[真人真事][校園][純愛]《婚宴上的重遇》: 第八十八章

一路行返屋企我就喺度諗
究竟若凝講嘅係邊個
以前我地一齊讀書嗰陣,
好似冇乜邊個男仔同佢特別有關係
但係聽佢頭先咁講,
又唔似係佢初戀男朋友
諗嚟諗去,
我都諗唔掂
沖完涼返到屋企,
呀成問我打唔打機




咁我就順便同佢傾下
因為之前都有同佢講過,
今日我會見返若凝
佢條八卦友,
都應該好想知今日發生啲乜
我:「你條友無啦啦咁夜叫我打機
肯定有蠱惑啦 」
呀成:「睇下你死得未咋
點呀今日點呀,
有冇同人地傾計呀 」




之後我就將今日發生嘅事同佢講晒
呀成:「你地進展咁快嘅
咁耐冇見,
又一齊食野,
仲送埋人返屋企 」
我:「其實我都估唔到咁快 」
呀成:「真心講一句,
其實我覺得若凝係鍾意你
以前讀書嗰陣都係咁講,
只不過係你條蛋散唔信 」




我:「會唔會係咁呀
佢頭先先同我講,
話心裏面有個人放唔低.」
呀成:「佢點樣講呀 」
我:「佢話由去英國嗰陣直至到依家都冇拍拖,
因為一直都放唔低一個人,
返到嚟香港之後見返佢,
佢覺得自己仲係鍾意呢個人,
唔係自己嘅錯覺 」
呀成:「以前佢同邊啲男仔frd 」
我:「其實唔多,
我淨係喺度口中聽過佢初戀男朋友一個人
其他都冇喇 」
呀成:「咁係咪佢初戀男朋友 」
我:「聽佢口氣就唔似 」




呀成:「唔止佢初戀男朋友嘅
仲有一個 」
我:「邊個呀 」
呀成:「咁你清楚啲.」
我:「我真係唔知你講邊個 」
呀成:「行哥,
你幾時變到咁鈍兜 」
我:「下 」
呀成:「你自己諗下,
佢以前同邊個男仔行得最埋 」
我:「喺學校咪我囉 」
呀成:「咪就係囉死蠢
根本佢講緊嘅就係你 」
我:「會唔會呀
我嗰陣成日都覺得佢對佢初戀男朋友餘情未了 」




呀成:「你覺得啫
佢有冇親口講過 」
我:「咁又好似冇 」
呀成:「咪係囉,
全世界都睇到,
係得你睇唔到
唔好再浪費時間喇 」
我:「你覺得佢真係鍾意我 」
呀成:「老老實實我覺得係
咁就算唔係,
你同佢講都冇蝕底丫
識你咁耐唔通唔知你有幾鍾意佢咩
咁難得依家見返面,
再錯過就冇架喇 」
我:「嗯,




你有你嘅道理 」
呀成:「講得耐左有啲眼瞓
都係唔打機喇
聽晚先 」
我:「頂你 」
之後我自己喺度諗,
又係喎,
其實佢以前從來都冇講過,
佢仲係鍾意佢初戀男朋友
只係我一廂情願,
對自己冇信心
先至咁樣認為,
諗返起,
以前同佢行得最埋嘅男仔,
其實就係我,




點解我咁都唔知嘅
真係好笑,
依家唔再係中學生,
冇咁多時間浪費,
已經唔容許我再淆底,
係我又好唔係我都好,
聽日我都想打俾佢
咁難得見返佢,
真係唔想好似六年前咁樣,
白白浪費機會,
有啲野試過一次就夠.

之後去到第二朝
好記得去到一點半嗰陣,
我就即刻打俾佢
因為我覺得呢一刻,
打電話方便過whatsapp
好耐冇試過撳電話冧把會手震
之後終於接通,
喺度等緊佢聽嗰陣,
我係咁同自己講要放鬆,
千祈唔好心急
唔等都等左六年,
依家只係一個電話,
完全唔需要心急
之後佢終於聽,
若凝:「喂.」
我:「係我呀,呀行 」
若凝:「我知呀做咩 」
我:「點解你會知 」
若凝:「你有喺班group嗰度講低你叫咩名,
有save到呀 」
我:「竟然 」
若凝:「打嚟做咩呀 」
我:「我終於知你尋晚講邊個 」
若凝:「咁係邊個丫
答中有獎 」
我:「嗰個人,
喺你讀中六嗰陣成日同你一齊嘅,
中六嗰年平安夜仲一齊出去,
你嘅十八歲生日,
陪你去迪士尼,
買蛋糕俾你食,
又成日一齊食車仔麵,
去溫書,
但係去到中七,
嗰個人就同你分開左,
跟住仲要幾年冇見,
啱唔啱 」
若凝:「即係邊個呀
你唔講名我唔知喎.」
我:「呢個人傻仔嚟嘅,
好傻好傻嗰隻.」
若凝:「認同丫
咁即係邊個 」
我:「你明明知嘅,
仲喺度扮野 」
若凝:「你唔講名我唔知喎 」
老老實實,
嗰陣我真係唔敢開自己名
我:「咁係咪佢 」
若凝:「都唔知你講邊個 」
死就死啦
我:「xx行(我全名),
啱唔啱 」
之後靜左一陣
若凝:「你想我點答你 」
我:「啱定係唔啱 」
若凝:「同你玩個遊戲好冇 」
我:「咩遊戲 」
若凝:「去到禮拜日之前,
你整一樣我最鍾意嘅野俾我,
到時會答你 」
我:「今日係禮拜日
即係一個禮拜之後 」
若凝:「係呀,
依家要你等返幾日好正常啫
反正我都等左咁多年.」
我:「即係整乜野 」
若凝:「你知嘅,
頭先你有講過架,
對我嚟講好有紀念價值
而且嗰樣野係要準備,
所以先俾一個禮拜你 」
我:「有冇多啲貼士 」
若凝:「你真係好蠢
可以擺得落口嘅,
明未呀 」
我:「咁我知喇.」
若凝:「但係一定要你自己整,
買唔算呀 」
我:「你等住禮拜日食啦 」