[真人真事][校園][純愛]《婚宴上的重遇》: 第五十章
之後佢就約左我今晚六點半
咁大家就各自返左屋企
返到去我喺度諗,
究竟我應該點做呢
係咪要著好啲
但係大家都知啦,
毒勁邊有衫著架
所以最後都係回歸自然
求求其其t-shirt牛仔褲算
冇計啦
之後去到六點半我就準時去到附近商場,
咁若凝不嬲都準時嘅
所以我地好快就出左嚟
我:「話說我啱啱諗到啲野
」若凝:「肯定唔係好野啦
」我:「話說我份生日禮物呢
」若凝:「同你食飯咪算囉
你咁多要求架
」其實我真係咁樣覺得
佢同得我食飯,
已經係最大嘅生日禮物
但係我梗係唔會咁樣講啦
我:「搞錯呀
咁都得
」若凝:「冇準備呀
聖誕先俾你
」我:「好似啱啱先過先聖誕
」若凝:「係呀,
我想多啲時間諗丫嘛
又唔想求其送喎
」我:「好,
解釋真係多
其實講笑啫
已經大個啦,
有冇生日禮物其實冇乜所謂
」若凝:「咁又唔好咁講
生日禮物同埋大唔大個其實冇乜關係,
我好重視生日禮物架
」「我好重視生日禮物架」,
呢一句我聽完之後
喺我個腦入面即刻知道要做啲野
咁當然唔係依家啦,
而係等佢生日嗰陣先
亦即係五月
我:「幾有童真喎
」若凝:「所以我生日嗰陣你要識做呀
」我:「痴線好似老奉咁樣
」若凝:「係呀係老奉架喇
」我:「到時先算啦
」若凝:「我當你應承左架喇
」我:「係喇
」應承左,
但係又有幾多人係做得到兌現承諾呢回事
我:「咁食乜野呀
」若凝:「不如打邊爐
」我:「附近有得打咩
」若凝:「傻仔,
吉野家咪得囉
」印象中嗰陣吉野家打邊爐個風氣冇依家咁犀利
當然其實都係印象,
如果講錯唔好插我
之後我地去到吉野家
可能係平日啦,
我地一去到就有位
若凝:「今晚我請你啦
預左俾你屈錢
」大家都知啦,
平時真係好少同人出嚟慶祝生日
我嗰班豬朋狗友平時都係自己俾自己,
邊個生日都係,
冇請人食野嘅習俗
所以我嗰一下覺得好奇怪
加上我諗諗下,
若凝同我食飯已經好俾面,
唔使要佢再出錢啦
冇理由要搵個女仔請掛
我:「唔使啦
無啦啦請乜野
」若凝:「不嬲都係生日嗰個食野唔使出錢丫嘛
」我:「俾人見到要個女仔請我食野,
幾唔好意思呀
」若凝:「你又嚟啦
」我:「又話生日最大我話事
唔使請啦
」若凝:「口硬心軟
你話唔使就唔使啦
」我:「咁咪乖囉
」當然啦,
若凝嗰陣係完全唔知我真正嘅諗法
之後我地就打邊爐,
若凝原來好鍾意食蟹柳
係咁加係咁加
去到最後差啲連烏冬都食唔晒
大家都知啦,
吉野家打邊爐個精髓就係烏冬
唔食烏冬不如唔好食
若凝明明飽到死,
聽到我咁樣講又唔衰得
格硬食埋佢
聽到我笑佢又扮個嬲樣,
唔係講笑真係好可愛
我又想望佢,
但又驚太猖狂佢會知我好專注望佢個樣
就係今次打完邊爐,
我先至再了解佢多啲
除左好鍾意食蟹柳之外,
原來係唔鍾意食南瓜同埋粟米
牛肉都係正常
未去到話好鍾意,
反而鍾意雞肉多啲
當然啦,
呢啲其實都係一啲好無聊嘅野
不過我嗰陣都係咁,
只要可以了解多啲,
即使係好似今次咁,
淨係知埋啲無聊野
都已經夠我暗爽
喺佢面前,
我真係極力掩飾自己嘅感覺,
連爽都要自己收收埋埋.
食飽之後
若凝:「不如喺附近行住先
時間咁早
」我:「好呀
但係你到時返到去話夜瞓
聽日唔知醒唔好鬧我
」若凝:「得啦
你條友真係好煩
明明都冇人話要鬧你
」我:「講定先啫
」若凝:「行你就行啦,
有咩想睇呀
」我:「冇喎,
你睇啦
睇乜都得.」
若凝:「咁去商場打個白鴿轉
」其實入到去我地都係行,
好少話真係睇乜野
若凝有睇下衫
係咁問我呢件靚唔靚,
會唔會著上身顯得佢太肥
我心諗佢都痴線
佢咁都叫肥嘅話,
高登仔應該唔會反肥婆(嗰陣冇連登)
我自己都唔會反啦
根本係標準身材
之後去到馬拉松定唔知運動家
佢話想入去睇下有咩運動衫,
若凝:「假假地你都係足球隊
遲啲一齊做運動啦
」我:「痴線你嚟踢波呀
」若凝:「做其他運動都得啫
不如去跑步
」我:「唔好搞體能差到爆
」若凝:「差咪要練
一齊跑啦
」我:「第二樣啦
」若凝:「羽毛球
」我:「哩個就得喇
學界林丹
」若凝:「劉丹咋呱
」我:「好好笑呀若凝姐
」若凝:「幾好笑架
」其實嗰下真係幾好笑
講講下我都忍唔住笑
之後佢就去左睇運動衫
我就去左睇波鞋
我竟然見到自己想買嗰對白色t90
如果冇踢波嘅巴打應該唔知我講乜
簡單嚟講就係我見到我想買嗰對波鞋
不過原本嗰度仲未爛,
同埋香港成日都冇貨
估唔到隔左一陣已經出左
咁我就拎上手望啦,
真係好靚
之後若凝睇完佢要睇嘅野就過左嚟
若凝:「你好似好鍾意喎
」我:「係呀,
靚唔靚
」若凝:「ok啦
」我:「識貨
」若凝:「咁你點解唔買
」我:「之前香港冇呀
同埋屋企嗰對又未爛.」
若凝:「原來係咁.」
我:「你好似諗緊野咁嘅
極度蠱惑
」若凝:「你就係
行啦
」行多一陣我地就走左
咁我理所當然送埋佢返屋企,
先至再返自己屋企,
話晒都咁夜
若凝:「今年生日開唔開心呀
」我:「梗係開心啦
有偉大嘅若凝姐幫我慶祝
真係我嘅榮幸
」若凝:「幾識講野
」其實頭先係我嘅真心話
我只係用左一個輕佻嘅態度去表達
若凝:「咁好啦聽日見啦
拜拜
」我:「拜拜
」以前好期待嘅十八歲生日,
咁就過左
好似過得好快
可能因為我真係好開心
就好似平時上堂咁樣,
上中英文堂時間過得特別慢
反而上pe堂時間過得快得多
明明上嘅鐘數係一樣
開心嘅時間過得特別快真係冇講錯
除左咁樣之外,
亦都好難忘
難忘到今時今日仲記得啲細節,
時間真係會證明一切.