[真人真事][校園][純愛]《婚宴上的重遇》: 第四十七章

一去到十二點
我個電話就響
呢個我事前完全冇諗過
你知啦,
邊有人會注意小毒毒嘅生日
之後我望一望來電顯示,
原來係我最想見到嗰八個冧把
個感覺就好似收到生日禮物咁樣
我諗我都係世界上,
最快收到生日禮物嗰個




零時零分就收到
咁我就即刻聽電話啦,
我:「喂 」
若凝:「生日快樂呀
18歲嘅大哥哥 」
佢個「大哥哥」仲係一個字一個字咁樣講出嚟
我:「仲未瞓嘅 」
若凝:「咁啱今日瞓唔著
咁啱我就開面書
咁啱我就見到你今日生日




咁啱我就打電話
又咁啱你仲未瞓覺
就係咁喇 」
我:「咁都好多咁啱喎 」
若凝:「係架,
我係咪最快先 」
我:「若凝姐你贏左喇
滿意未 」
若凝:「你班老死呢 」
我:「男仔邊有呢啲架




成班契弟瞓咗啦 」
若凝:「乜唔係咁先係兄弟咩
從來都唔會有好隆重嘅野做
但聽日返到去就會個個潤你
我覺得咁代表大家太熟 」
我:「可能係啦
有時最多都係一齊打機打夜啲,
但係聽日要返學就算啦
你知啦依家天氣凍
起身嗰下真係好辛苦
咁咪寧願瞓耐啲囉 」
若凝:「天氣真係好凍
壽星公聽日有冇野做呀 」
當我聽到若凝咁講之後,
我喺度諗,




唔通今年生日會有啲特別事發生
以往都係自己過,
一係就同朋友同埋屋企人
咁多年都冇一個女仔
唔通今年有機
我:「冇呀做乜野 」
若凝:「屋企唔使同你出去食飯咩 」
我:「尋晚食左啦 」
若凝:「咁聽晚賞唔賞面出去食呀壽星公 」
我:「夜晚出嚟食咁好
晏晝得啦 」
我講就咁講啫,
但係嗰陣已經興奮到自己喺度笑
係咁做手勢
當然若凝係唔知啦




若凝:「晏晝學校有野做呀
同埋生日飯我覺得夜晚好啲 」
我:「咁聽日見啦
早啲瞓啦契弟 」
若凝:「咩呀你講咩呀 」
我:「冇野呀
驚你聽日唔知醒
所以叫你早啲瞓啫 」
若凝:「你條友丫
唔好以為生日大晒 」
我:「你聽錯喇 」
若凝:「早抖啦 」
收左線之後,
我成個人真係好開心
我完全冇諗過我可以同佢一齊食夜晚嗰餐




簡直係bonus嚟,
我原本諗住最多只係晏晝一齊出嚟食車仔麵
由佢同我講生日快樂嗰下,
我就知道今年真係好有運氣
頭先我講錯左喇,
十八歲生日唔係唔開心,
反而係調返轉,
因為有一個意想不到嘅驚喜
係我諗左好耐都唔會諗得到嘅野
結果嗰一晚瞓到落床都係瞓唔著,
太興奮,
就好似細個期待去秋季旅行咁樣,
各位巴打絲打明白嘅.

結果去到第二日朝早,




成班契弟個生日禮物竟然係千年殺
仲要一人一下
痛到大聲講粗口
仲要咁啱俾老師見到
叫我罰抄一百次「我以後不會在學校說粗口」
我心諗都痴筋嘅
唔通我無啦啦喺操場大聲講粗口咩
我有同老師講架,
話佢地千年殺同埋篤我春袋
如果唔係我就唔會講,
點知老師話我講核突野
叫我另外再罰抄五十次「我以後不會在學校說色情語言」
仲話已經好俾面
冇叫我抄一百次
咁我就講都嘥氣啦,
垃圾教畜食屎狗
之後上返去班房,
若凝:「生日快樂 」
我:「又講
尋晚先講完 」
若凝:「乜你唔知咩,
面對面講一次
電話講一次咁先得架嘛 」
我:「我係咪要講多次多謝 」
若凝:「係 」
我:「多謝 」
若凝:「多謝你個多謝 」
我:「無聊 」
若凝:「無聊你又笑 」
我:「笑你夠戇居 」
之後我就拿拿臨搵一張a4紙,
抄「我以後不會在學校說粗口」一百次
同埋抄「我以後不會在學校說色情語言」五十次
咁若凝坐我隔離丫嘛,
佢就梗係見到啦
若凝:「你點解寫埋啲咁嘅野 」
我:「痴線今朝成班pk行埋嚟話俾生日禮物我,
點知原來係千年殺
我梗係痛啦
咁我咪大聲講粗口囉,
點知俾老師聽到
佢就叫我罰抄,
我咪同佢講其實唔關我事,
係佢地千年殺同埋篤我春袋先,
跟住佢就話我講咸濕野
結果就要再罰抄 」
若凝:「抵你死啦
壽·星·公 」
若凝嗰陣個樣好摟打
摟打得嚟又好可愛喎