[真人真事][校園][純愛]《婚宴上的重遇》: 第八十六章

由於一對新人都係同一間中學
所以播幻燈片嗰陣,
好多時嘅場景都係學校
亦即係我地以前讀緊中學嗰陣嘅相,
望下一張望下又一張
嗰陣真係覺得自己老
原來我地都影左咁多相
睇睇下,
有兩張相好特別,
第一張係中六散學禮嘅相




嗰陣我同若凝仲未鬧翻,
又或者唔可以叫鬧翻
總之就係未話想忘記佢嗰陣啦
原來嗰陣我地都係企埋一齊影,
大家都笑得好開心
之後坐我隔離嘅若凝就出聲,
若凝:「你睇下你個樣幾搞笑 」
我:「係喎
點解笑到咁樣架 」
若凝:「唔知你 」




我:「肯定係你嗰陣同我講左啲唔知咩啦 」
若凝:「邊有 」
之後一路播,
第二張相就係中七last day嗰日,
喺相入面,
我同佢已經分開企,
大家都係強顏歡笑
同之前中六嗰張完全唔同,
若凝亦都冇撩我講野,
當幻燈片播緊呢張相嘅時候,




睇完之後我喺度諗,
原來以前真係同若凝成日一齊
都係今日睇返先覺
點解最後會搞成咁呢
真係輸自己戇居
不過點都好啦,
今日可以見返佢,
其實已經好滿足
以前嘅我,
就係因為太貪心,
不知不覺間,
腦入面好想有進一步嘅關係
結果去到最後,
分道揚鑣,
依家已經大個左,




明白到有啲野唔可以強求,
做人真係要知足呀.

之後去到十點幾就散場
咁我諗住返屋企啦,
反正聽日係星期日
今晚返去早啲瞓,
聽朝唔使咁早起身
正呀
當我準備走嗰陣,
若凝無啦啦叫我
若凝:「仲係住緊以前嗰度 」
我:「係呀
窮人冇錢搬地方 」
若凝:「咁我都係窮人呀




一齊返去 」
我:「哦,
好呀.」
估唔到佢會主動約我一齊返去
嗰陣嘅我就好似去返中學嗰陣咁樣,
個心係咁跳
好興奮但係又好緊張
有返以前同佢嗰個感覺
我都真係好耐冇試過咁樣,
有悸動嘅感覺
出到去,
若凝:「不如搭巴士 」
我:「好呀.」
之後我就拎電話出嚟,
睇下巴士app啦




我:「仲有五分鐘,
好快啫 」
若凝:「好呀 」
巴士果然好快就到,
一如以往,
我地都係坐上層
上到去就傾計,
若凝:「估唔到男班長佢地可以行到咁耐 」
我:「係呀,
大大話話都有六七年 」
若凝:「佢地好幸福呀
女仔最羨慕就係呢個時刻 」
我:「係咩
可能係掛 」
若凝:「你呢幾年又點呀 」




我:「還可以啦,
正正常常咁樣
冇穿冇爛 」
若凝:「你真係呀,
講親野都係模稜兩可咁 」
我:「係咁架啦 」
之後我地就返到去屋邨,
頭先一路搭巴士嗰陣,
就好似六七年前咁樣,
大家都係拍住咁樣坐
估唔到,
喺我有生之年仲可以咁樣望住一個咁靚嘅傾面
之前我以為已經冇機會架喇,
福氣已經用盡,
估唔到原來個天都幾憐憫我,
可以俾我再試多次呢一個滋味
我記返起好多野,
六七年前,
以前我地去自修室溫書嗰陣,
我咪又係咁樣淨係望住佢傾面
嗰陣同今次一樣,
我都係好驚俾佢發現,
所以唔敢長期望實
時間已經唔同,
依家係2016年,
地點亦都變左,
唔再係喺圖書館,
但唯一冇變嘅,
就係嗰一份感覺
我相信各位巴打絲打都會明,
望住自己最鍾意嗰個人嘅側面,
就已經好滿足
因為你唔使再喺後面追佢,
而係可以拍住佢,
已經有好大嘅進步喇.