童年回憶——數碼暴龍機

童年回憶——數碼暴龍機
 
小學既時候，我同好多細路一樣，真係好中意睇數碼暴龍。好記得個時每出新一代數碼暴龍機，我都會發夢夢見自己得到一部。然後好快我就會夢想成真，哄到呀爸呀媽買比我。(唉，其實爸媽真係好錫我。)
 
當年揸住部機玩仲緊要過而加D人低頭玩手機。叫呀媽攞定喺手接放學，一放就衝出黎拎番部機，幫隻暴龍鏟屎同餵食。有時又教呀媽幫我照顧住先。但我打機不嬲屎，就算幾努力照顧佢，隻野都係經常死……
 
試過有次喺大埔超級城間A1麵包鋪撞到個好串既細路 (當然我都係細路)。佢揸住部二代，而我仲係一代。我唔記得係我挑佢機定佢挑我機，總之打之前，佢話佢二代贏硬，叫我諗真D先好打。我本性好挑戰，而且深信實力可以打破既有限制。所以我地始終有對戰到。
 
二代好似冇計步數器，但據講對戰時搖機好似有助提高勝算。一代就冇呢個功能。開始左對戰之後，佢繼續同屋企人行A1，而我就行左出門口轉角位。等佢睇唔到既時候，我瘋狂咁用盡奶力，勁搖部機！明知冇呢個功能，但我仍然係不遺餘力……諗番起街上既人都唔知會唔會發現左我真係痴線仔。
 




結果……係冇爆冷既。我輸左。
 
仲有記得當年大埔圖書館仲喺寶湖既時候，有好多細路都會聚集喺兒童圖書館對戰。到而加都唔知有D機係山寨定係其他特別版。試過見有細路既機唔係養住數碼暴龍，而係街霸！？痴線，你識街霸就會認到係ken或者ryu黎既？但機身同一般二代數碼暴龍機一樣。而加諗番，咁細既點陣圖都造得幾靚喎咁。
又試過放學做功課，未做得完但電視夠鐘播。其實只係差少少未做完，但呀媽唔比睇，一定要我做完先。冇得睇我真係坐喺度喊……喊左陣唯有死死氣做埋佢，好喇，終於做完，即刻0秒出手開著部電視。結果一開睇左兩秒就播片尾曲完場。。。。。。跟住又喊。。。。。。
 
仲有好多好多回憶……不過唔講太多啦……
 
今次見到有週年紀念版，所以決定點都買番隻！見好多人都一買至少買兩隻，方便自己同自己對戰，同埋唔知合體定點。不過我最後都係決定買一隻就夠。一黎我只係為左懷緬一下，二黎又冇咁多時間照顧。你知啦，養寵物有好大責任架嘛，冇心不如唔好養，害人一世。更何況佢唔係寵物，係朋友~ (阿明：媽呀，好毒呀！) 而且，我有佢做伴就足夠，真心相待，一人就夠，唔需要太多。我慣左靜靜地單機生活。(阿明：打機都毒過人！)
 





好期待快D送貨黎呀！