[真人真事][校園][純愛]《婚宴上的重遇》: 第六十六章

咁樣之後我就喺度諗,
究竟點樣慶祝好呢
同男仔慶祝我就識啫
依家係女仔困難得多,
自己愈鍾意嗰個女仔就愈難諗
如果唔鍾意好簡單啫,
求其咪得囉
使乜考慮咁多,
依家唔係,
又要幫佢慶祝,




又唔想佢唔鍾意
最好就開開心心咁樣度過,
同埋呢個係佢嘅十八歲生日
呢個年紀特別關鍵,
所以就係咁樣先難諗
有一晚我夜晚刷牙,
見到我刷牙用嗰個杯,
係一隻米奇老鼠,
跟住即刻靈機一觸
係喎點解我咁都諗唔到,




女仔梗係鍾意去迪士尼啦,
同埋以我所知,
佢呢一年都係冇去過迪士尼
之前去日本冇去過,
佢話因為太多人
香港就更加冇,
佢去過應該會同我講啦
今次得喇,
係就係貴就貴啲,
我一個人俾兩個人錢去迪士尼,




不過冇所謂啦
反正都係一次,
同埋個主角係若凝
邊可以計較咁多,
我就冇本事請佢去東京迪士尼
希望香港嗰個佢會收住貨先,
除此之外,
梗係要準備埋蛋糕,
大家都知佢好鍾意食朱古力
仲要係愈甜愈鍾意,
咁個蛋糕唔使問就梗係朱古力啦,
但係市面上咁多朱古力蛋糕,
邊個先啱佢食呢
佢又話要驚喜
即係唔可以問佢鍾意食邊個啦,




咁就唯有自己試啦,
以我所知佢係唔鍾意食有雜果嘅朱古力蛋糕,
所以有雜果嗰啲我可以刪除
但係都仲有好多選擇,
跟住我就做到一個極度戇居嘅事情
就係買晒咁多款嘅朱古力蛋糕嚟食,
總之可以喺我住嗰頭搵到,
而又合符原則嘅朱古力蛋糕,
全部都買晒,
我冇記錯買左六款
同埋由於時間都緊迫,
所以我想盡快食晒六款,
睇下邊個最甜,
跟住就揀嗰個嚟送俾若凝
之後我就一日食三個,




真係一日三餐都係朱古力蛋糕,
食到想嘔
又飽肚又滯,
不過自己同自己講頂住上,
完全係用鬥心嚟應付,
先可以捱過兩日食六個蛋糕,
嗰陣真係痴左線,
早知就上高登問人啦
雖然高登仔係信唔過
跟住發現原來其中一個係最甜,
嗰個係朱古力慕絲嚟,
一切都準備就緒,
依家最重要嘅就係女主角喇.

嗰年若凝生日正日係禮拜五嚟




我梗係想同佢喺正日慶祝啦,
不過我自己都打定輸數,
佢正日應該係陪佢好姊妹
又或者係屋企人,
點會輪到我呢個二打六丫
但係都要照問先架,
打定輸數還打定輸數,
問左點都冇蝕底
之後我就打俾佢,
但係冇接聽,
跟住過左一陣,
我個電話就響左
見到個號碼有啲印象,
但應該係唔熟嘅,
因為我冇落到聯絡人




咁我就要聽啦,
我:「喂 」
若凝:「係我呀 」
我:「點解你用呢個電話打嚟 」
若凝:「我今日出去唔記得帶電話,
之後我媽咪打返俾我個frd,
話你打俾我
我咪用我個frd個電話打返俾你囉 」
唔怪得個電話咁熟,
即係之前若凝喺除夕嗰晚,
佢借嗰個電話打俾我同我講新年快樂
應該係同一個電話號碼,
我:「你呀媽又識打俾你個frd 」
若凝:「呢個識左好耐架喇,
咪就係之前我講嘅嗰個好姊妹 」
我:「唔怪得啦 」
若凝:「打俾我做咩呀 」
我:「差啲唔記得左,
你八月廿八號得唔得閒 」
若凝:「做咩先 」
我:「帶你去迪士尼
唔好話我唔識做喇 」
若凝:「好喎,
但係嗰日我唔知使唔使同朋友慶祝
一陣打返俾你好唔好 」
我:「好,
可以第二日去迪士尼嘅,
我係諗住問你嗰日得唔得啫
我見嗰日係禮拜五,
應該冇假期咁多人 」
若凝:「好快覆返你,
等等 」
嗰陣我真係等佢電話等到好心急,
係咁諗住得,唔使改期
未試過等一個電話等到咁唔耐煩,
嗰次真係歷來最誇張嘅一次
之後電話終於響起,
若凝:「一於就廿八號啦 」
我嗰陣真係high到傻左
終於得喇
我:「好,
會唔會影響到你同你班frd呀 」
我真係呢,
去到呢一刻都仲係扮晒野,
人地都話明冇問題
自己都仲喺度懶大方
若凝:「唔會呀 」
我:「咁唔阻你喇,
拜拜 」
若凝:「拜拜 」