《香港革命戰》(上): [13-陷阱] PART 1
「敵方太過強勁喇!」
處身喺呢個腐敗既城市當中...
「展開防守線!展開防守線!」
喺高處既平台上睇住街上風煙四起...
「唔得啦!根本就無辦法展開防守線...我地已經完完全全被包...」
聽住“轟隆轟隆”既爆炸聲此起彼落...
「我地...我地會全軍...」
睇住自己既部下一個又一個咁化為輕煙...
「我係最後一個...最後一個執行者...」
睇住自己最後一個部下發射手上既RPG...擊中一架停喺架空天橋上既黑色捷豹XJ-2113...
XJ-2113車身發出一團紅色、金色、金紅色既光芒...P.R.F.D.S....
隨著P.R.F.D.S.既光芒消失，戰事亦完結。
XJ-2113...睇住解放軍既裝甲車護送XJ-2113離開...
即管走，你而家即管有咁遠走咁遠，好快，你就會成為甕中之鱉...李飛揚!
今次既行動犧牲太多...付出太多...
為左呢場戲，我犧牲左二十五個執行者...二十五個隨行者...
『對唔住，係我犧牲左你地...我最敬愛既英雄們...』我閉起雙眼，單膝半跪，為我既部下默哀...
每一個犧牲既執行者，我都認識佢地...
每一個犧牲既隨行者，我都認識佢地...
你地既名字會深深咁刻喺我心入面...
我係唔會俾你地白白犧牲...
我，陳日，屯門既統治者在此向每一個靈魂發誓!無論如何都要審判李飛揚呢隻魔鬼!
*叮*一聲後，一把女機械聲跟住出現:「注意，你還有兩小時。」
普通話...喺結界之外，當然只可以用結界之外既作業系統。
而我而家呢個作業系統，實質係我龍鳳胎既孿生細妹以前用開既作業系統...
以腦裏面既假晶片瞞騙MINDER，取得細妹既作業系統既控制權，既簡單，又方便。
只可惜...假晶片離開結界範圍之後，就只有三個鐘既能量...
三個鐘之後，假晶片內既LILITH粒子就會耗盡...MINDER亦會發現我既存在...
而家就只有兩個鐘既時間喺地獄裏面活動...
我要爭取時間，因為我仲有D好重要既野做...
『黑喵，通知趙玉玲，我已經起行，老地方見。』當然我亦都要用普通話向作業系統發出指令。
另外大家亦可以方心，MINDER絕對無辦法記錄我呢個作業系統所發出既所有訊息，因為...我既好細妹之前已經做過手腳...
但至於通話記錄或者視像記錄...無辦法可以避過MINDER既法眼...
所以點解我會用“通知”呢個功能，而唔用“通話”功能...
喺黃黃金金混濁既空氣包圍之下既街道上行，呢道根本就係地獄...
我地一直都會以地獄黎稱呼呢個地方。
試問有邊一個地方會比呢個地方更接近地獄?
被惡魔統治既地方，失去民意、自主、自由...
身邊一個又一個行屍走肉既軀殼...
你地究竟為左乜野而生存?
你地究竟仲有乜野值得生存?
每日只為惡魔付出...已經唔記得仲有自己...
一百年喇...
差唔多已經有一百年喇...
成為惡魔既奴隸已經差唔多有一百年喇...
點解仲未有救世主解救你地?
解救你地呢班惡魔既奴隸...失去靈魂既軀殼...
每一個失去靈魂既軀殼等緊被打救、被解放...
放心...審判之日好快就會降臨...
就算無救世主降臨人間，我都會審判呢個世界!
當我行到去馬路邊...
“吱...依...” 一聲機械聲響，地下立即分開，黑色既Aston Martin One 66由地底升上黎。
黑色既Aston Martin One 66...我個好細妹既愛驅...
超級跑車...或者你會問點解要駕駛超級跑車咁張揚，答案好簡單...
因為地獄裏面既警察只會識得欺負一般既平民百姓，對有錢人就只有避諱。
所以駕駛超級跑車反而會更安全。
坐上Aston Martin，扣上安全帶，準備以手動駕駛Aston Martin。
放心，話明係細妹既愛驅，我唔會令佢有任何損傷。
而事實上，我亦都無辦法唔用手動駕駛...
因為為左唔會被MINDER發現或追蹤到我既位置、我既動向，定位系統同自動導航系統全部都用唔著...
只要我腦裏面既假晶片內仲有LILITH粒子存在既話...
LILITH粒子其中一種好特別既特性就係可以將所有能源消失...
只要有效咁控制LILITH粒子，就可以向指定既系統作干擾!
所以，LILITH粒子相當重要...
亦都說明左，假如喺LILITH粒子耗盡前都未返到入結界內或走出MINDER覆蓋範圍，就會立即被MINDER發現...
到時...
所以而家要把握時間，向同綽瑩約好既老地方出發!
Aston Martin好快就轉上羅北神道架空高速天橋。
而剛才喺道發生既激擊遺留落黎既痕跡亦被解放軍清理得乾乾淨淨...
解放軍...第二大敵人...辦事能力真係高...
殺人滅口、毀屍滅跡最耍家...特別係對我地SPIRIT...
只要係對我地SPIRIT有關既事，解放軍都會迅速毀屍滅跡，清除得乾乾淨淨，不留半點痕跡，就好似從來都無發生過一樣。
解放軍已經殺死唔少SPIRIT既人，特別係我地屯門領域...
雖然解放軍係我地既敵人，但...要審判呢個世界亦要利用佢地...
解放軍，亦係我手中一隻旗子...
“颼”一聲響，Aston Martin已經走入西區河底隧道第二管道。
好快，當然快，因為喺倒後顯示器裏面已經睇到，引擎所發出無窮無盡既紅色粒子喺空氣中飛舞，Aston Martin一直保持1100km/h高速飛馳。
對我黎講，保持呢個速度駕駛足兩個鐘都絕對無問題，只要唔係嗰幾日...
我睇既野可以變得好慢，慢到隔離既三層巨型巴士好似停左喺道咁。
就算係S形急彎亦都可以輕易扭過。
如果唔係咁，又點敢隨便喺滿佈天眼既地獄裏面走動?
萬一LILITH粒子突然意外失效或遇上解放軍截查，我都可以借用自身既能力逃出MINDER覆蓋範圍!
喺地獄裏面，必定要有幾手準備，因為稍有不慎，一切就完...
穿過西區河底隧道第二管道，好快就去到目的地。
九龍西區，下一個行動既地方...
呢幾日已經走過好幾次，要紀錄既都已紀錄過，應該無問題，除非有意外...
但當然我地SPIRIT做事從來都唔會容許有意外發生，特別係我地屯門領域，一切都盡在掌握之內!
況且我地仲有內應...
將Aston Martin停放喺自動泊車處後，眼前已經有三個著住藍色衣服，黑色長褲，仲帶住黑色帽既香港警察行緊過黎。
雖然我既衣著打扮都比較奇怪，著住件黑色長身皮褸，個領仲要有黑色羽毛飄下飄，夠晒浮誇，裏面一件V領T-shirt，黑色緊身皮褲加上一對黑色Boot。長長既白髮扎住條馬尾，額頭仲要綁條白色頭巾...
咁樣既外表又點會唔俾警察截查?
但我好有信心佢地一定唔會截查我，因為呢幾日佢地已經見過我好多次，見過我好多次由Aston Martin走出黎。
佢地一定以為我係佢地階級主義社會中，處於最高層既上等人，所以佢地唔敢隨便得罪我。
上等人...比狗仲要惡...
就算佢地用MINDER查我既資料，我頭上面都只會出現“入境者”三個大字。
假晶片既效用!
我腦面既假晶片可以呃到MINDER誤以為我係由外國黎既入境者。
試問一個入境者仲要揸住架Aston Martin，警察又點會敢惹我?
但更重要既係...喺佢地三個警察之中，有一個正正就係我地SPIRIT既內應...
事實上，喺呢個地獄裏面，已經滲入左唔少SPIRIT既人...
佢地各有自己既使命，各有自己既任務，危險既任務...
我同三個警察擦身而過，佢地一直沿住馬路邊巡邏...呢一條馬路...呢一條街道...
Pacific Coffee外面既呢一條路，兩日後就會有好戲上演，當然唔少得你地既參與...
因為有乜意外，都要有執行者修正...甚至犧牲...
呢個亦係點解我會放一個執行者喺呢隊巡邏隊之中既原因...
走入圓方，名店林立，走過身邊既都係中、上等人...
呢道始終都算係中心區域...
一直以黎，香港既發展重心都係依重喺九龍同港島區。
當我地喺呢個香港出現之後，呢種發展方向就更加明顯。
睇住一個又一個不可一世既嘴臉，一個又一個醜陋既中等人...上等人...我真係好想而家就大開殺戒!一個一個咁扭甩佢地個頭!
之但係...我應承過我個好細妹唔可以殺人...
好啦好啦~我認我好錫我個好細妹...
因為...佢對我地既計劃黎講太重要...應該話細妹係死海文書既核心...
只要佢唔鍾意，成個計劃都會告摧...
所以我一定要聽佢既說話...表面上...盡可能...
沿住佈滿名店既通道行，一直行上一樓、二樓、三樓平台，平台上面有一間Starbucks，呢間Starbucks就係老地方。
呢間開設喺三樓平台既Starbucks相對地下既Pacific Coffee比較開揚。
每一個內應都會選擇一個開揚既地方作會面之用。
原因係方便我逃走。
萬一一個唔好彩，真係俾國安局跟到，我都可以立即跳到地下，逃離現場。
當然走唔走得甩就係另一回事，最起碼有得走!
國安局...SPIRIT既最大敵人...
行到Starbucks露天茶座，揀個接近平台邊緣又可以觀察四周既位置坐低...
提高警覺...
一直都提高警覺...
由結界走出黎之後，我就一直保持警覺性...
首先觀察玻璃窗外，下面街道既情況...
馬路上有幾部豪華房車同幾部超級跑車駛過;行人路上有幾個人散緊步，又有一、兩個人跑步...
之後就要觀察平台既四周...
兩個無所事事既少女坐左喺11點鍾方向，開左個投射畫面出黎睇社交網站...嘻嘻哈哈...
一個岩岩踩完單車既青年人坐左喺9點鍾方向，開左個教學網睇緊點樣保養單車，佢架單車仲放左喺佢張凳後面...
一個大肥佬坐左喺12點鍾方向，開左個“這裏成人電影”，光天法日伸左隻右手入條褲道撚雀...
一切正常，最緊要係無著住黑色西裝外套，黑色西褲，黑色領呔，白色恤衫，梳all back髮型既國安局人員出現。
國安局...呢班根本就唔係人...如果真係遇上就麻煩...
一直提高察覺...
一直留意四周...
四周好似定左格一樣...
喺平台上面追緊波既狗仔...
拖住手散緊步既情侶...
流緊水既瀑布牆身...
飛起半空中既烏蠅...
我都睇得好清楚...
我一直控制住自己既神經...
每10秒就定格一次，留意四周有無異樣...
10秒定格一次已經係最放鬆戒備，要知道如果呢道真係埋伏左國安局人員既話，佢地1/10秒都唔駛就可以要由50米走到我呢道...
所以就算係“定格”，佢地都好似世界短跑冠軍咁衝過黎...
繼續保持警察...
已經過左三分鐘...
一切正常...
當我已經唔知第幾次“定格”之時，我見到一個既熟識，又陌生既身影由平台出入口行緊過黎...
一個著住貼身連身短裙，擁有42寸長腿，驕人身段，黑色長髮到胸前，標緻既面孔...梁綽瑩...
綽瑩一直行，視線從來都無放喺我身上...
直到行過我身後，坐喺我背後既凳上面，貼緊凳背...
「我真的不太習慣你這個馬尾造型呢~還是把頭髮放下來的你比較好看~」綽瑩用普通話串我...
『我也對妳這個妖艷外型不習慣呢...還是嬌小身材，短髮，中間分界，前陰中間分開到下巴尖，兩邊鬢髮卻長到落胸前的妳比較好看...』我亦都用上普通話同綽瑩對答...
大庭廣眾之下用廣東話會惹人注意，今時今日會講廣東話既人大概就只有SPIRIT...
「那你去喜歡我的妹妹好了!不竟她是我的孿生妹妹，長得與我一模一樣!」綽瑩話裏帶有酸味...
『妳是你，她是她，怎能混為一談?好吧!先談正經事，我時間不多了...』我唔可以逗留喺地獄太耐...
「好吧，如你的妹妹所言一樣，第一目標對我不感興趣，無法接近。」綽瑩開始向我匯報。
細妹話過，以而家綽瑩既外表同性格，係絕對唔會吸引到李飛揚既注意...
果然...最了解李飛揚既人係我細妹...
「不過，第二目標好像對我產生興趣。他開始主動與我接觸...」綽瑩繼續向我匯報。
第二目標...李軍!
李軍呢個人...
『第二目標是一個非常狡猾的人!妳要小心!如遇上危險，放棄任務，立即逃生!』解放軍既李軍...同國安局一樣...都唔係人!
「好吧...好吧...」綽瑩好冷淡咁回答我。
我就係怕妳會俾咁既反應我...
妳兩姐妹雖然係孿生，但性格上就有差別...
妳個妹外表冰冷，木無表情，性格冷漠無情。但總會諗清諗楚，分析現況，先計劃，後行動，謹慎行事。
妳就咩都唔鍾意，硬係要同人作對，認為岩既野就咩都唔理照自己既意思做...
咁樣既性格真係好危險...
特別仲要係遇上李軍...
李軍呢個人，深謀遠慮、心恨手辣、毫無人性，對我地SPIRIT既認知亦都唔少...
雖然我唔知喺佢手上有幾多關於我地SPIRIT既情報，但話晒李軍都曾經潛入過元朗領域，而且係唯一一個可以全身而退既解放軍士兵...
唔可以俾綽瑩冒呢個險...絕對唔可以...
『聽我說，我已經為妳妹妹找到合適的容器。只要過多兩天，自有行動。』先擺妳個妹出黎，等妳唔好亂黎!
「真的嗎?是誰?」綽瑩對佢細妹既事非常上心。
『一個上等人。』俾多D心理準備妳都係一件好事。
「上等人?可愛嗎?漂亮嗎?我很掛念妹妹!很想快點與她團聚!」睇黎綽瑩非常期待。
難怪...兩姐妹都已經分開左一年，呢一年裏面從來都無見過面，亦無通訊過，掛念係人之常情...
『先別急，聽我說更重要的事。我已經開始為第一目標製作出限制式名冊。只要製成出名冊，我便會把它交拓給妳，到時妳與妳妹妹好好合作，把名冊套在第一目標腕上吧!』名冊...重要既一環...
整個計劃有好多重要既部份，名冊係其中一PART...
如果無名冊，就無辦法引李飛揚入陷阱...
而要李飛揚無介心之下自願帶上名冊既方法，最好就係搵個佢信任既人呃佢帶上...
「但...妹妹只是一名隨行者...要擔當這個重任...行嗎?」綽瑩有D擔心...
的確...要一個就連執行者都未到既隨行者擔當呢種任務真係有D擔心...
但真係無辦法...
呢個容器非常重要...
而且唔知係唔係上天刻意安排，最合適既人選竟然係綽姿...
睇黎...一切都係命中注定既安排...
『放心吧，她的心理質樸優良，思想正向，劍術方面也出類拔萃，勝過很多先行者。』起碼優勝過妳...
「這個...」綽瑩仲係唔放心...
『別忘記還有妳!只要妳帶著她，保護她，與她一起合作，一起行動，就不用擔心了!』其實我係想講調返轉...綽姿帶住妳...保護妳...
「這個...」綽瑩仲係好唔放心...
『所以，這段時間妳千萬不要亂來!感到危險便要立即逃命!妳很重要的知道嗎?』講到唔放心，我比較唔放心綽瑩...
「知道了...知道了...」綽瑩又再一次敷衍我...
究竟點解妳會成為先行者架...
再咁落去真係遲早出事...
「我還要保住性命，與你結婚生子嘛~」綽瑩用上嬌嗲既聲音講出我既心聲。
『嗯，審判之日降臨後，我們就在新天地當日結婚吧。』呢個係我一直以黎既願望...
世界被審判後，我地可以喺新天地裏面過住幸福、愉快、美滿既生活...
離開Starbucks...離開綽瑩...
*叮*「注意，你還有一小時十五分。」
係時候離開地獄...
“吱...依...” 一聲機械聲響，地下立即分開，黑色既Aston Martin One 66由地底升上黎。
坐上Aston Martin，扣上安全帶，手揸軚盤...準備以手動駕駛Aston Martin。
一切都盡在我掌握之內...掌握之內!
“吼”由後面傳黎既引擎吼叫聲，Aston Martin立即加速!
做完今日要喺地獄做既事，就要盡快離開...
因為，你永遠都估唔到意外會幾時發生...
國安局...
雖然我無時無刻都會有遇上國安局既心理準備，但我真係無信心可以由佢地手中逃脫...
如果話單對單係可以，二對一都應該無問題，但三個...四個...
要知道國安局行事最少都會用上兩個人，如果係要對付我既話，必定唔只兩、三個...
所以就算係而家身處高速公路，都要不時留意四周...
四周公路上有無異樣...有無國安局既蹤跡...
喺地獄裏面活動真係好攰...
短短一、兩個鐘，就好似過左百幾年...
太危險...實在太危險...
就連一件半件皮甲都無...
光脫脫咁深入敵方陣地實在太危險...
只可惜...我地最強既科技唔可以用喺結界之外...
如果唔係都唔駛搞咁多野...
ADAM...EVE...LILITH...
激氣!
“吼”，Aston Martin繼續係高速公路上面飛馳。
已經飛過西九龍公路，轉入青葵公路。
青葵公路...青衣...
喺呢段路上面就要更加小心...
青衣...解放軍陸軍基地...
雖然話呢幾年解放軍已經再無派軍隊試圖衝擊誡律之牆，但係佢地不斷用唔同既方法去探測我地。
雖然探測既距離亦唔係好近，直頭可以話有D遠，但就好似D黑人憎既烏蠅咁係你身邊飛黎飛去...飛黎飛去...依依哦哦...依依哦哦咁真係好想一大巴車死佢!
只可惜佢地真係有D遠，如果唔係...夠膽就走黎黃金海岸，睇下我地點樣將你地殺到片甲不留!
不過...能量亦係另一個問題...
以現時既情況黎睇...已經唔可以好似以前咁...
LILITH...
我地而家只可以靠誡律之牆擋住外來既入侵...
所以解放軍唔敢接近我地都算係一件好事...
唔需要用能量去防衛外敵入侵，仲可以借助誡律之牆或者ADAM吸收能量。
盡量要保存能量...保存LILITH...唔可以浪費...
一直留意住左邊解放軍陸軍基地既情況，一直喺青葵公路飛馳，好快就飛到去荃灣公路。
好喇，黎到呢個公廠區開始比較安全。
公路上面亦只係得返幾架巨型貨車，如果有咩風吹草動都好容易察覺得到。
只要巨型貨車既行車路線有小小偏差...就一定係國安局做既好事...
我亦都好有信心，只要巨型貨車未被國安局全完改變路線之前，我就已經逃離包圍網。
以我既駕駛技術加上Aston Martin，國安局既Corvette唔會係我既對手。
“颼”...荃灣...整個地區都係一棟棟噴緊黑煙、白煙既摩天工廠大廈。
呢個地區對我地SPIRIT黎講真係無乜實質價值...只不過需要注視...
因為呢個地區充滿下等人...需要救助既下等人...
生活係地獄裏面既下等人根本無能力生存。
佢地只有被惡魔不斷奴役...不斷吸食血同肉。
到下等人頂唔順，已經再無能力或利用價值，就直接由佢自生自滅...
餓死既餓死...自殺既自殺...
有大志D既會走去挑戰惡魔，但好不幸，未埋到惡魔身邊就已經被全方位主動式防禦系統清除...
所以...我地SPIRIT必須向呢班弱勢社群伸出援手...
至少我地屯門領域仲會咁做...
“吼”...Aston Martin已經飛到屯門公路既入口前。
三年前，我經常會用呢條高速公路返去屯門領域，但而家已經唔可以再用...
呢條被地獄廢棄左好一段時間既高速公路已經俾解放軍改建梗...
又係解放軍...
究竟解放軍想改建呢條公路黎做乜?
我諗都係為左對付我地SPIRIT...
最大問題係，如果你話改建粉嶺公路，我就話知你。
但解放軍當然唔會選擇一個距離咁遠既公路做行軍路線。
始終，論戰略部署，我地呢邊會比較接近解放軍基地...
無論支援或者撤退，對解放軍黎講都比較有利。
識得揀，都會咁揀...
竟然做左天水圍同元朗領域既爛頭卒...條氣硬係有D唔順!
不過唔緊要，照搜集得黎既資訊分析，喺解放軍仲未部署好之前，地獄就已經被審判左喇。(如果一切順利既話...)
“依...”由狹窄既交匯處轉入青山公路路段。
好喇，黎到呢道，可以話已經安全...
去到呢個區域，莫講話解放軍既旗幟，就連警察都唔會有半個。
而整梗上面條屯門公路既建築機械球絕到唔會無端端走落黎青山公路，就算走左落黎都唔會對我有任何反應。
我可以減慢車速，免得整花細妹部愛驅...
Aston Martin慢慢咁喺狹窄又凹凸不平既青山公路上行駛...
睇住無幾遠既地方有一個小小既村落...深井...
係喎，今朝趕住去準備計劃，都無停落黎探探呢道既朋友...
講起上黎，我都好似好耐無過黎深井行下啦...
反正仲有D時間...行下都好!
我將Aston Martin停泊喺一角。
“沙...沙...”Boot踩到粗沙、碎石、爛泥地...
面前一架小巴飛過之後，我橫過對面馬路...
當我過左對面馬路之後...
“汪...汪...”小黃已經擺住尾衝過黎。
『喂喂喂...不要不要~哈哈哈~』小黃爬上我身，不停咁舔我塊面...
『夠了夠了~不要太掛念我好不~』舔左幾下，小黃終於舔夠，向住村落走。
為我帶路?
雖然我真係好耐都無黎過，但我都仲認得路既。
我一直跟住小黃後面，走入充滿悠閒氣息既深井。
幾間恬靜既木屋，煙囪上面飄住淡淡既灰煙，小花瞓左喺木檯上面曬太陽，就連面前有老鼠經過都唔去理...
風和日麗，涼風輕送...
難得既和諧...
地獄裏面難得既和諧...
和諧...地獄裏面成日都講，但有幾多係真正既和諧?
地獄裏面既和諧，只係惡魔用黎修飾高壓管治既美麗詞彙。
和諧既先決條件係公平、公正、平等。
又唔公平、又唔公正、又唔平等又點會和諧?
「看看那個大人物來了~」一入到深井，坐喺安樂椅上面既老張笑笑口咁問坐喺佢對面既老陳。
「啊?啊?給我看清楚~噢!三合的統治者，陳日喔~」老陳深深咁吸一啖煙，再噴返出黎。
『別拿我來開玩笑吧~我並沒有甚麼了不起呢~』呢兩個老人家加埋都成百幾歲，都仲係咁百厭...
「嘩嘩嘩!誰敢用你的大名來開玩笑?三合為整個香港帶來恐懼，而你正正就是三合的統治者，還不夠大嗎?哈哈哈~」老張又恥笑我...
「對喔對喔~可惜這個統治者的普通話還沒有學好呢~哈哈哈~」老陳跟住老張恥笑我...
『好吧好吧，就等我立即把這裏夷為平地好了...嘿嘿...』我握實拳頭，換上一個陰險既笑容，展示我並唔係善男信女。
「嘩嘩嘩!」幾下嘩聲之後，老張同老陳都跳到去凳後面...
「說笑而已~何必認真~」老張僕左喺凳後面伸個頭出黎偷望我。
『怎樣喔?你們的生活還可以嗎?物資充足嗎?』我換返個慈祥既樣。
「哈哈~很好喔，多得你們三合的救助，我們的物資相當充足。糧食數量足以維持整條村落三個月的需要。」老陳坐返落張安樂椅上椅上面邊搖邊答。
『嗯，假如有不足的情況，盡早通知路經這裏的三合成員，我們會盡快送物資給你們!』我點一點頭。
「嗯嗯，我們充心感謝你們三合對我們的恩惠。這是認真的。」老張深深咁吸一啖煙，再噴返出黎，點點頭。
『客氣了...客氣了...算不上甚麼算不上甚麼。所有都是由惡貫滿盈的惡魔手中搶回來的，都是你們應得的...再者...當審判來到之時，才是真正的恩惠...』我轉身望住身後萬惡既地獄...
老張同老陳互相望左幾眼...都講唔出半句話...
明既...
對於已經認命既人黎講，又點會諗到有機會反抗?
你只會覺得所有野都好似係必然...
加價係必然...
人工低係必然...
工時長係必然...
無發言既權利係必然...
貧者越貧係必然...
富者越富係必然...
但係有D野你唔去做，咁就一世架喇...
「大人物~肚子餓了嗎?要來我家吃個午飯嗎?」老張有善咁邀請我。
『不用了不用了~我還有事要辦...呀!對了!假如不久的將來，有一個衣著光鮮的年青人路經這裏，盡管給我嘲諷他吧!你們可以辦妥的...』交低左說話之後，我繼續行入深井...
穿過兩間用磚頭堆砌既屋仔，跟住海風一直行，呢道都真係無乜點變...
劉大嬸煮既飯依然都係咁香;小儀都仲係咁鍾意同小灰玩，小灰當然就好小理，繼續趴喺木檯上面曬住太陽，遙下遙下尾瞓覺。
始終都係保存住舊鄉既景緻。
行到去海邊前，我見到一個熟悉既身影...
一個著住棗紅色皮鞋，深藍色貼身牛仔褲，啡色短身皮褸，短黑髮既背影...
『高智海...有陽光下的海邊最舒服吧。』我一路行近熟悉既背影，一路講。
「嗯?黎左呀?你D普通話都仲係咁差，都係講返廣東話啦陳日...」智海轉頭望一望我，又望返出海。
乜我D普通話真係咁差咩...
你估我想講普通話架咩...
『講廣東話唔怕俾MINDER發現咩?』我行到去木製圍欄，睇住銀光閃閃、三尖八角既青衣講。
「MINDER...應該話國安局同解放軍，佢地一早就放棄左呢道啦，你知架。」智海並無望多我一眼，只係專注喺海上飛緊既海鷗。
我當然知道，細妹一早就已經講過，INTRUDER發現MINDER放棄左呢區既情報...
但當然我都要搵多個人證實下。
『個海好靚...』我望住藍色既海...我地SPIRIT無既野...
海風撲面，陽光送暖，真係好舒服...
喺呢個崩壞既地獄裏面可以搵到咁自然既地方，真係好難得...
自然既環境，上帝既手作...
「可惜落入左喺魔鬼手中...」智海一面遺憾...
可惜...真係好可惜...
咁靚既環境，咁完美既生態，竟然落入喺魔鬼手中...
但唔可以忘記，魔鬼都係上帝創造出黎...
究竟點解上帝要創造魔鬼出黎?
要平衡呢個世界?
但好明顯，而家既世界係魔鬼當權...
『你估解放軍佢地喺道忙緊咩?』成個解放軍基地都係荷電粒子砲，砲口有D仲要對住我地呢邊...
如果俾佢地射一砲唔知會點呢?
無誡律之牆保護下既香港，一秒間會化為灰燼...
你永遠都唔知道中共幾時會唔知發咩神經要毀滅呢道...
每分每秒都要面對被毀滅既恐懼...
究竟呢道D人，點可以喺高壓管治下生活?
人民無發聲既權利...
當權者想點就點...
唔鍾意就可以攞你命...
佢地唔驚架咩?
驚?都習慣晒，仲點識驚?
「忙緊咩?仲駛問?梗係忙住點殲滅你地啦。」智海指住黑色既誡律之牆。
咩你地?
係我地...你無份既?
「無事不登三寶殿...陳日，你唔會係想搵我聚下舊咁簡單既。搵我究竟有咩事丫?」智海一D都唔客氣...
駛唔駛咁丫...
話晒曾經都係出生入死既好戰友...
而且好似唔係我欠左你喎...
「想問情報?呢期我搜集左唔少解放軍既情報喎，想問有關上面條路整緊乜?」智海轉個身，指一指上面條屯門公路。
『我想你幫幫我帶D野俾教授，教授會知點做。』我都係單刀直入會好D。
「就係咁簡單?」智海眼尾望一望我。
『嗯...』我亦都好耐都無認真咁望過智海一眼...
睇起上黎，智海既殺氣減少左...
「好~我有得話唔好咩?D野呢?」智海攤開雙手。
『兩日後我會親自將D野交俾你。事成之後，你就可以得到自由，想去邊就去邊。』我一邊交低說話，一邊轉身離開。