《想當年，我係跑Online入面搵到初戀》: 【1】

牛奶糖其實係同我同一間學校，依家諗返起，其實中學時期，會同某啲人熟真係好莫名其妙。

你曾經有無試過問自己，點解會同喱班人熟？

然後再回想返，會fd到，竟然係咁……咁平凡。

就好似我同暴龍同暴牙兩兄弟fd，係因為我好細個心血來潮，去樓下屋村啲乒乓波枱度打乒乓波。

咁啱見到佢哋兩兄弟打緊，我三唔七識就去跟隊，跟跟下就成日打，打打下又入埋同一間中學。





一切係幾咁自然，但其實可以一齊玩咁耐，係唔容易。

牛奶糖佢真名叫陳皓琳，之所以叫牛奶糖，係佢皮膚好白，又鍾意食牛奶糖。

叫下叫下，就連真名都唔記得。

至於我點解會俾人叫司華力，就……唔好提啦好嗎？

牛奶糖唔係靚女，只係一個好普通嘅女仔，但唔知點解，我就係俾佢吸引住。





依家大家畢咗業，發覺佢靚咗好多。

原來好多嘢已經一早唔同曬。

嗰陣時仲係MSN嘅年代，最鍾意就係掛住個MSN去做其他嘢，煲下劇，打下機。

明明牛奶糖係隔離班，但係唔知點解佢會有我MSN，仲加到我。

後尾先知道，原來佢加錯咗人，打錯咗email嘅幾隻字，咁啱就加咗我。





而我會知係佢，都係上咗中三同班之後，先知。

玩跑Online，已經係小學雞嘅事，嗰陣小學班fd一齊玩，玩玩下上咗中學就自己玩多。

因為小學班同學已經各散東西，中學又無咩人玩跑Online，變相自己偶爾會登入睇下有無人Online一齊玩，無就自己單機。

「留在彼此的身邊，牽著手再繼續飛。」
 
喱句係牛奶糖係MSN status度打嘅句子，我一睇到，我就清楚知道，喱句係跑Online嘅句子。
 
當其時我並無咩想法，唔係想狗公溝佢，只係純粹見到有fd玩跑Online，嗰種見到原來都有人玩嘅興奮同喜悅感。
 
令我產生一種衝動，就係主動去hi佢。
 
嗰陣時嘅我一啲都唔怕醜，仲幾勇敢添。依家你叫我咁樣主動去搵女仔傾偈？我真係做唔出。




 
我都唔知點解，當中嘅原因，可能係隨住年紀增長，面皮會越嚟越薄嘅關係掛？
 
頂，我仲要勁傻仔咁震佢。
 
你剛剛已送出來電震動！
 
其實真係好柒，不過牛奶糖都回得幾快，不過只係回咗個「？」。
 
「你係咪都有玩跑Online呀@＠？」
 
想當年，好多喱啲咁樣嘅表情符號，見人用得幾得意，自己又跟住用。
 
啱啱學識打字嘅我，幾乎用親都係5P字，依家已經唔會啦。
 




牛奶糖打嘅都係5P字，但依家嘅佢，已經唔會再打。
 
「係呀，做咩呀？」牛奶糖覆我。
 
「無，想搵fd一齊玩姐哈哈。」
 
其實我已經On緊跑Online，不過較咗半視窗，可以一邊On，一個邊覆佢。
 
登、登、登！
 
見到牛奶糖嘅回覆彈上嚟，我就即刻回覆。
 
「你無fd陪你玩咩？」佢打字好快，相比起我，打字慢到乜咁，因為啱啱學識，所以好鬼慢，成日都要諗點樣打。
 
「無呀，好多fd去玩其他Game，玩跑Online俾人笑架。」




 
「我覺得幾好玩呀，啱女仔玩。」佢後面打埋個微笑嘅表情符號。
 
「女仔唔係會鐘意玩勁舞團多咩？」
 
我自問真係玩唔掂勁舞團。
 
「我唔鐘意勁舞，鐘意跑多啲。」再加多個「XD」。
 
以前嘅我哋，好興講句嘢都加表情符號，久而久之變成咗一個習慣。無咗表情符號，感覺上就好似凝重咗同嚴肅咗咁。