離既執行者立即阻止佢繼續講落去。
「唔怕啦~只係一個妹妹仔，講少少俾佢聽無事既~」妹妹仔?你又中伏了...
阿月個外表似16、7歲，事實上佢已經22歲...而心智方面，有可已經超過70歲...
老謀深算...扮妹妹，食哥哥...真係俾佢食左都唔知咩事...
就好似頭先嗰句咁，除左“天水圍”呢三個字係真之外，全部都係假...
乜鬼野你地既領域真係好先進，根本就連我地既一半都比唔上。
莫講話天水圍仲未可以令防禦者脫離EVE系統控制，呢道既窗戶都仲係用梗玻璃製...
或者可能為左慳返D LILITH啦，但咁樣係好唔安全囉。
照我估計，劉天奇所領導既天水圍領域對EVE系統既認知仲係停留喺50%左右...
呢點連我都估計到既話，以阿月既聰明才智無理由估唔到...
阿月究竟係咩葫蘆賣咩藥呢?
「執行者哥哥~平時你地有咩野做架?我平時喺屯門領域都係發呆多~真係遲早悶死啦~」阿月扁住嘴望住獵物...
「我地?唔...其實都無乜野要做，都係周圍行下，留意下領域裏面既情況咁啦...」執行者對阿月就連丁點防避都無...
身為執行者，竟然只係負責D咁無聊既行動?!太腐敗喇!
「係丫?你地唔駛出去出面架咩?」阿月繼續扁住嘴望住獵物...
「出去結界以外既範圍?講笑咩?出面根本就唔係人類可以存活既地方。我地已經好耐都無出過去啦~」執行者事無忌憚咁向阿月講出真相...
太腐敗喇!太腐敗喇!太腐敗喇!
「咪就係~」另外一個執行者接住講，「我地而家喺牆後面生活得不知幾咁好~做咩要理出面發生咩事呢?自找麻煩咩~」
點可以咁架?!
身為執行者點可以有咁既思想?!
你地係唔係已經忘記左身為執行者既使命?!
「真係好羨慕你地呢~如果可以既話，我都好想可以移民到天水圍喔~嘻嘻~」阿月對兩隻獵物莞爾一笑...
「好呀好呀~有妳呢D靚女加入，我地就多返D生氣~」兩隻小白兔都唔知狐狸有幾咁凶險...
豪華房車一路係架空高速天橋上面向住一座黑色既巨型摩天大廈行駛。
呢座摩天大廈就係天水圍既控制中心。
好高，好大座。
相比其他建築物更高更大座。
向高空同地底發展係我地既出路，因為我地既空間真係好有限...
而事實上，向高空發展亦唔可以太接近ADAM同EVE...
與ADAM同EVE保持既距離至少唔可以高過誡律之牆，唔係既話就好危險...
豪華房車行駛既期間，身邊既阿月都仲係同嗰兩個執行者吹梗水...有講有笑...
嗰兩個執行者真係對阿月一D戒心都無...
男人，總係咁...
自故英雄難過美人關，就算點叻既男人最後都係死喺女人手上...
所以想成力既男人都會去做太監...
手起刀落切左條丁唔駛阻住大腦思考...
豪華房車離控制中心越黎越近...越黎越近...駛入中心既接駁路面...
“依...”豪華房車停左喺大門前面...
總於都黎到...統治者既會議...