《想當年，我係跑Online入面搵到初戀》: 【9】

「我...只不過係搵唔到開電腦個制姐.....」佢再嘗試去搵，但斜斜地望住我，彷彿示意緊啲咩咁。

「唉，真係服咗你！」我又點會接收唔到佢個訊號啊？

「唔該曬！」佢報以微笑，傻傻地咁。

原來牛奶糖都有蠢蠢地嘅一面，咁究竟係咪個個女仔都會有嘅呢？
 
我哋好順利咁打開部電腦，牛奶糖好似都唔知點用咁。





「喂！點用架？」點解咩嘢都無嘅？」佢露出天真無邪嘅表情，真係好鬼搞笑。

同牛奶糖一齊，笑容都會畫咗係臉上，我哋嘅相處，就係一副美麗嘅畫。

「唔話你知！」我作弄下佢。

「快啦！我第一次嚟咋。」

「第一次就同我嚟，係咪好有感覺先？」係喱種氛圍下，我講嘢越嚟越大膽。





「痴線啦你！」

「啊.....唔係，你幫我嘅話就好有感覺啦，哈哈。」我真係輸俾牛奶糖，俾佢食到死下死下咁。

「好啦好啦！」然後幫佢開埋跑Online，其實好簡單，教一教佢就識曬。

代表嘅係，唔會再有機會教佢/玩佢。

「唔該曬。」牛奶糖搞掂曬之後，淨係留低咗喱句。跟住好似細路仔咁，好興奮咁係度玩。





然而我見到一幕我最唔想見到嘅事......

牛奶糖好順利咁登入MSN，我見到原來牛奶糖同好多男仔傾偈，一登入就好多離線訊息跳出嚟。

頓時我見到嘅畫面，係灰色。

我好努力咁強裝輕鬆，但我呃唔到自己內心嘅失落。「哇！你好多男仔搵喎！估唔到你市場咁大啊......」

我自己講出嚟都覺得好酸，我分唔清我究竟係羨慕佢係咁多人搵而我無啊，定係因為我鐘意佢而妒忌。

但最害怕嘅，係嗰一份唔確定嘅心意.......
 
「死啦，你啲fd會唔會話你重色輕友架？」牛奶糖無啦啦提起，睇嚟佢都幾介意咁喎......

「我同你講，佢哋唔會講，就唔係fd啦。朋友就係串返嚟嘅！」忽然間我覺得自己開啟咗聖人模式，識得講大道理。





「你......啊..你又講得幾有道理喎！好似我哋喎哈哈哈。」

「喂！玩返場跑啦。」牛奶糖見到跑online個網頁load好啦，順勢問我。

「驚你啊！俾你見識下人稱DJ小王子。」

「收皮啦你，你係仆街小王子。」佢大大聲咁講，睇嚟佢融入曬網吧喱個環境。

我哋打打鬧鬧，串串貢咁玩咗幾場。

然後係我哋玩到就嚟高潮嘅時候，忽然間有幾條MK仔係後面圍住我哋兩個......

「咦，靚女！乜你都有玩跑咩？」
「係囉，我好勁架，魔鞋！」




 
嗰種氛圍，我好撚驚......我第一次感受到咁強大嘅壓迫力。

好幾個MK仔圍住牛奶糖，我唔知可以做啲咩，但我唔想班死MK搞鳩牛奶糖。

「咪同條廢柴玩啦！同我哋一齊玩跑咪仲好。」
「咪係...一齊玩四人同心啦！」

我忍唔柒鳩撚閪住啦！

「喂！人哋想點玩關你乜事姐！」我聲大大咁講，以為可以嚇返走佢哋，等佢哋可以知難而退啦.....

屌你啊，嗰幾個MK仔不但完全唔驚，仲兇返過嚟，「咩料啊你！我哋鐘意點......」佢用隻又粗又長嘅食指戳我心口，我留意到，佢嘅食指仲帶住隻骷髏戒指。

「就點！關你撚事啊？柒頭皮！」佢將我推返落張櫈度。





「咩事啊？邊個恰我個fd啊？」暴龍佢見有唔妥，即刻趕過嚟。

「你又咩料啊？我哋差條友玩四人同心，搵多個組隊玩又唔得啊？」依家帶頭嘅MK仔兇神惡煞，其他跟係後面嘅MK仔一齊圍威喂。「係啊...係啊」叫個不停。

「我陪你玩！睇你班仆街咩料。」我點都唔會要牛奶糖同佢哋玩㗎啦！

玩親分分鐘粒糖會俾人食堆。
牛奶糖聽到我咁講，呆咗，然後笑咗出嚟。

由頭到尾佢都無出到聲，唔知佢係驚定點，但嗰一抹笑容，真係俾咗好大嘅信心我。

「加油！」牛奶糖背住班MK仔，用口型同我講。

喱個戰爭，許勝不許敗！





「好啊，驚閪你啊！」喱條MK仔，我後尾先知道原來佢叫牙俊，令我諗起神仙B。

牙俊chock一chock佢嗰一執長到遮曬眼嘅陰，露出一雙豆豉咁細嘅眼睛。

我發誓，從此我同MK仔誓不兩立！

我哋去返原位，入好曬場啦，佢哋好幾個拖鞋同埋波鞋仔，咁串咀想同我隻飛鞋鬥？仲話自己魔鞋？

我當然上齊最勁嘅練金裝，同埋用最新嘅角——軒仔。

有軒仔好威豬架，又型又勁，好多人用佢，我為咗威下都課金買咗佢。

準備就緒，入場！
 
我同牛奶糖兩個人坐係M記入面，拎住張M記卡，20蚊一張嗰啲呢，買一個可以換另一個。

我哋係度傾緊要換咩好，喱種小樂趣，如今已經不復存在。

「點啊，你諗好未啊？」牛奶糖係咁催我。

事關我哋兩個都想食麥旋風，但又只可以揀一個，於是我讓咗俾牛奶糖，自己揀其他。

但好難揀得落手......