[真人真事][校園][純愛]《婚宴上的重遇》: 第六十四章

好快就去到學期尾,
回顧返呢一個學期,
真係好不可思議
之前都講過,
點解我會有咁嘅感覺,
我唔再喺度重覆
散學禮正正常常咁樣,
冇發生乜野特別事,
我地唔使留班
其實正常都唔使嘅




雖然我唔叻啫
同埋我地因為仲係中六,
基本上下一個學期,
即係嚟緊嘅九月,
大家都仲係會見
所以好少人影相,
我都冇帶屋企部相機去
若凝亦都冇,
咁講真,
今次個散學禮當然有少少感覺啦,




冇可能完全冇
因為下年嘅今日,
就係我地放榜嘅時候,
中六係我地最後一個過嘅完整學期
因為去到中七,
二月就會study leave,
準備應付a- level
今年係最後一個學期尾嘅散學禮,
啲啲唔捨得啦
你話好多又唔係,




咁樣係散學禮之前嗰晚,
若凝就已經問我聽朝食唔食早餐
咁我心諗反正都係中六最後一日,
冇問題啦,
同埋大家都知,
我係唔識拒絕佢
去到散學禮嗰朝,
佢一如以往咁準時,
入到去我地就分別叫左野食
若凝:「今次你有食喎 」
若凝竟然記得上次我冇食,
驚各位讀者唔記得左,
我喺度再講多次,
之前我同佢都試過一齊食早餐,
嗰次我係冇叫野食




因為我本身朝早係食唔到咁多野
咁點解我今日食到
係因為我比平時更加早醒
希望咁樣會有啲胃口,
而呢個方法的確係有用,
我:「有冇人話過你好好記性 」
若凝:「冇呀做咩咁講 」
我:「咁你都記得我之前冇食 」
若凝:「好易記啫嘻嘻 」
我:「真係唔好得罪你,
唔係俾你記成世 」
若凝:「係架 」
其實,
我都好想俾你記成世
不過我估你都唔會架啦,




都係自己ff下算數.

食完早餐我地就返學校
由於我地係一齊返,
少不免會有啲聲音呀,
又或者係緋聞架啦
不過都慣
自從嗰日踢完班際足球,
有人見到若凝喺我隔離安慰我之後,
就比之前更加多人講我同佢係有野
各位巴打絲打做個中學生應該明
我同之前一樣,
都係樂在其中嘅
我知有好多男仔想同佢傳緋聞,
所以有時我都俾佢地潤




個樣仲要特別衰
至於若凝就唔知佢有咩感覺喇,
講返個對話先,
我地一返到去,
就已經有條友行過嚟同我地傾計
同學A:「一齊返喎 」
我:「你想嘅我都可以架 」
同學A:「邊個係想同你
我想同若凝咋
你估我係基嘅咩 」
我:「好難講呀,
平時你都乸乸地 」
同學A:「收皮啦
費事同你講
若凝呀,




聽日我同你一齊返學好冇 」
我:「話說聽日已經唔使返喇聰明 」
同學A:「問你咩
咁下個學期呢若凝 」
若凝:「唔想喎.」
同學A:「一日丫 」
若凝:「都話唔想咯.」
跟住我就梗係大力恥笑啦
嗰條友亦都好冇癮嘅咁走左
講起上嚟,
若凝串起上嚟真係好串
好在我同佢都算熟,
如果唔係會同其他男仔一樣,
以為佢係一個好串嘅人
諗諗下我都幾好彩.

我地出席完散學禮就走左
還掂都係今個學期嘅最後一日,
不如問若凝放左學有冇野做啦
我:「有冇野做 」
若凝:「冇呀.」
我:「不如去食糖水
好耐冇食過 」
若凝:「又好啫 」
原諒我嘅重色輕友
點知一出到去就俾佢地見到
呀余:「去邊度呀行哥 」
我:「返屋企啫 」
丁仔:「信唔信你呀 」
我:「梗係要信
從來都唔講大話 」
呀成:「今晚打機啦 」
我:「好 」
呀余:「我驚你今晚都未返到屋企,
你知你幾忙 」
我:「一定唔會,
開定等我啦 」
丁仔:「信住先 」
之後我同若凝就走左,
去到糖水鋪若凝問我,
若凝:「你地識左好耐呀 」
我:「係呀,
初中玩到依家 」
若凝:「唔怪得咁好感情 」
我:「原本仲有一個嘅,
不過嗰個去左外國 」
若凝:「咁你地咪好唔捨得 」
我:「其實都係架 」
若凝:「你好似好少講佢地嘅野俾我聽,
可唔可以講下
原諒我嘅八卦 」
我:「幾條毒男冇乜野好講喎 」
若凝:「總有少少嘅 」
我:「咪又係一齊打機踢波
有時大家都幫大家嘅,
不過呢啲唔會講出口,
始終男仔唔同女仔.」
若凝:「咁都係 」
我:「你呢,
話說讀左成年有咩感覺 」
若凝:「都幾好呀
老師同埋同學都係,
係有啲男仔真係煩左少少 」
我:「證明你有吸引力囉 」
若凝:「多謝喎 」
我地咁樣講下講下,
就過左幾個鐘,
之後就各自返左屋企
依家大個左諗返起,
其實當年應該要帶相機去,
因為唔係成日都有咁嘅機會,
起碼如果我當日有帶嘅話,
今日應該冇咁多遺憾,
後悔,
原來真係好辛苦.