《想當年，我係跑Online入面搵到初戀》: 【6】

睇嚟佢都係一路串到落尾架啦。

「係fd先串你咋傻佬！」你睇下啊...有樣板你睇架，唔係呃你架。

「係囉係囉，心情難得好返又俾你串到謝返曬。」

「返去玩返場跑啦，姐姐陪你玩！」

唔知係咪佢豪爽嘅性格，我就係咁樣俾佢吸引住。





上堂嗰陣周不時都會留意佢，坐係佢後面，見住佢可愛嘅馬尾，就可以幻想到佢正面。

我趁老師做緊其他嘢嘅時候，搞鳩佢馬尾。

點搞？咪就係...係咁撥佢馬尾，係度fing下fing下咁。

然後佢「摺」咗一聲，擰轉頭望住我，怒目而視。

憤怒嘅眼神帶點調皮，彷彿同你講緊粗口咁，你瞬間就明白嗰個眼神代表啲咩。





我好鐘意佢喱個神情，可愛得嚟又令我覺得既興奮又好笑。

可能就係嗰一剎那，我就慢慢鐘意咗牛奶糖。
 
佢用口型同我講，『喂啊！』

「嘻嘻！」我暗笑。

我同牛奶糖嘅關係好曖昧，感覺好似戀人咁好，過咗咁多年，都值我一再回味一番。





可以嘅話，我都想返去以前嘅時光。

喱一切，個肥婆都睇在眼內，估唔到嘅係...佢周圍同人講牛奶糖搶佢男朋友(姐係我)。

然後我哋班上面嘅人唔知點解又會信，然後一齊俾人排斥。

中學嘅圈子好細，好快全班都知，當佢哋見到我同牛奶糖就避之則吉，我同佢只感到百舨無奈。

「Sorry啊...搞到你咁樣......」我返到去MSN佢。

我同牛奶糖嘅事，暴牙佢並不知情....啊，與其話佢唔情，不如話男仔們都唔知情，因為係女人先會咁濕鳩。

我會知，係因為我睇得出，同埋牛奶糖唔開心我都有問過。

不過肥婆玲無意中推咗我同牛奶糖係埋一齊。





佢嘅壞心事無意間竟成了一件好事，我同牛奶糖因為喱件事，感情先慢慢好。

「算啦！佢哋都唔清楚我份人，因為喱件事都睇得出邊個先係我朋友。」
 
我不知不覺成日都會注意牛奶糖，命運好似一步一步咁將我哋拉近。

由一開始加MSN，開學坐我前面，排斥事件等等，都將我哋嘅距離由平行線合成一直線，好似喱兩條線有磁力咁，會相互吸引。

有時你不得不相信緣份，因為就係巧合到令你相信有緣份嘅存在。

「唔洗驚，你仲有我啊嘛！」我試圖安慰佢。

「有你成日搞鳩我？」我係MSN見到喱個訊息，打從心底咁笑出嚟，真心希望我哋可以一直咁落去......





然後牛奶糖繼續輸入中，「成日將啲紙巾放落我件冷衫度！有你我先黑仔啊！」再打個嬲爆爆嘅符號。

「我成日陪你玩跑喎！」

「你不如陪我跑步好過啦......真人跑哈哈哈。」

「下？你講真定講笑啊？」

「我喱排都有去跑啊，夜晚去跑下海旁咁。」

「乜無聽你提過嘅？」

「乜都同你講咩？傻嘅...哈哈。」睇到你句，我個心不禁感到失落，而喱種失落好強烈。

可能我真係將牛奶糖當成習慣，而忽略咗，其實我哋只係朋友......